قازاقتىڭ ءبىر توپ قالامگەرى شەرحان مۇرتازا تۋرالى ەستەلىكتەرىن جاريالادى

None
None
استانا. قازاقپارات - ەل گازەتى «ەگەمەن قازاقستان» حالىق سۇيگەن، حالقىن سۇيگەن جازۋشى شەرحان مۇرتازانىڭ قازاسىنا بايلانىستى ءبىر توپ قالامگەردىڭ ەستەلىكتەرىن جاريالادى. قازاقپارات اگەنتتىگى باس باسىلىمعا سىلتەمە جاساي وتىرىپ، وقىرمان نازارىنا كوڭىل ايتۋلار توپتاماسىن ۇسىنادى.

***

ءجۇزى سۋىق بولعانىمەن، جانى جىبەك ەدى...

شىركىن، دۇنيە-اي دەسەيشى! كەشە عانا جايراڭداپ پارلامەنتتىڭ تورىندە، ەلدىڭ ءسوزىن سۇڭقارداي داۋسى ساڭقىلداي سويلەپ وتىرعان شەراعامىز دا دۇنيەدەن ءوتتى...

باۋىرجان اعامىز بەن تۇماعاڭنان كەيىنگى مىڭبۇلاقتان ۇشقان قىرانداردىڭ ءبىرى ەدى. ۇشسا - سۇڭقار، شاپسا - تۇلپار اعامىز ەڭ الدىمەن كىسىلىك كەلبەتىنە كىر جۇقتىرماعان پاراسات يەسى بولدى. شەراعاڭنىڭ اعالىعى مەن ازاماتتىعىنىڭ ءوزى نەگە تۇرادى؟

شىعارماشىلىق يەلەرىنىڭ باياعىدان كەلە جاتقان «گوگولدىڭ شەكپەنىنەن شىقتىق» دەيتىن ءسوزى بار. ال بىزدە قولىنا قالام ۇستاپ، ەلدىڭ ءسوزىن ەكى اۋىز ويعا سىيدىراتىن ساقا جۋرناليستەردىڭ كوبى «شەرحان اعامىزدىڭ شەكپەنىنەن شىققان شاكىرتپىز» دەيدى. ول ءسوز - ءبىر كەزدەرى «لەنينشىل جاستى» تۇبەگەيلى تۇرلەندىرىپ، «ەگەمەن قازاقستانعا» جۇرتتى ەلەڭ ەتكىزىپ، حالىق وقيتىن گازەت جاساعان شەراعاڭنىڭ جۋرناليستيكا سالاسىنا سالعان سارا سوقپاعىنىڭ وتەۋىندەي ءسوز.

جالپى، قولىمىزعا بيلىك ءتيىپ، قىزمەتتە جۇرگەندە ەلدىڭ قامىن ويلاپ اق سويلەيتىن، جارىپ سويلەپ جاسىرماي ايتاتىن ادامداردى ىزدەۋشى ەدىك. ءبىر كەزدەرى «سوتسياليستىك قازاقستان» بولعان اعا گازەتتىڭ رەداكتورلىعى بوساعان كەزدە ورتالىق پارتيانىڭ يدەولوگيا جونىندەگى ءبولىم مەڭگەرۋشىسى ەدىم، ورتالىق پارتيا كوميتەتىنىڭ يدەولوگيا جونىندەگى حاتشىسى وزبەكالى جانىبەكوۆ اعامىزبەن اقىلداسىپ شەراعاڭدى «قازاق ادەبيەتى» گازەتىنەن بۇگىنگى «ەگەمەن قازاقستانعا» اپارىپ ەدىك. كەلە سالىپ اتا گازەتتى اجارلاندىرىپ، «ەگەمەندى» ەل وقيتىن سۇيىكتى گازەتكە اينالدىرىپ جىبەردى.

جارىقتىقتىڭ ءجۇزى بىلايعى جۇرتقا سۋىق بولعانىمەن، جانى جىبەكتەي جۇمساق ەدى. قايىرىمدى، باۋىرماشىل ەدى. اعامنىڭ جارقىن كۇلكىسى مەن ايباتتى سوزدەرى ءالى كوز الدىمدا.

وپاسىز دۇنيە دەگەن وسى بولار؟.. كەشە ەلدىڭ قاق تورىندە جايقالىپ جۇرگەن شەرحان اعا كەيىنگى كەزدە كوپ قينالدى دا عوي!.. ءومىر عوي!.. الدىنان جارىلقاسىن!

مىرزاتاي جولداسبەكوۆ

  

تۇتاس بولمىسى قازاققا قىزمەت ەتتى

 

قالامداسىڭنىڭ قازاسىنا كوڭىل ايتۋعا كوتەرگەن قالامداي اۋىر نارسە جوق- اۋ، ءسىرا!؟.

ال شەراعامنىڭ قازاسى ماعان قاتتى باتىپ وتىر. ەشتەڭە ايتا الار ەمەسپىن، اۋىر قالامدى كوتەرە الار ەمەسپىن. سوندىقتان مەنى كەشىرەسىزدەر دەپ ويلايمىن.

«ءاي، اكىمباي!» دەپ ەركەلەتۋشى ەدى. ءبىر-اق جاس ۇلكەندىگىمەن ءومىرباقي اعا بولىپ، ءومىرباقي اعالىق بيىكتىكتەن الاسارماي ءوتتى، شەر-اعام! نە دەگەن قاسيەتتى ادام!

شەر-اعامنىڭ ەڭبەگىن ءبىر عانا جۋرناليستيكاعا، ءبىر عانا رەداكتورلىققا، ءبىر عانا جازۋشىلىققا، ءتىپتى ءبىر عانا ادەبيەتكە بايلانىستىرىپ ايتۋ جەتكىلىكسىز. ونىڭ تۇلا بويى، تۇتاس بولمىسى قازاققا قىزمەت ەتتى. ەندى ونى تولىقتاي زەردەلەۋ دە مۇمكىن ەمەس شىعار. سونداي ءبىر قاسيەتتى تۇلعا، داۋىرلەردى جالعاعان جامپوز ءوتتى مىنا جالعاننان!

بۇدان بىلاي مەنىڭ عانا ەمەس، تۇتاس قازاق جۇرتىنىڭ ءبىر ءبۇيىرى ۇنەمى ولقى سوعاتىنداي... الدىڭ پەيىش بولسىن، اسىل ادام!

اكىم تارازي

 

شەراعاڭنىڭ شەكپەنىنەن شىققانداردىڭ ءبىرىمىن

 

شەرحان مۇرتازا ءوز حالقىمەن بىرگە جاساپ، قاتار تۇرىپ قالىپتاسقان قايسار تۇلعا. ونىڭ ەلگە بەرگەنى، ايتقانى، كورسەتكەن ۇلگىسى، سىلتەگەن جولى ۇشان-تەڭىز. ءوزىنىڭ باۋىرجان اعاسىنا ۇقساعان تۇرىمەن، مىنەزىمەن، جەڭىمپاز، جاسامپاز رۋحتى قالىپتاستىرعان قايراتكەر. شەرحان كۇللى قازاق جۋرناليستيكاسىنىڭ باسىن اياعىنا، اياعىن باسىنا كەلتىرىپ قايتا قۇرعان تالانتتى، كۇرەسكەر تۇلعا. قازاق جۋرناليستيكاسى شەرحاننىڭ شەكپەنىنەن شىقتى دەسەك مۇلدە ارتىق ايتقاندىق ەمەس.

شەراعاڭ جاس ادەبيەتشىلەرگە ۇلكەن اسەر ەتتى. اسىرەسە ءابىش كەكىلبايەۆ، ءجۇسىپ قىدىروۆ، مۇحتار شاحانوۆ، رىمعالي نۇرعالي، اقسەلەۋ سەيدىمبەك، ورالحان بوكەي - ءبارى-ءبارى شەراعاڭنىڭ الدىن كورىپ، اقىلىن تىڭداپ، اعالىق كەڭەسىمەن ءوسىپ جەتىلىپ، ۇلكەن ساپارعا اتتانعان قالامگەرلەر. شەرحان مۇرتازانىڭ 60- جىلدارداعى جاستارعا ىقپالى وتە كۇشتى بولدى. 60- جىلدارى ادەبيەتكە كەلگەن قالامگەرلەر شەراعاڭنىڭ تىكەلەي اسەرىمەن قالىپتاستى. ءوزى دە سولارمەن قاناتتاسىپ ءجۇرىپ ءوسىپ، جەتىلدى.

شەرحان مۇرتازا «لەنينشىل جاس»، «قازاق ادەبيەتى» گازەتتەرىنىڭ، «جالىن» جۋرنالىنىڭ رەداكتورى، «قازاقستان» تەلەراديو كومپانياسىنىڭ ءتوراعاسى سياقتى اسا جاۋاپتى قىزمەتتەر اتقارا ءجۇرىپ، قوعام ءۇشىن اسا قىزىقتى تاقىرىپتارعا بارۋدان تايىنبادى. بۇل ورايدا «ستالينگە حات»، «بەسەۋدىڭ حاتى» كەزىندە اشىق كۇندە نايزاعاي ويناعانداي اسەر ەتتى. مەن شەرحانمەن ۇزاق جىلدار قىزمەتتەس بولعان اداممىن. جۋرناليست بولىپ قالىپتاسۋىما تىكەلەي اسەر ەتتى. مەن دە شەراعاڭنىڭ شەكپەنىنەن شىققانداردىڭ ءبىرىمىن. ونىڭ دۇنيەدەن وتكەنىن ەستىپ، قاتتى كۇيزەلىپ وتىرمىن. وزىمە باعدار تۇتقان جاننىڭ جارىعى تاۋسىلۋى ماعان دا مەزگىلسىز اي تۇتىلعانمەن بارابار اسەر ەتتى. ارامىزدان ءوزى كەتكەنمەن ونىڭ اتى ماڭگى وشپەيتىنى عانا قۇلازىعان كەۋدەمە جالعىز دەمەۋ.

انەس ساراي

 

شەپتى بۇزىپ، شەر قوزعاعان شەراعام!..

 

ادام بالاسى بۇل جالعان دۇنيەگە قوناق دەگەنى راس ەكەن-اۋ!.. سەنەيىك پە، سەنبەيىك پە؟ «شەراعام قايتىس بولىپتى» دەگەندى اۋرۋحانادا جاتىپ ەستىدىم. كەرەۋەتتە جاتقان كۇيى كوز جاسىم كوكىرەگىمدى شايا بەردى...

سوڭعى كەزدەرى ءبىز سيرەك كەزدەسەتىن (سويلەسەتىن) ەدىك. اعام - الماتىدا، مەن - استانادا توسەككە تاڭىلىپ، سوڭعى جىلدارى مۇلدەم جولىعىسا المادىق. العاشىندا قىزى الما ارقىلى اندا-ساندا بولسا دا تەلەفونىنان داۋىسىن ەستىرتىپ قۋانىپ قالۋشى ەدىم. ايتسە دە وسى جىلدىڭ باسىنان باستاپ الما قارىنداسىم ءبىز قوڭىراۋ شالعاندا «اعا، پاپام دەمالىپ جاتىر ەدى، قوڭىراۋ شالعانىڭىزدى ايتامىن عوي»، دەپ قاشقاقتاۋىنا قاراپ ءبىر جاماناتتى جۇرەگىمىز سەزگەندەي بولۋشى ەدى. اقىرى اللا ءوز جانىنا العان ەكەن!.. ول جاققا دا جاقسى ادام كەرەك دەگەن راس قوي... ءومىر زاڭى دەگەن - وسى.

شەراعام ءوزى تۋرالى جازعان رومانىمدى تەگىس وقىپ شىعىپ: «ءاي، بايقا، مەنى باياعىداي كوكپار تارتتىرتىپ، اتقا شاپتىرتىپ قويىپ جۇرمە، وقۋشىلارىمىز سەنبەيتىن بولادى»، دەپ قالجىڭداپ قوياتىن. سول ايتقان ءسوزى ءالى قۇلاعىمدا تۇرعانداي.

اعام ارتىنا وشپەس مۇرا قالدىردى. ونىڭ جازعان روماندارى مەن حيكاياتتارى، قيسسالارى مەن باسقا دا پۋبليتسيستيكالىق شىعارمالارى قازاق وقىرماندارىنىڭ ولشەۋسىز بايلىعىنا اينالادى دەپ سەنەمىن. الاش رۋحىنىڭ ايبىنىن اسىرعان اڭىز تۇلعا - شەر-اعا!.. ارداگەر ازاماتتىڭ اسقاق رۋحىندا شەپتى بۇزسا باتىر، شەردى قوزعار اقىن اتويلاپ تۇراتىن!.. ارتىنا ۇلكەن مەكتەپ قالدىردى! قوش بولىڭىز، ارداقتى اعا!

ءادىل دۇيسەنبەك

 

قوش، اڭىزدىڭ اقىرعى تۇياعى!

 

ەل ومىرىندە ورنى ايرىقشا، ەكى تۋىپ، قوس قايتالانبايتىن تۇلعالار بولادى. ءوز زامانىندا ايباتتى اعا قازاقتىڭ كوركەم ءسوزى مەن كوسەم ءسوزىن قوعامدىق مىنبەگە كوتەرىپ، اتا- بابالارىمىزدىڭ ايبىندى رۋحىن قايىرا اتقا قوندىردى. ۇرپاق ساناسىن تاربيەلەدى. كەلەشەككە ءوزىنىڭ ىشكى بۇكىل ايتارىن ايتىپ وتكەن سيرەكتەرىمىزدىڭ ءبىرى بولدى، شەراعام!

سوڭىنان ەرگەن ءىنىسى، قالامداسى ءھام زامانداسى رەتىندە ءدال وسىنداي قارالى حاباردى ەستىگەن كەزدە كوكىرەگىمىزگە جاس تولدى. ءبىراق ول كوز جاسى شەراعاڭدى جوقتاۋ عانا ەمەس، ەندى قايتىپ ەلدىگىمىزدىڭ بۇتىندىگىن ويلايتىن ەرلەر سيرەپ كەتپەسە ەكەن دەگەن، شەرحان مۇرتازانىڭ جالعاسى قازاقتىڭ ۇلى توپىراعىندا بولسا ەكەن دەگەن نامىس پەن جىگەردىڭ، قاجىرلى قايراتتىڭ، ىشكى رۋحتىڭ ءسوزى سەكىلدى بولىپ ەلەستەيدى.

شەرحان اعا ماعان كەيدە اقبوز اتقا شىرەنە قونىپ، قولىنا اق نايزاسىن ۇستاپ، بەلىنە اي قىلىشىن بايلاپ كەلە جاتقان باياعىنىڭ باتىرلارىن ەلەستەتۋشى ەدى. ول كىسىنىڭ ءاربىر قيمىلى، ءاربىر ءسوزى بىزگە قامشى بولدى. كوپ ۋاقىت بويى ءوزىنىڭ سول بيىگىنەن تۇسكەن جوق. تەك سوڭعى كەزدەردە عانا دەنساۋلىعى سىر بەرىپ، سىرقاتقا بوي الدىردى.

سونىڭ وزىندە اجالدى قاباعىمەن ۇركىتىپ وتىردى. اجالدىڭ ءوزىن جانىنا جاقىن جىبەرگىسى كەلمەي، جۇدىرىعىن ءتۇيىپ، قازاقتىڭ جوعىن جوقتاپ جاتقانداي كورىنەتىن سول كەزدە... ءبىز سونداي تۇلعادان ايىرىلىپ وتىرمىز!.. قازاققا شەرحان سەكىلدى تۇلعا كەرەك كەز ەندى كەلگەن سياقتى دەپ ويلايمىن. شەراعاڭ شىن مانىندە ءوزىنىڭ اڭىزى مەن اقيقاتى ارقىلى ۇلىلارىمىزدىڭ ساناتىن بايىتقان ىرىلەردىڭ ءبىرى!.. ءبىز نە دەيمىز، مۇنداي قارالى ءساتتى ۇلى دالانىڭ بايتاعىندا شەرحانىن جوقتاپ جاتقان ۇلكەنگە دە، كىشىگە دە باسۋ ايتامىز. جاتقان جەرىڭ جايلى بولسىن، اعا! قازاق ادەبيەتىنىڭ قاسيەتتى كەڭىستىگىندە شەرحان مۇرتازانىڭ ءوز بيىگى بار! سول بيىكتەن ول بىزگە اڭىزدىڭ اقىرىنداي بولىپ اقيقاتتانىپ بارادى!

قوش، اڭىزدىڭ اقىرعى تۇياعى!

نۇرلان ورازالين

 

اردا تۋعان ازاماتىمىزدان ايىرىلدىق

 

تاعى دا ءبىر عۇلامامىزدان، ەلىمىزدىڭ جۇلدىزدى جازۋشىسى شەرحان اعامىزدان ايىرىلدىق.

ءومىر دەگەن وسى، اقىرىن جىلجىپ ءوتىپ جاتىر. حالقىنا ەرەكشە ادىلدىگىمەن، ايرىقشا ۇستامدىلىعىمەن، بىلگىرلىگىمەن تانىلدى. قانداي قىزمەتتە بولسىن، تالاپشىلدىعىمەن، وزىق ويلى ىسكەرلىگىمەن ۇجىمىن العا سۇيرەدى. جازۋشى-جۋرناليست رەتىندە عانا ەمەس، قوعام قايراتكەرى رەتىندە دە ەلىمىزدىڭ دامۋىنا زور ۇلەس قوستى.

اللا الدىنان جارىلقاسىن، ەلى، جۇرتى امان بولسىن دەپ تىلەيمىن.

اياگۇل ميرازوۆا

 

شولپان جۇلدىزعا جول تارتتى كوكە!

 

ءوزىڭىز وزگەشەلەپ جازعانداي، پاريجدە بولدىڭىز - پاريج تۇسىڭىزگە كىرمەدى. مىسىردا بولدىڭىز - مىسىر تۇسىڭىزگە كىرمەدى. قىتاي، موڭعولستان، ءۇندىستان، پاكىستان، يراندا... بەس جىل وقىعان ماسكەۋدە... تۇسىڭىزگە كۇن سايىن مىڭبۇلاق كىردى. تۇسىڭىزدە ىلعي اقسۋ-جاباعىلىنى كورەتىنسىز.

مەن ءسىزدى جاقىندا، تۋعان كۇنىڭىزدە تۇسىمدە كورىپ ەم... تاۋ پىستەلى اۋىلىنداعى ءمارمار تاسقا قاراپ تۇر ەكەنسىز. وندا: «شەرحان مۇرتازا مەن ناسىر فازىل باستاعان جازۋشىلار باۋدىڭ نەگىزىن 1995 -جىلى قالاعان» دەپ جازىلعان عوي.

سول قىزىلكۇرەڭ ءمارمار تاسقا قاراعان كۇيىڭىزدە: «مەنى شولپان جۇلدىز، تاڭعاجايىپ تاڭشولپان شاقىرىپ جاتىر عوي...» دەدىڭىز كۇبىرلەپ. «اسىقپاساڭىزشى، اعا...» دەگەندەيمىن. الايدا ءوز داۋسىمدى ءوزىم ەستىمەيمىن، ءسىز دە ەستىمەدىڭىز.

ال بۇگىن...

ادەبيەت الەمىندەگى قازاق جۋرناليستيكاسىنداعى مۇرتازانىڭ مۇنارالارى مۇنتازداي مۇزارتتار مانزەلدەس. شەراعاڭ ءومىر بويى ورگە ءجۇزىپ، قازاق قامى، الاش ابىرويى ءۇشىن جان كۇيدىرە جۇمىس ىستەدى.

شەراعاڭ - ۇلت تاربيەشىسى. شىعارمالارى دا! ءۇش- ءتورت جىلداي ءسىز ءولىم مەن ءومىردىڭ اراسىنداعى اراساتتا ارپالىستىڭىز، اعا! ارىستىڭ اتى - ارىس! بارىستىڭ اتى - بارىس! ءسىزدىڭ ميىڭىزدا، جان- جۇرەگىڭىزدە بىلايعىلارعا بىلىنبەس الاپاتتار ءجۇرىپ جاتتى. بارىس سەكىلدى بيىكتە قىڭق ەتپەس قىلىق تانىتىپ، جاراڭىزدى جالاپ، جازىپ، ءۇن- ءتۇنسىز تىرشىلىك كەشتىڭىز. شەراعاڭ شولپان جۇلدىزعا جول تارتتى.

تەڭبىل تورعايى شىرىلداي ۇشىپ، شىعانداي باستاپ بارادى. ۇلى پايعامبارىمىزدىڭ ۋحۋد تاۋىنداي كورەتىن ءتاڭىرتاۋىڭىزدىڭ، مىڭبۇلاعىڭىزدىڭ، اقسۋ- جاباعىلىڭىزدىڭ باۋرايىندا ءتانىڭىز تىنشۋ تابار. ال اسىل جانىڭىز تاڭشولپاننىڭ نۇرىنا ۇلاسار، كوكە.. .

مارحابات بايعۇت

 

باسپا ءسوزىمىزدىڭ باتىر باۋىرجانى ەدى

 

«ەكى كەنەن تۋمايدى، الاتاۋعا ەكسەڭ دە» دەگەن اقىن ءسوزىن شەراعاڭا دا ايتۋعا بولادى. ارينە قازاق باردا شەرحاندار تۋار، ءبىراق ولار شەرحان مۇرتازا بولمايدى. ءباسپاسوزىمىزدىڭ بىرنەشە بۋىنىن تاربيەلەپ وسىرگەن تۇلعانى «رەداكتورلاردىڭ رەداكتورى» دەپ بەكەر اتاعان جوق. بۇل كىسىنىڭ عاجاپتىعى - ءوزىنىڭ ايتقانىن ىستەگەن ادام. قالامى تيگەن قاعازدىڭ، قولى تيگەن گازەتتىڭ ءبارى كوركەيىپ شىعا كەلەتىن. ءتىپتى تەليەۆيدەنيەنىڭ وزىنە بارعان كەزدە دە قالاي قۇلپىرتىپ جىبەردى! تالانتتىڭ اتى، دارىننىڭ زاتى قانداي! بۇل - مىنەز.

ءبىلىم ءوز الدىنا، قۇداي تاعالا بەرگەن دارىندى، ءبىلىمدى ىسكە اسىرۋ ءۇشىن مىنەز قاجەت. «قازاقتىڭ شولوحوۆى، چەحوۆى» دەپ اتاۋ ءبىر كەزدە سانگە اينالعان ەدى. ونى ەندى قويىپ، ءوز ارامىزدان تاۋىپ ايتۋ كەرەك. ەگەر سولاي ايتاتىن بولساق، شەراعاڭ باسپا ءسوزىمىزدىڭ باۋىرجانى بولدى.

«ەگەمەنگە» شاقىرىپ، جولىمىزدى اشتى. سولقىلداماي تۋراسىن ايتاتىن قاسيەتىنىڭ ارقاسىندا ءبىز دە باتىل جازاتىن بولدىق. ءبىزدىڭ جازعان ماتەريالدارىمىزعا جوعارىدان ءدۇمپۋ كەلىپ جاتسا، ول كىسى ءبىزدى قورعايتىن. بىزگە پانا بولدى. سونى سەزىنىپ، ودان ءارى باتىل، وتكىر جازۋعا تالپىندىق. «ەگەمەن قازاقستانعا» كەلگەندە گازەتتى ەرەكشە وزگەرتتى. بەت جاسالىپ الدىنا كەلگەندە، ەركىنشە بۇزىپ، سۇيەكتى ماتەريالدار سالعىزاتىن. سونىڭ ارقاسىندا باسىلىم ورلەدى، تۇرلەندى، بۇگىنگى بيىگىنە جەتتى.

ەندى شەراعاڭداي تۇلعا قازاق رۋحانياتىنا انە- مىنە كەپ قالارداي ەلەڭدەيتىن بولامىز! باقۇل بول، اياۋلى اعا، ارداقتى ۇستاز!

قالي سارسەنباي

 

الداسپانداي جارقىلداعان سايىپقىران

 

قازاق رۋحانياتى ورنى تولماس قايعىعا ۇشىرادى. 86 جاسىندا حالىق جازۋشىسى شەرحان مۇرتازا ومىردەن ءوتتى. قازاق باسپا ءسوزىنىڭ وركەندەپ، قانات جايۋىنا ايرىقشا ۇلەس قوسقان قالامگەر 1932 -جىلى 28 -قىركۇيەكتە جامبىل وبلىسى، جۋالى اۋدانى، مىڭبۇلاق اۋىلىندا دۇنيە ەسىگىن اشقان.

ءار جىلدارى شەرحان مۇرتازا تىزگىنىن ۇستاعان باسىلىم ەرەكشە كوركەيىپ، وقىرمانداردىڭ ىستىق ىقىلاسىنا يە بولىپ وتىردى.

1989-1992 -جىلدارى «ەگەمەن قازاقستان» گازەتىنىڭ باس رەداكتورى، 1992-1994 -جىلدارى قازاقستان رەسپۋبليكاسى مەملەكەتتىك تەلەراديو كومپانياسىنىڭ ءتوراعاسى بولىپ جەمىستى قىزمەت ىستەدى. تاۋەلسىزدىكتىڭ ەلەڭ- الاڭ شاعىندا قازاق باسپا ءسوزىنىڭ نەگىزگى دىڭگەكتەرىن باسقارىپ، ونىڭ نىعايۋىنا ەرەن ەڭبەك ءسىڭىردى. وزەكتى ماسەلەلەردى وتكىر ايتىپ، قازاق ءسوزىنىڭ ايبارىنا اينالدى. 12- جانە 13-شاقىرىلىمداعى جوعارعى كەڭەستىڭ، 2-شاقىرىلعان پارلامەنت ءماجىلىسىنىڭ دەپۋتاتى بولدى. قازاق ادەبيەتىنىڭ، جۋرناليستيكاسىنىڭ عانا ەمەس، يدەولوگياسىنىڭ قالىپتاسۋىنا زور ۇلەس قوستى. ول تۋرالى كەزىندە ءابىش كەكىلباي ۇلى «الداسپانداي جارقىلداعان سايىپقىران شەشەندەردىڭ ءبىرى» دەپ باعاسىن بەرىپ ەدى.

ەل گازەتى «ەگەمەننىڭ» بۇگىنگى جەتكەن جەتىستىگىندە دە شەرحان مۇرتازانىڭ سىڭىرگەن ەڭبەگى ەرەكشە. وسى باسىلىمنىڭ كوركەيۋىنە قوسقان ۇلەسىن ءبىز ەشقاشان ۇمىتپايمىز. شەرحان مۇرتازانىڭ الدىن كورگەن اعا بۋىن سول ونەگە- ۇلگىنى كەيىنگى جاستارعا اماناتتاپ تاپسىرىپ كەلەدى.

شەراعانىڭ شەكپەنىنەن شىققانداردىڭ الاقان جىلۋىن كورگەندەر دە شەراعانىڭ شەبەرحاناسىنان شىققاندار بوپ ەسەپتەلەدى. شەراعادان قالعان جىلىلىق پەن ازاماتتىق ەل يگىلىگى ءۇشىن قىزمەت ەتۋدە ءبىزدى العا جەتەلەي بەرەدى.

باقۇل بولىڭىز دۇنيەدەن دۇركىرەپ وتكەن شەراعا!

ەگەمەن قازاقستاندىقتار

 

سوڭعى جاڭالىقتار