قاسىم-جومارت توقايەۆ: ءدىني ليدەرلەر كەڭەسى پرەزيدەنتتىڭ ادەپ كودەكسىن نەگىزگە الۋى كەرەك
«تۇتاستاي العاندا ءدىنارالىق قاتىناستاردىڭ قارقىندى دامۋى - سەز جانە ونىڭ قىزمەتىنىڭ باستى جەتىستىگى. اتاپ ايتقاندا، فورۋم ءدىنارالىق ءسامميتتىڭ نەگىزگى قاتىسۋشىلارىنىڭ بىرلەسىپ ءىس-قيمىل جاساۋ كەزىندە بولاتىن ماسەلەلەرگە قاتىستى ورتاق كوزقاراسىن قالىپتاستىرادى. سىزدەردىڭ قوعام الدىنداعى يگى قىزمەتتەرىڭىزدىڭ ارقاسىندا رۋحاني الەم مەن ءدىني داستۇرلەر قالىڭ جۇرتشىلىققا كەڭىنەن تارالۋدا»، - دەدى سەنات ءتوراعاسى.
قاسىم-جومارت توقايەۆ قازىرگى تاڭدا استانا - الەمدەگى ءارتۇرلى ءدىن وكىلدەرىن ءبىر ۇستەل باسىندا باسىن قوسىپ، زاماننىڭ وتكىر ماسەلەلەرىن تالقىلاي الاتىن ورىن ەكەنىن اتاپ ءوتتى.
«تاريحتىڭ جاڭا دامۋ داۋىرىندە، گەوساياسي، قۇقىقتىق، حالىقارالىق جانە يدەولوگيالىق ولشەمى بار جاڭا ساياسي كەزەڭدە ءبىزدىڭ كەڭەس جۇمىسىنىڭ مازمۇنىن بايىتا ءتۇسۋ ماڭىزدى. سيريالىق قاقتىعىس، ءدىندارلاردىڭ جاپپاي ءولتىرىلۋى، الەمدىك مۇرا بولىپ تابىلاتىن ءدىني نىساندار مەن ەسكەرتكىشتەردىڭ، كۋلتتى قۇرىلىمداردىڭ قۇرتىلۋى - جاھاندىق تۇراقتىلىق پەن قاۋىپسىزدىكتىڭ الدىنداعى جاڭا سىن- تەگەۋرىن بولىپ وتىر. كەز كەلگەن مەملەكەتتىڭ اۋماقتىق تۇتاستىعى مەن ساياسي تاۋەلسىزدىگىنە قاتىستى كۇش قولدانۋعا تىيىم سالاتىن بۇۇ- نىڭ جارعىسى ەسكەرىلمەي جاتىر. وسىناۋ كۇردەلى ءارى ۇرەيلى پروتسەستەردىڭ اياسىندا الەمدىك جانە ءداستۇرلى ءدىن وكىلدەرىنىڭ باسىن قوسقان استانا سەزى - ەسكىرگەن ماسەلەلەردى شەشۋ جولىندا ءتيىمدى قۇرال بولا ءبىلۋى كەرەك»، - دەدى قاسىم-جومارت توقايەۆ.
سەنات ءتوراعاسى ءوز سوزىندە بىرىنشىدەن، تەرروريزمنىڭ الدىن الۋ ءۇشىن الەمدىك بىرلەستىكتەر ايتۋلى شارالاردى قابىلداپ جاتقانىمەن، تەرروريزم ءدىننىڭ اتىن جامىلىپ، ارام پيعىلدى ىستەرىن جالعاستىرىپ جاتقانىن ايتىپ ءوتتى.
«ەكىنشىدەن، حالىقارالىق تەرروريزم مەن زورلىق- زومبىلىق ەكسترەميزمى بۇگىنگى تاڭدا جاھاندىق قاۋىپسىزدىك ءۇشىن اسا كۇردەلى سىن- تەگەۋرىندەردىڭ ءبىرى بولىپ قالىپ وتىر. ءدىني ليدەرلەر كەڭەسى الەمدىك ساياسي كوشباسشىلارعا ىقپال ەتە وتىرىپ، الەمدىك ساياساتتاعى قاراما- قايشىلىقتى رەتتەي الار ەدى.
ۇشىنشىدەن، ب ۇ ۇ باس اسسامبلەياسىنىڭ 70-سەسسياسىندا قازاقستان پرەزيدەنتى جاھاندىق تەرروريزمگە قارسى كواليتسياسىن بەكىتۋ تۋرالى ايتقان بولاتىن.
بۇل كواليتسيانى قۇرۋعا نەگىز رەتىندە مەملەكەت باسشىسى تەرروريزمنەن ەركىن الەمگە قول جەتكىزۋ ءۇشىن ادەپ كودەكسىن قۇرۋدى ۇسىنعان. 28 -قىركۇيەك كۇنى بۇۇ باس اسسامبلەياسى وتىرىسىنىڭ سوڭىندا كوپتەگەن مۇشە ەلدەر بۇل قۇجاتقا قوسىلدى. الەمدىك ءدىني جانە ساياسي كوشباسشىلار تەرروريزمنىڭ الدىن الۋ جولىندا ۇسىنىستاردى ازىرلەۋى ءۇشىن ءدىني ليدەرلەر كەڭەسى وسى كودەكستى نەگىز رەتىندە الۋىنا بولار ەدى. مىنە، ءدال وسى شارالارعا سەزارالىق كەزەڭدە سەز حاتشىلىعىنىڭ جۇمىسىن باعىتتاعىمىز كەلەدى. VI سەز قابىلدايتىن بىرلەسكەن دەكلاراتسيا - ءبىز ماقسات تۇتقان باعىتقا جاسالار ماڭىزدى قادام»، - دەدى قاسىم-جومارت توقايەۆ.