قارسى باعىتتا كولىك جۇرگىزىپ ماقتانعان نازار روللان قاماۋعا الىندى
«بوستاندىق اۋداندىق ءى ءى ب پوليتسيا قىزمەتكەرلەرى جول ەرەجەسىن ورەسكەل بۇزىپ، اينالاسىنداعى ادامداردىڭ ومىرىنە قاۋىپ توندىرگەنى ءۇشىن 1998 جىلى تۋعان ن. روللانعا قاتىستى اكىمشىلىك شارا قابىلدادى. ول بۇعان دەيىن ءال-فارابي جانە مۇستافين كوشەلەرىنىڭ بويىنشا جول ءجۇرۋ ءتارتىبىن بۇزىپ، جاۋاپكەرشىلىككە تارتىلعان بولاتىن. ول اكىمشىلىك كودەكستىڭ بەس بابى بويىنشا تارتىپتىك جازاعا تارتىلسا دا، ودان قورىتىندى شىعارعان جوق. بۇگىن الماتى قالاسىنىڭ مامانداندىرىلعان اۋدانارالىق اكىمشىلىك سوتىنىڭ شەشىمىمەن بۇزاقىلىق ءىسى بويىنشا ن. روللان 7 تاۋلىككە قاماۋعا الىندى»، - دەدى سالتانات ازىربەك.
ەسكە سالا كەتسەك، قارسى باعىتقا شىعىپ كولىك ايداعان جۇرگىزۋشىنىڭ ۆيدەوسى الەۋمەتتىك جەلىلەردە كوپشىلىكتىڭ اشۋ-ىزاسىن تۋدىرعانى بەلگىلى.
كەيىن داڭعوي جۇرگىزۋشىنى قالالىق پوليتسيا ۇستاپ، شارا قولدانعان.
الماتى قالاسىنىڭ ءال-فارابي كوشەسىندە جول ەرەجەسىن ورەسكەل بۇزعان 20 جاستاعى جىگىت ءوزىنىڭ ىستەگەن ىسىنە وكىنەتىندىگىن ايتىپ ۆيدەو جاريالاعان ەدى.
