اكىمدىككە كولىگىمەن «كىرگەن» اقتوبەلىك ءۇش ميلليون تەڭگە ايىپپۇل تولەيدى

None
None
اقتوبە. قازاقپارات - اقتوبەلىك كاسىپكەر باۋىرجان اناپين اكىمدىككە كولىگىمەن «كىرگەنى» ءۇشىن ايىپپۇل تولەيدى، دەپ حابارلايدى قازاقپارات ءتىلشىسى.

وبلىس اكىمدىگى ىستەرىنىڭ باسقارماسى مەن اقتوبە وبلىسى اكىمىنىڭ اپپاراتى قالالىق سوتقا ازاماتتىق شاعىم ءتۇسىردى. ءىس ماتەريالىنا سۇيەنسەك، 2018 -جىلى 12 -مامىردا ساعات 12:10-دا اقتوبەلىك «Nissan Patrol» كولىگىمەن اكىمدىككە كىرىپ باردى. سول كەزدە قىزمەتتىك كولىكتى دە زاقىمداعان. اقتوبە وبلىستىق مامانداندىرىلعان اۋدانارالىق سوتىنىڭ شەشىمىمەن ب. اناپين اكىمشىلىك قۇقىقبۇزۋشىلىق كودەكسىنىڭ 608-بابى بويىنشا ايىپتى دەپ تانىلىپ، 5 جىلعا كولىك جۇرگىزۋ قۇقىعىنان ايىرىلدى.

ال اكىمدىك زاقىمدالعان كولىك شىعىنىن 757 مىڭ تەڭگە، ال كىرە بەرىس ەسىكتىڭ شىعىنىن 2 ميلليون 505 مىڭ تەڭگەگە باعالادى. ازاماتتىق ارىزدى قاراعان اقتوبە قالالىق سوتى باۋىرجان اناپيننەن 3262981 تەڭگە وندىرۋگە شەشىم شىعاردى.

ەسكە سالساق، 2018 -جىلدىڭ مامىر ايىندا اقتوبەلىك اكىمدىككە كولىگىمەن «كىرىپ» كەتتى. ونىڭ ماس كۇيىندە كولىك جۇرگىزگەنى بەلگىلى بولدى. اكىمشىلىك قۇقىقبۇزۋشىلىق كودەكسىنىڭ «ۇساق بۇزاقىلىق» بابى بويىنشا ايىپتالىپ، 10 كۇنگە قامالدى.

سوڭعى جاڭالىقتار