پاراسپورتشى ءزۇلفيا عابيدۋللينا قازاقستانعا ءۇشىنشى «التىن» سىيلادى

 استانا. قازاقپارات - يندونەزيادا ءوتىپ جاتقان پارا ازيا ويىندارىندا قازاقستان قورجىنى تاعى ءبىر التىن مەدالمەن تولىقتى، دەپ حابارلايدى قازاقپارات ءتىلشىسى.

ق ر ۇلتتىق پاراليمپيادا كوميتەتىنىڭ باسپا ءسوز قىزمەتىنەن ءمالىم ەتكەندەي، جۇزۋدەن حالىقارالىق ساناتتاعى سپورت شەبەرى ءزۇلفيا عابيدۋللينا پارا ازيا ويىندارىندا 100 مەترگە ەركىن جۇزۋدەن التىن مەدال يەلەندى. ايتا كەتەيىك، ءزۇلفيا عابيدۋللينا 2016 -جىلى ريو- دە- جانەيرودا وتكەن پاراليمپيادا ويىندارىندا تاۋەلسىز قازاقستاننىڭ پاراليمپيادا تاريحىنداعى العاشقى التىن مەدالىن يەلەنگەن بولاتىن.

 وسىلايشا، بۇگىن پاراسپورتشىلارىمىز 3 التىن جۇلدە الدى. بۇعان دەيىن حابارلاعانىمىزداي، العاشقى قوس التىندى 50 مەترگە پارا جۇزۋدەن (باتتەرفلياي ادىسىمەن) سيازبەك داليەۆ پەن 100 مەترگە ەركىن جۇزۋدەن ەرجان سالىمگەرەيەۆ قانجىعالارىنا بايلاعان بولاتىن.

 وسى ۋاقىتتا قازاقستان قورجىنىندا بارلىعى 12 مەدال بار: 3 التىن، 4 كۇمىس جانە 5 قولا جۇلدە.

ەسكە سالايىق، وسى كۇندەرى يندونەزيانىڭ جاكارتا قالاسىندا پارا ازيا ويىندارى وتۋدە. پاراليمپياداشىلاردىڭ بايراقتى باسەكەسى 18 - قازان كۇنى اياقتالادى. ەل نامىسىن قورعاۋعا 91 سپورتشىمىز اتتاندى. ولار سپورتتىڭ 9 تۇرىنەن (ۇستەل تەننيسى، پارادزيۋدو، ءپاراجۇزۋ، وقپەن اتۋ، پاراپاۋەرليفتينگ، ساداقپەن اتۋ، شاحمات، پارا جەڭىل اتلەتيكا، ۆولەيبولدى وتىرىپ ويناۋ) سىنعا تۇسۋدە.

ءبىرىنشى ورىن يەلەنگەن سپورتشىعا - 10 مىڭ دوللار، ەكىنشى ورىن ءۇشىن - 5 مىڭ دوللار جانە ءۇشىنشى ورىنعا - 3 مىڭ دوللار كولەمىندە سىياقى بەلگىلەنگەن.

بۇعان دەيىنگى پارا ازيا ويىندارىنا سپورتتىڭ 9 تۇرىنەن 82 پاراسپورتشىمىز قاتىسىپ، 7 «التىن» مەدال يەلەنگەن بولاتىن.