مەكتەپتە اقشا جيناۋدى اتا- انالار كوميتەتى ۇيىمداستىرادى- اگەنتتىك

 استانا. قازاقپارات - مەكتەپتەردە اقشا جيناۋ شارالارىن نەگىزىنەن اتا- انالار كوميتەتى ۇيىمداستىرادى.

بۇل تۋرالى استانادا وتكەن بريفينگتە ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس- قيمىل اگەنتتىگىنىڭ استانا قالاسى بويىنشا دەپارتامەنت باسشىسى جازيرا جىلقىشيەۆا ءمالىم ەتتى، دەپ حابارلايدى قازاقپارات ءتىلشىسى.

«مەملەكەت باسشىسىنىڭ «قازاقستاندىقتاردىڭ ءال- اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا سىبايلاس جەمقورلىققا قارسى بەلسەندى كۇرەس جۇرگىزۋ قاجەتتىگىن اتاپ ءوتتى. پرەزيدەنت مەملەكەتتىك كورسەتىلەتىن قىزمەت شەڭبەرىندە مەملەكەتتىك قىزمەتشىلەردىڭ حالىقپەن تىكەلەي بايلانىسىن قىسقارتۋ جونىندە ودان ءارى شارالار قابىلداۋدى، ءبىرىنشى باسشىلاردىڭ جەكە جاۋاپكەرشىلىگىن ارتتىرۋ ماسەلەسى بويىنشا جۇمىستار اتقارۋدى تاپسىردى. سونداي- اق، مەملەكەت باسشىسى «سىبايلاس جەمقورلىقتان ادا وڭىرلەر» جوبالارى اياسىندا ەلوردانىڭ جەمقورلىققا قارسى ستراتەگيانى جۇزەگە اسىرۋ جونىندەگى تاجىريبەسىن تاراتۋ تۋرالى تاپسىرما بەردى. استانادا اقپان ايىنان باستاپ اگەنتتىكتىڭ اكىمدىكپەن بىرلەسكەن «استانا - ادالدىق الاڭى» جوباسى جۇزەگە اسىرىلۋدا. جوبا - تۇرمىستىق جەمقورلىقتى جويۋعا جانە ازاماتتارعا قولايلى جاعداي جاساۋعا باعىتتالعان» ، - دەپ توقتالدى جىلقىشيەۆا.

مەملەكەت باسشىسى اتاپ وتكەندەي، ءبىلىم بەرۋ جۇيەسىندە جەمقورلىق تاۋەكەلدەرىن تومەندەتۋ بويىنشا جۇمىستار اتقارىلدى.

«سوڭعى 4 ايدا ءبىلىم باسقارماسىنىڭ جانە ونىڭ باعىنىستى ۇيىمدارىنىڭ قىزمەتىنە تالداۋ جۇرگىزىلدى. وعان سىبايلاس جەمقورلىق تاۋەكەلدەرىنىڭ، «جاسىرىن» مەملەكەتتىك قىزمەتتەردىڭ، نورماتيۆتىك قۇقىقتىق اكتىلەردەگى جانە اكىمشىلىك كەدەرگىلەردەگى قايشىلىقتاردىڭ بولۋى سەبەپ بولدى. جوبا قوعامدىق ۇيىمدارمەن بىرلەسىپ وقۋشىلاردىڭ اتا- انالارى اراسىندا الەۋمەتتىك ساۋالناما جۇرگىزدى. ساۋالناما ناتيجەسى ءبىلىم بەرۋ مەكەمەلەرىندە مەكتەپتىڭ نەمەسە سىنىپتىڭ قوسىمشا قاجەتتىلىكتەرى ءۇشىن ءجيى اقشا جينالاتىندىعىن كورسەتتى. نەگىزىنەن قاراجات جيناۋ «اتا- انالار كوميتەتى» ارقىلى جۇزەگە اسىرىلادى» ، - دەيدى دەپارتامەنت باسشىسى.

وسى ورايدا، جوبا كەڭسەسى ق ر ءبىلىم جانە عىلىم مينيسترلىگىنە اتا- انالار كوميتەتىنە تىيىم سالۋ جونىندە ۇسىنىس ەنگىزىلگەن.

«اتا- انالار كوميتەتىنىڭ قىزمەتى رەگلامەنتتەلمەگەن جانە تۇرمىستىق جەمقورلىقتىڭ تۋىنداۋىنا سەبەپ بولادى. ءبىلىم بەرۋ مەكەمەلەرىنىڭ ازاماتتارمەن ءوزارا ارەكەتتەسۋىنىڭ كەز- كەلگەن ءتارتىبى نورماتيۆتىك قۇقىقتىق اكتىلەرمەن رەتتەلەدى. قابىلداۋ، اۋىسۋ، گرانتتار ءبولۋ، جاتاقحاناداعى ورىنداردى انىقتاۋ جانە باسقا دا بارلىق وسىنداي پروتسەستەر ءتيىستى نورماتيۆتىك قۇقىقتىق اكتىلەردە انىق كورسەتىلگەن» ، - دەدى جازيرا جىلقىشيەۆا.