الەكساندر ۆۋچيچ نۇرسۇلتان نازاربايەۆتى سەربياعا شاقىردى
«ءبىز ەڭ جوعارى دەڭگەيدەگى كەزدەسۋ تاجىريبەمىزدى جالعاستىرا بەرەمىز دەپ ءۇمىت ارتامىن. جانە دە جاقىن ارادا سەربياعا ساپارلاپ كەلسەڭىز ءبىز ءۇشىن ۇلكەن قۇرمەت بولار ەدى» ، - دەدى الەكساندر ۆيچۋچ اقورداداعى كەلىسسوزدەردەن كەيىنگى بىرلەسكەن مالىمدەمە بارىسىندا قازاقستان پرەزيدەنتىنە قاراتا.
سونىمەن قاتار سەربيا پرەزيدەنتى نۇرسۇلتان نازاربايەۆقا حالىقارالىق دەڭگەيدەگى كوپتەگەن ماسەلەدە قولداۋ كورسەتكەنى ءۇشىن شىنايى ريزاشىلىعىن ءبىلدىرىپ، ەكىجاقتى بايلانىستاردىڭ ودان ارى كەڭەيە تۇسەتىندىگىنە سەنىمدى ەكەندىگىن اتاپ ءوتتى.
«الداعى ۋاقىتتا ىنتىماقتاستىعىمىزدى نىعايتا ءتۇسىپ، تاۋار اينالىمىمىزدى ارتتىراتىندىعىمىزعا سەنىمدىمىن. ويتكەنى، وعان ءالى پايدالانىلماعان الەۋەتتىڭ جاقسى ىرگەتاسى بار. سىزدەر تاياۋ ارادا بەلگرادتا قازاقستان ەلشىلىگىن اشساڭىزدار، قۋانىشتى بولار ەدىك. بۇل ءبىزدىڭ ۇلكەن ءوتىنىشىمىز» ، - دەدى سەربيا پرەزيدەنتى.
ايتا كەتەيىك، سەربيا باسشىسى قازاقستان پرەزيدەنتى نۇرسۇلتان نازاربايەۆتىڭ شاقىرۋىمەن رەسمي ساپارمەن كەلىپ وتىر. بۇگىن مارتەبەلى مەيمان اقوردادا ەلباسىمەن كەزدەسۋ وتكىزدى.
كەزدەسۋ بارىسىندا نۇرسۇلتان نازاربايەۆ سەربيا پرەزيدەنتىن «دوستىق» وردەنىمەن ماراپاتتادى.
ال الەكساندر ۆۋچيچ قازاقستان پرەزيدەنتىنە ءوز ەلىنىڭ ەڭ جوعارى ناگراداسى «سەربيا رەسپۋبليكاسى» وردەنىن تابىس ەتتى.
ساپار اياسىندا الەكساندر ۆۋچيچ قازاقستان- سەربيا ىسكەرلىك فورۋمىنا، الەمدىك جانە ءداستۇرلى دىندەر كوشباسشىلارىنىڭ VI سەزىنىڭ اشىلۋىنا قاتىسادى دەپ جوسپارلانعان.
سەربيا پرەزيدەنتىنىڭ ساپارى بارىسىندا ءبىرقاتار ماڭىزدى قۇجاتتارعا قول قويىلماق. ونىڭ ىشىندە قازاقستان مەن سەربيا ۇكىمەتتەرى اراسىنداعى قىلمىسقا قارسى كۇرەستەگى ىنتىماقتاستىق تۋرالى كەلىسىم، سونداي- اق قازاقستاننىڭ قوعامدىق دامۋ مينيسترلىگى مەن سەربيانىڭ جاستار ساياساتى جانە سپورت مينيسترلىگى اراسىنداعى ءوزارا تۇسىنىستىك تۋرالى مەموراندۋم بار.
سونداي- اق سەربيا باسشىسى ەلباسى نۇرسۇلتان نازاربايەۆتان بەلگرادتا قازاقستان ەلشىلىگىن اشۋدى ءوتىندى.