وسكار سىيلىعىنا ۇمىتكەرلەر تىزىمىنە «ايكا» فيلمى ەندى

استانا. قازاقپارات - رەجيسسەر سەرگەي دۆورسەۆويدىڭ «ايكا» فيلمى «وسكار» سىيلىعىنا ۇمىتكەرلەر تىزىمىنە ەنىپ، «ۇزدىك شەتەلدىك فيلم» نوميناتسياسىنا ۇسىنىلعان، دەپ حابارلايدى قازاقپارات ءتىلشىسى وسكار سىيلىعىنىڭ سايتىنا سىلتەمە جاساپ.

«وسكار» كينوسىيلىعىنىڭ «ۇزدىك شەتەلدىك فيلم» نوميناتسياسىنا 87 ەلدىڭ كينوسى ۇسىنىلعان. بۇل تىزىمگە سونداي-اق، كونستانتين حابەنسكيدىڭ «سوبيبور» كارتيناسى، بەلارۋس رەجيسسەرى داريا جۋكتىڭ «كريستالنىي لەبەد» فيلمى كىرگەن.

«ۇزدىك شەتەلدىك فيلم» ساناتىنداعى سىيلىققا ۇمىتكەرلەردىڭ قورىتىندى ءتىزىمى 2019 -جىلدىڭ 22 -قاڭتارىندا جاريالانادى. «وسكار» سىيلىعىن تابىس ەتۋ ءراسىمى 24 -اقپاندا وتەدى.

ەسكە سالايىق، بۇعان دەيىن امەريكا كينەماتوگرافيالىق ونەر جانە عىلىم اكادەمياسى «وسكار» سىيلىعىنىڭ ديرەكسياسى قازاقستانعا «ايكا» فيلمىن ۇسىنۋعا رۇقسات بەرمەگەن ەدى. بۇل ماسەلەدە حالىقارالىق تالاپتار ءوز ىقپالىن تيگىزگەن، ياعني فيلمدەگى اكتەرلاردىڭ 50 پايىزدان كوبى ءوندىرۋشى ەلدىڭ ازاماتتىعىندا بولۋى ءتيىس.