جىكشىل توپتار ساۋاتى تومەن ادامداردى پايدالانادى - توقايەۆ

استانا. قازاقپارات - استانادا الەمدىك جانە ءداستۇرلى دىندەر ليدەرلەرىنىڭ سەزى حاتشىلىعىنىڭ كەزەكتى وتىرىسى باستالدى.

اتالعان جيىن وسىمەن 17-رەت ءوتىپ وتىر. وندا سەزگە دايىندىق جۇمىستارى پىسىقتالادى، دەپ حابارلايدى قازاقپارات ءتىلشىسى.

وتىرىستى اشقان ق ر پارلامەنت سەناتىنىڭ ءتوراعاسى، حاتشىلىقتىڭ جەتەكشىسى قاسىم-جومارت توقايەۆتىڭ ايتۋىنشا، ءدىن ادامزات تاريحىنىڭ قاي كەزەڭىندە بولماسىن، ساياسات پەن حالىقارالىق قاتىناستاردىڭ اجىراماس بولىگى بولىپ قالا بەرەدى. XXI عاسىردا كەڭ اۋقىمدى ماتەريالدىق، عىلىمي- تەحنيكالىق جانە زياتكەرلىك مۇكىندىكتەرگە قاراماستان، رۋحاني دامۋ - ساياسي- ەكونوميكالىق، الەۋمەتتىك جانە مادەني ءومىردىڭ بارلىق سالالارىنا ورتاق ماسەلە.

«سوڭعى ۋاقىتتا الەمدەگى گەوساياسي جانە گەوەكونوميكالىق جاعداي تۇبەگەيلى وزگەرىستەرگە ۇشىرادى. بۇل وزگەرىستەردىڭ ناتيجەسىندە الەۋمەتتىك تەڭسىزدىك، ەتنوسارالىق جانە ءدىنارالىق توزبەۋشىلىك سياقتى وتكىر ماسەلەلەر ۋشىعا ءتۇستى. ءتۇرلى ءدىني سەنىمدەردى ءبىر- بىرىنە قارسى قويۋدىڭ سالدارىنان جانە قۇداي جولىنداعى ىزدەنىستى قالقان ەتكەن تەرىس ارەكەتتەر ناتيجەسىندە شيەلەنىستەر مەن اشىق قاقتىعىستاردىڭ جاڭا وشاقتارى پايدا بولۋدا. جالعان ۇرانداردى جەلەۋ ەتكەن جاساندى ءدىني قۇندىلىقتار تەرروردى ناسيحاتتاۋشىلاردىڭ قىرىپ- جويۋ قارۋىنا اينالدى. مادەني جانە ءدىني ەرەكشەلىكتەردى بۇرمالاپ، الەۋمەتتىك جاعداي مەن ساۋاتى تومەن ادامداردى ءوز مۇددەلەرى ءۇشىن پايدالاناتىن جىكشىل توپتار ءوز جاقتاۋشىلارىن كوزسىز تابىنۋعا ماجبۇرلەپ وتىر»، - دەدى قاسىم-جومارت توقايەۆ وتىرىستىڭ اشىلۋىندا.

حاتشىلىق جەتەكشىسىنىڭ سوزىنە قاراعاندا، بۇقارالىق اقپارات قۇرالدارى دا وزگە ءدىن وكىلدەرىنە توزبەۋشىلىك پەن جەككورۋشىلىكتى ەرىكسىز تاراتۋعا ايتارلىقتاي ىقپال ەتىپ وتىر. سوندىقتان بۇگىندە جاسامپازدىقتى العا تارتاتىن رۋحاني كوشباسشىلاردىڭ ءرولى اسا ماڭىزى. ولار ءدىننىڭ شىنايى بەت- بەينەسىن اشىق كورسەتە الادى.

«وسىنداي كۇردەلى جاعدايدا الەمدىك جانە ءداستۇرلى دىندەر ليدەرلەرىنىڭ ديالوگى مەن كەلىسىمىن ودان ارى ىلگەرىلەتۋ جەر بەتىندەگى ۇزاق مەرزىمدى تۇراقتىلىقتىڭ ماڭىزدى قۇرامداس بولىگى بولىپ تابىلادى. بۇل ورايدا تەڭ قۇقىلى ديالوگ الاڭى رەتىندە الەمدىك جانە ءداستۇرلى دىندەر ليدەرلەرىنىڭ سەزى ءوزىنىڭ ماڭىزدىلىعى مەن قۇندىلىعىن كورسەتىپ وتىر»، - دەپ اتاپ كورسەتتى قاسىم-جومارت توقايەۆ.

ايتا كەتەيىك، استانادا الەمدىك جانە ءداستۇرلى دىندەر ليدەرلەرىنىڭ VI سەزى 10-11 -قازان ارالىعىندا وتەدى. سەزدىڭ اشىلۋىنا سەربيا پرەزيدەنتى الەكساندر ۆۋچيچ پەن ە ق ى ۇ باس حاتشىسى توماس گرەمينگەر قاتىسادى. وتىرىسقا مەملەكەت باسشىسى نۇرسۇلتان نازاربايەۆ ءتوراعالىق ەتەدى.