فرانسيا يران بارلاۋ قىزمەتىنىڭ اكتيۆىن بۇعاتتادى

None
None
استانا. قازاقپارات - فرانسيا تەگەران ارنايى قىزمەتىنىڭ «تەراكت ۇيىمداستىرماق بولعانىنا» جاۋاپ رەتىندە يران بارلاۋىنىڭ ەكى قىزمەتكەرىنىڭ اكتيۆتەرىن بۇعاتتادى.

Reuters اگەنتتىگىنىڭ حابارلاۋىنشا، فرانسۋز پوليتسياسى پاريجدەگى يران وپپوزيتسياسىنا شابۋىل ۇيىمداستىرۋعا يران بيلىگى تاپسىرما بەرگەن دەپ بىلەدى.

تەرگەۋشىلەر يرانمەن بايلانىسى بار ادام 30 - ماۋسىمدا ەميگراتسياداعى وپپوزيتسيالىق ۇيىم - يران ۇلتتىق قارسىلاسۋ كەڭەسىنىڭ قۇرىلتايىندا جارىلىس جاساماق بولدى دەپ توپشىلايدى. ول قۇرىلتايعا ا ق ش پرەزيدەنتى دونالد ترامپتىڭ زاڭگەرى رۋدي دجۋلياني قاتىسقان. بۇل ءىس بويىنشا يران ديپلوماتى مەن بەلگيانىڭ تەگى يراندىق ەكى ازاماتى ۇستالعان. ولاردان قولدان جاسالعان جارىلعىش زاتتار مەن دەتوناتور تاركىلەنگەن.

فرانسيانىڭ جوعارى شەندى شەنەۋنىگى شابۋىلدى پرەزيدەنت حاسسان روۋحانيدىڭ قارسىلاستارى ونىڭ ەۋروپامەن جاسالعان يادرولىق كەلىسىمدى ساقتاپ قالۋ ارەكەتىنە كەدەرگى كەلتىرۋ ءۇشىن دايىنداعان بولۋى مۇمكىن دەپ بولجايدى.

بىرنەشە اپتا بۇرىن فرانسيا بيلىگى ءوز ديپلوماتتارىنا اسا قاجەت بولماسا يرانعا ساپارلاپ بارماۋدى بۇيىرعانى تۋرالى اقپارات تۇسكەن. پاريج يرانعا جاڭا ەلشى تاعايىنداۋدى توقتاتىپ، تەگەراننىڭ فرانسياداعى ەلشى قىزمەتىنە ۇسىنعان كانديداتىنا قاتىستى جاۋاپ بەرمەدى. Reuters- ءتىڭ مالىمەتىنشە، بۇل جاعدايدىڭ تەگەران ءۇشىن سالدارى اۋىر بولۋى ىقتيمال.

فرانسيا، گەرمانيا، ۇلى بريتانيا، رەسەي جانە قىتاي يرانمەن 2015 -جىلى ا ق ش پرەزيدەنتى باراك وباما تۇسىندا يادرولىق كەلىسىم جاساسقان. كەلىسىم تەگەراننىڭ يادرولىق باعدارلاماسىن توقتاتىپ، ەسەسىنە يرانعا سالىنعان حالىقارالىق سانكسيالاردى جويۋى ءتيىس بولعان. بيلىككە كەلگەن ا ق ش پرەزيدەنتى دونالد ترامپ يراندى كەلىسىم تالاپتارىن بۇزدى دەپ ايىپتاپ، بيىل مامىر ايىندا ۆاشينگتوندى كەلىسىمنەن شىعارعان.

بۇدان سوڭ ۆاشينگتون يران مۇنايىن ەكسپورتتاۋعا قاتىستى سانكسيا سالعان. سانكسيا قاراشادان باستاپ كۇشىنە ەنەدى.

ەۋروپا وداعى ەلدەرى، ونىڭ ىشىندە فرانسيا 2015 -جىلى جاسالعان يادرولىق كەلىسىمدى ساقتاپ قالۋدى قولدايدى.

www.azattyq.org

سوڭعى جاڭالىقتار