قىتاي كومپانياسى قازاقستاندا تراكتور قۇراستىراتىن زاۋىت سالماق
اۋىلشارۋاشىلىعى تەحنيكاسىن وندىرەتىن كلاستەر قوستاناي وبلىسىندا شوعىرلانادى. قازاقستان تاراپى بۇگىندە قىتايلىق سەرىكتەستەرىمەن ءتيىستى كەلىسسوز جۇرگىزىپ قويدى. ءبىزدىڭ ەلدە وندىرىلەتىن تراكتورلاردىڭ العاشقى لەگى نارىققا كەلەر جىلى شىعۋى ءتيىس.
YTO - قىتايداعى اۋىلشارۋاشىلىعى مەن قۇرىلىس تەحنيكاسىن وندىرەتىن ەڭ ءىرى كومپانيالاردىڭ ءبىرى. نارىقتاعى باسەكەدە باسىمدىعىن دالەلدەگەن برەند. قىتايلىق ينۆەستورلار قازاق جەرىندەگى بىرلەسكەن جوباعا 30 ميلليون دوللار سالعالى وتىر. بۇل قارجى تراكتور قۇراستىراتىن بولاشاق زاۋىتتىڭ قۇرال- جابدىعىن جاراقتاۋعا جۇمسالادى.
جۋۆەي سزيان، «YTO Group Corporation» باسقارما ءتوراعاسى:
- قازاقستان قازىر ينۆەستيتسيا تارتۋعا بارلىق جاعداي جاساپ وتىر. بۇل جوبانىڭ تابىستى ءارى ءتيىمدى بولاتىنىنا سەنىمدىمىن. ويتكەنى اۋىلشارۋاشىلىعى تەحنيكاسىن ساتاتىن اۋقىمى كەڭ نارىق كورىپ وتىرمىز. بۇل بىزگە ۇلكەن مۇمكىندىك بەرەدى. ونىمدەردى ەۋرازيالىق ەكونوميكالىق وداقتىڭ ەلدەرىنە شىعارامىز. وسىعان دەيىن YTO كومپانياسى قازاقستاندا ديستريبۋتسيا جاساعان. ياعني ءبىزدىڭ ەلدە ءوز وكىلدىگىن اشىپ اۋىلشارۋاشىلىعى تەحنيكالارىن ساتىپ كوردى. بۇل جۇمىستىڭ ناتيجەسى قىتايلىق تراكتورلارعا دەگەن سۇرانىستىڭ جوعارى ەكەنىن كورسەتتى. بۇدان سوڭ كومپانيا تەحنيكانى قازاقستاندا قۇراستىرعان ءتيىمدى دەپ شەشتى.
اندرەي لاۆرەنتيەۆ، «اگرو ماش حولدينگ قازاقستان» ديرەكتورلار كەڭەسىنىڭ مۇشەسى:
- مەنىڭ ويىمشا، بۇل - اۋقىمدى جوبا. اڭگىمە تەك قازاقستان عانا ەمەس، بۇكىل ەۋرازيالىق ەكونوميكالىق وداق جايىندا بولىپ وتىر. ياعني، ءبىزدىڭ قىتايلىق سەرىكتەستەر باسقا نارىققا دا قىزىعۋشىلىق تانىتتى. سوندىقتان جوبا قازاقستاننىڭ قاجەتتىلىگىن عانا قامتاماسىز ەتپەيدى، ونىڭ اۋماعىنان باسقا نارىققا دا شىعارىلماق. مەملەكەت باسشىسى وسى جايىندا ءجيى ايتادى، ۇكىمەت تە بىزگە وسىنداي مىندەتتەر قويادى.
www.24.kz
