تاياۋ ۋاقىتتا كورشى ەلدەرگە بەنزين ەكسپورتتاي باستايمىز - مينيستر
بۇل تۋرالى بۇگىن بۇكىلالەمدىك مۇناي كەڭەسى وتىرىسىندا ەلىمىزدىڭ ەنەرگەتيكا ءمينيسترى قانات بوزىمبايەۆ ايتتى، دەپ حابارلايدى قازاقپارات ءتىلشىسى.
«ەلدى وتاندىق مۇناي ونىمدەرىمەن تولىقتاي قامتاماسىز ەتۋگە جانە يمپورتقا تاۋەلدىلىكتى تومەندەتۋگە ۇمتىلا وتىرىپ، ءبىز اتىراۋ، شىمكەنت جانە پاۆلودار مۇناي وڭدەۋ زاۋىتتارىن جاڭعىرتتىق. جاڭعىرتۋ ناتيجەسىندە جەرگىلىكتى نارىقتى وتاندىق جانارمايمەن 100 پايىز قامتاماسىز ەتۋ مۇمكىنشىلىگىنە قول جەتكىزدىك. زاۋىتتارىمىز ك-4 جانە ك-5 ەكولوگيالىق ستاندارتتارىنا ساي كەلەتىن جانار- جاعارماي ماتەريالدارىن وندىرەتىن بولادى. ەندى مەگاپوليستەر مەن وڭىرلەردىڭ ەكولوگياسىنا جۇكتەمە ازايادى»، - دەدى قانات بوزىمبايەۆ.
ونىڭ ايتۋىنشا، مۇناي ءوندىرۋ مەن مۇناي ونىمدەرى ءوندىرىسى ءوسىمىنىڭ ارقاسىندا ەلىمىزدىڭ ىشكى نارىعىندا جانار- جاعارمايدىڭ ارتىلىپ قالۋ جاعدايى العاش رەت بولىپ وتىر. الداعى ۋاقىتتا كورشى ەلدەرمەن قاجەتتى كەلىسىمشارتتار جاسالعاننان كەيىن ارتىق بەنزين ەكسپورتقا شىعارىلاتىن بولادى.
«تاياۋ ۋاقىتتا سيفرلاندىرۋ اياسىندا اتىراۋ مەن شىمكەنت مۇناي ءوندىرۋ زاۋىتتارىندا تەحنيكالىق قىزمەت كورسەتۋ جانە جابدىقتاردى جوندەۋ جونىندەگى جوبا ەنگىزىلەتىن بولادى. بۇل جۇيە پروفيلاكتيكالىق قاراۋ جانە جوندەۋ جۇمىستارىن باسقارۋعا، سونىمەن قاتار ءموز- دەردى پايدالانۋدىڭ كەمىندە 3 جىلدىق جوندەۋارالىق كەزەڭىنە كوشۋگە مۇمكىندىك بەرەدى»، - دەدى ول.
ءمينيستردىڭ اتاپ وتۋىنشە، اتالعان جوبانىڭ ارقاسىندا جابدىقتاردىڭ سەنىمدىلىگى 8-10 پايىزعا ارتىپ، جوندەۋ جۇمىستارىنا كەتەتىن شىعىندار 10 پايىزعا تومەندەيدى. بۇعان قوسا، كۇردەلى جوندەۋ جۇمىستارىنا توقتاتىلۋدىڭ بولماۋىنا بايلانىستى ورتاشا ەسەپپەن جىلىنا قوسىمشا 300 مىڭ توننا مۇناي وڭدەلەتىن بولادى.
