استانا مەن الماتىدا ەسكى تەحنيكانى وتكىزىپ، جاڭا توڭازىتقىش الۋعا بولادى

استانا. قازاقپارات - استانا مەن الماتىدا ەسكى ەلەكترو- تۇرمىستىق تەحنيكالاردى قابىلداپ، ەنەرگيا ۇنەمدەيتىن جاڭا توڭازىتقىشقا جەڭىلدىك بەرۋ ناۋقانى باستالدى، دەپ حابارلايدى قازاقپارات ءتىلشىسى.

اتالعان ناۋقاندى ب ۇ ۇ دامۋ باعدارلاماسى قازاقستانداعى ەنەرگيا تۇتىنۋ كولەمىن ازايتۋ ماقساتىندا ۇيىمداستىرىپ وتىر. مۇندا ەسكى نەمەسە ىستەن شىققان توڭازىتقىش، ەلەكتر پليتاسى سىندى تۇرمىستىق تەحنيكانى وتكىزگەن تۇرعىندارعا ەنەرگيا ۇنەمدەيتىن جاڭا توڭازىتقىشقا 16500 تەڭگە جەڭىلدىك كۋپونى بەرىلەدى.

«قازاقستاندا ەلەكتر ەنەرگياسىن تۇتىنۋ كولەمى جىلدان-جىلعا ارتىپ كەلەدى. ەلىمىزدەگى ەلەكتر ەنەرگياسىنىڭ قۇرىلىمى كوپ جاعدايدا كومىرگە، قازبالى وتىن تۇرلەرىنە نەگىزدەلەدى جانە سايكەسىنشە اتموسفەراعا پارنيكتىك گازدار كوپ بولىنەدى. ب ۇ ۇ دامۋ باعدارلاماسى اياسىندا ءبىز ەنەرگيا ۇنەمدەۋگە جانە ەنەرگەتيكالىق تيىمدىلىككە ەرەكشە كوڭىل بولەمىز. سونداي-اق، ەنەرگەتيكالىق تۇرعىدا ءتيىمدى ونىمدەردى قولدانۋدى ناسيحاتتايمىز. تالداۋ جۇرگىزۋ ارقىلى تۇرمىستىق قۇرىلعىلار اراسىندا ەڭ كوپ ەنەرگيانى توڭازىتقىش قاجەت ەتەتىنىن انىقتادىق. جالپى سوماسى 33 ميلليون تەڭگەگە 2 مىڭ كۋپون ازىرلەپ وتىرمىز»، - دەيدى قازاقستانداعى ب ۇ ۇ دامۋ باعدارلاماسى تۇراقتى دامۋ جانە ۋربانيزاتسيا(قالالانۋ) دەپارتامەنتىنىڭ باسشىسى رامازان جامپەيىسوۆ.

ءوز كەزەگىندە ق ر ي د م يندۋستريالىق دامۋ جانە ونەركاسىپتىك قاۋىپسىزدىك كوميتەتىنىڭ باسقارما باسشىسى جاقسىلىق توقايەۆ ەنەرگەتيكالىق ءتيىمدى تۇرمىستىق قۇرىلعىلاردى ساتىپ الۋدى ناسيحاتتاۋ قاجەتتىگىن جەتكىزدى.

«ءبىر توڭازىتقىش جىلىنا 400 كيلوۆاتت قۋاتتى تۇتىنادى. سوڭعى جىلدارى شىعارىلعان توڭازىتقىشتاردىڭ ەنەرگەتيكالىق تيىمدىلىگى ارتىپ كەلەدى. بۇرىندارى A ساناتى بولسا، قازىر A+ جانە ، +A2 شىعارىلدى، بولاشاقتا +A4 ۇلگىسى دە پايدا بولۋى مۇمكىن. مەملەكەت باسشىسى ەنەرگيانى ۇنەمدەۋ، ەنەرگەتيكالىق تۇرعىدا ءتيىمدى قۇرىلعىلاردى ساتىپ الۋدى ناسيحاتتاۋ جونىندە تاپسىرمالار بەردى. ب ۇ ۇ دامۋ باعدارلاماسىمەن بىرلەسكەن جوبامىز دا وسىعان باعىتتالعان»، - دەدى ج. توقايەۆ.

ايتا كەتەيىك، جەڭىلدىك كۋپونى ارقىلى جاڭا توڭازىتقىشتى «مەچتا» جانە «تەحنودوم» دۇكەندەرىنەن الۋعا بولادى. ناۋقان 2018 -جىلدىڭ 1 -قازانىنان 1 -جەلتوقسانعا دەيىن جالعاسادى. ەسكى تۇرمىستىق تەحنيكالاردى ماماندار تەگىن الىپ كەتەدى. ول ءۇشىن استانادا - 87172642533 نومىرىنە، الماتىدا - 87273115452 نومىرىنە حابارلاسۋ كەرەك.