13:16, 02 - قازان 2018 | GMT +5
جەرگىلىكتى بيلىك ازىق- تۇلىك باعاسىنىڭ وسۋىنە جول بەرمەۋى ءتيىس - ساعىنتايەۆ
استانا. قازاقپارات - جەرگىلىكتى اتقارۋشى ورگاندار ازىق- تۇلىك ونىمدەرى باعاسىنىڭ وسۋىنە جول بەرمەۋى ءتيىس. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا پرەمەر- مينيستر باقىتجان ساعىنتايەۆ ايتتى، دەپ حابارلايدى قازاقپارات ءتىلشىسى.
«الەۋمەتتىك ماڭىزى بار ازىق- تۇلىك تۇرلەرى باعاسىنىڭ ءوسۋ پروبلەماسى حالىق ءۇشىن وتە ماڭىزدى ماسەلە. سول سەبەپتى ازىق- تۇلىك ونىمدەرى باعاسىنىڭ وسۋىنە جول بەرمەۋگە ەڭ الدىمەن جەرگىلىكتى اتقارۋشى ورگاندار جاۋاپتى ەكەنىن ەستەرىڭىزگە سالامىن. ونى وزدەرىڭىز دە باياندامالارىڭىزدا ايتىپ وتىرسىزدار» ، - دەدى ۇكىمەت باسشىسى.
وسى رەتتە پرەمەر- مينيستر وبلىس باسشىلارىنا باعانى رەتتەۋ ءۇشىن وڭىرلىك تۇراقتاندىرۋ قورلارىنىڭ مۇمكىندىكتەرىن ءتيىمدى پايدالانۋ، تاۋارلاردى ۋاقىتىندا ساتىپ الۋ، جاڭارتۋ جانە نەگىزگى ازىق- تۇلىك تۇرلەرىن تۇگەندەۋدى دەر ۋاقىتىندا جۇرگىزۋدى تاپسىردى.
«وسى جۇمىستاردىڭ بارلىعى سىزدەردىڭ تۇراقتى باقىلاۋلارىڭىزدا بولۋى قاجەت. مونيتورينگتى كۇشەيتۋدى قولعا الۋلارىڭىزدى سۇرايمىن» ، - دەدى باقىتجان ساعىنتايەۆ وبلىس باسشىلارىنا.
