تۋريزمدى دامىتۋعا ارنالعان جاڭا جوبالار ىسكە قوسىلدى

استانا. قازاقپارات - «اتامەكەن» ۇلتتىق كاسىپكەرلەر پالاتاسى «قازاقستان اڭىزدارى» جانە «تۋريزمدەگى تۇلعالار» اتتى جاڭا جوبالاردى جۇزەگە اسىرۋدا، دەپ حابارلايدى قازاقپارات ءتىلشىسى.

 دۇنيەجۇزىلىك تۋريزم كۇنىنە وراي www.atameken.kz سايتىندا «Legends of Kazakhstan» جانە «تۋريزمدەگى تۇلعالار» جوبالارى ىسكە قوسىلدى.

 «جوبا ەلىمىزدىڭ تۇكپىر- تۇكپىرىنەن جينالعان 250 اڭىز بەن داستاندى بىرىكتىرىپ وتىر. بۇل- حالىق اۋىز ادەبيەتى، اڭىزدار جانە تابيعات ەسكەرتكىشتەرى مەن تاريحي وقيعالار، ەتيمولوگيالىق اڭىزدار مەن كيەلى ورىندار جايىندا كەڭ اقپارات. جوبا الداعى ۋاقىتتا سۋرەتتەرمەن جانە جاڭا نىساندارمەن تولىقتىرىلىپ وتىراتىن بولادى» ، - دەدى ۇ ك پ- نىڭ تۋريزم دەپارتامەنتىنىڭ ديرەكتورى قارلىعاش التايەۆا.

 سايتتا بارلىق ماتەريالدار اشىق قولدانىستا بەرىلگەن. ولاردى تۋريزم سالاسىنىڭ بارلىق قاتىسۋشىلارى قازاقستاننىڭ تۋريستىك ونىمدەرىن ناسيحاتتاۋ مەن تاراتۋ ماقساتىندا قاجەتىنشە پايدالانا الادى.

 ال «تۋريزمدەگى تۇلعالار» جوباسى قازاقستانداعى وسى نارىقتىڭ كاسىبي ويىنشىلارىن انىقتاۋعا جانە سالا قاتىسۋشىلارىنىڭ اقپاراتپەن قامتىلۋىن ارتتىرۋعا باعىتتالعان. بۇل ايداردا ەلىمىزدىڭ بارلىق وڭىرىنەن تۋريستىك فيرما جەتەكشىلەرى، قوناقۇي مەنەدجەرلەرى، تابىستى مەيرامحانا يەلەرى، ەكسكۋرسيا گيدتەرى، بەلسەندى قوعام قايراتكەرلەرى جانە سالانىڭ دامۋىنا ۇلەس قوسقان باسقا دا كاسىبي ماماندار تۋرالى اقپارات بار.

ايتا كەتەيىك، بۇل جوبا جوعارىدا اتالعان باستامالارمەن شەكتەلمەي، ۇنەمى جاڭا ەسىمدەرمەن جانە جۇزەگە اساتىن باسقا دا جوبالارمەن تولىعىپ وتىرادى.

 سونىمەن قاتار تۋريستەرگە ىڭعايلى بولۋ ءۇشىن «تۋريست كۇنتىزبەسى» جاريالاندى. وندا قازاقستاندا وتەتىن ءىرى ءىس- شارالاردىڭ كۇنى بەلگىلەنگەن.