زىريان اۋدانى مەن قالاسى التاي دەپ اتالاتىن بولدى

وسكەمەن. قازاقپارات - شىعىس قازاقستاننىڭ زىريان اۋدانى مەن قالاسىن التاي دەپ اتاۋ ۇسىنىسىن اۋداندىق ءماسليحات دەپۋتاتتارى مەن جەرگىلىكتى قوعامدىق ۇيىم مۇشەلەرى ءبىراۋىزدان قولدادى، دەپ حابارلايدى قازاقپارات ءتىلشىسى.

قالالىق مادەنيەت ۇيىندە اۋەلى زىريان اۋدانىن التاي دەپ اتاۋ ماسەلەسى قارالدى. اۋداندىق ءماسليحات دەپۋتاتتاردى جاڭا اتاۋدى ءبىر اۋىزدان قولداپ داۋىس بەردى. ال شاھار اتىن قايتا اتاۋ ماسەلەسىن جەرگىلىكتى قوعامدىق كەڭەس مۇشەلەرى تالقىلادى. باس اياعى ءبىر ساعاتقا سوزىلعان جيىندا قوعامدىق كەڭەس وكىلدەرى ءبىر توقتامعا كەلىپ، شاھار اتىن التاي دەپ اۋىستىرۋ قاجەت دەپ شەشتى.

تۇراقتى كەڭەس مۇشەلەرى دە بۇل ۇسىنىستى ءبىراۋىزدان قولدادى.

بۇل وڭ شەشىمگە اۋداننىڭ زيالى قاۋىم وكىلدەرى ريزا كوڭىلمەن تارقاستى.

«قالامىزعا دا، اۋدانعا دا تىڭ سەرپىن كەرەك. سول سەرپىننىڭ رۋحاني جاڭعىرۋدان باستالعانى قۋانتادى. «التاي» دەيتىن الەمدىك برەندتى ەكونوميكامىزدىڭ دامۋىنا پايدالانباۋ كۇنا دەر ەدىم. وسى قالانىڭ وركەندەۋىنە ۇلەس قوسىپ، ءوندىرىس قازانىندا قۇرىشتاي قايناعان اعا بۋىن بۇل وزگەرىستى قۇپتايتىنىن مالىمدەگىم كەلەدى» - دەيدى زىريان اۋداندىق قوعامدىق جانە ارداگەرلەر كەڭەسىنىڭ ءتورايىمى ەللا گەيگەر.

«التاي - قازاق دالاسىنا تاعدىر ايداپ اكەلگەن سان ءتۇرلى ۇلت پەن ۇلىستى قۇشاعىنا سىيدىرعان كيەلى ولكە. XVIII عاسىردا كەلگەن ەسكى نانىم وكىلدەرى دە، ەكىنشى دۇنيەجۇزىلىك سوعىس كەزىندە جەر اۋدارىلعان الماندار مەن وزگە ۇلتتار دا التايدىڭ قويىنىنان پانا تاپتى. سوندىقتان اۋدانىمىزدىڭ وسى ۇلى اتاۋدى الۋى زاڭدىلىق. بۇل ولكەنىڭ التاي اتانۋى تاريحىمىزدى قايتا قاراۋعا باستاسا دەگەن ءۇمىت بار. تاريحشى رەتىندە مۇندا دا تۇركى وركەنيەتىنەن قالعان مۇرالار كوپ ەكەنىن ايتا الام. سونىڭ ءبارى جارىققا شىقسا، ءبىز ءوز باستاۋىمىزعا ورالعان بولار ەدىك» - دەيدى ولكەتانۋشى دەنيس نيكيتين.

اۆتور: ەسىمجان ناقتىباي