اتى اڭىزعا اينالعان ايگىلى بوكسشى مايك تايسون وزبەكستانعا كوشىپ كەلمەكشى

 استانا. قازاقپارات - اتى اڭىزعا اينالعان امەريكالىق بوكسشى مايك تايسون وزبەكستان استاناسى تاشكەنتتەن ءۇي ساتىپ الدى.

بوكسشى Tashkent City حالىقارالىق ىسكەرلىك ورتالىعىنداعى Gardens Residence دەپ اتالاتىن جاڭا تۇرعىن ءۇي كەشەنىنە ينۆەستيتسيا جاساعان ەكەن.

Trend باسىلىمىنىڭ جازۋىنشا، عيمارات 2019-جىلدىڭ اياعى مەن 2020-جىلدىڭ باسىندا پايدالانۋعا بەرىلمەك.

مايك تايسون اۋىر سالماقتا سىنعا ءتۇسىپ، كاسىپقوي بوكس ارقىلى اتاعى شارتاراپتى شارلاعان بىرەگەي اڭىز سپورتشى سانالادى. ول 1982-جىلى اۋىر سالماقتا ابسوليۋتتى الەم چەمپيونى اتانعاننان كەيىن WBC، WBA، IBF، The Ring تۇجىرىمدارى بويىنشا الەم چەمپيونى اتاقتارىن ەنشىلەگەن.

لاس-ۆەگاستا وتكەن WBC نۇسقاسىنىڭ 49-ءداستۇرلى كونۆەنتسياسىندا ەڭ جىلدام نوكاۋتتار جاساعانى ءۇشىن جانە اۋىر سالماقتاعى ەڭ جاس چەمپيون رەتىندە ەكى بىردەي سەرتيفيكاتپەن ماراپاتتالىپ، اتى گيننەستىڭ رەكوردتار كىتابىنا ەنگەن.

تايسوننىڭ مىنا رەكوردتارى ءالى كۇنگە دەيىن مۇرتىن بۇزباي تۇر: اۋىر سالماقتاعى ەڭ جاس الەم چەمپيونى (20 جاس، 144 كۇن)؛ اۋىر سالماقتاعى ەڭ جاس ابسوليۋتتى چەمپيون (21 جاس)؛ اۋىر سالماقتا چەمپيوندىق تيتۋلدار مەن ابسوليۋتتى چەمپيون اتانۋ بويىنشا ەڭ از ۋاقىت جۇمساعان بوكسشى (1 جىل، 8,5 اي جانە 2  جىل، 5 اي)؛ ءۇش نەگىزگى تيتۋلدى بىرىنەن سوڭ ءبىرىن قاتارىنان جەڭىپ العان تۇڭعىش ءارى بىرەگەي سپورتشى؛ سپورت تاريحىنداعى ەڭ كوپ قالاماقىعا يە بولعان اۋىر سالماقتاعى بوكسشى؛ بوكس تاريحىنداعى ەڭ قىمبات 10 جەكپە-جەكتىڭ التاۋى تايسونعا تيەسىلى؛ ءابسوليۋتتى چەمپيون اتاعىن (WBC، WBA، IBF) قورعاعان جالعىز بوكسشى (6 رەت)؛ ەڭ جىلدام نوكاۋتتاردىڭ اۆتورى (1 مينۋتقا جەتپەي 9 نوكاۋت جاساعان)؛ جاس وسپىرىمدەر وليمپياداسىنداعى ەڭ جىلدام نوكاۋتتىڭ اۆتورى (8 سەكۋند).

اباي ايماعامبەت

www.aikyn.kz