توكيوداعى كينوفەستيۆالدە قازاقستاندىق «وزەن» فيلمىنىڭ تۇساۋكەسەرى وتەدى
«قازاق فيلم» كينوستۋدياسىنىڭ حابارلاۋىنشا، فەستيۆالدىڭ نەگىزگى بايقاۋىنا 109 ەلدەن 1,8 مىڭنان استام فيلم كەلىپ تۇسكەن. ناتيجەسىندە، نەگىزگى بايقاۋعا وتاندىق «وزەن» فيلمىنەن باسقا، ەۋروپا، ازيا جانە افريكا رەجيسسەرلەرى تۇسىرگەن 15 فيلم ىرىكتەلىنىپ الىندى. فەستيۆالدىڭ اشىلۋ سالتاناتىندا برەدلي كۋپەردىڭ رەجيسسەرلىك دەبيۋتى - «جۇلدىز تۋىلدى» ميۋزيكلى كورسەتىلەتىن بولادى.
اتالعان حالىقارالىق كينوفەستيۆالدىڭ قازىلار القاسىنىڭ قۇرامىنا رەجيسسەر بريليانتە مەندوسا، پروديۋسەر برايان بەرك، اكتريسالار - تارانە اليدوستي جانە كاحو مينامي، رەجيسسەر ءارى پروديۋسەر ستەنلي كۆان كىردى.
«ەمير بايعازين - قازاقستان اتىنان ۇسىنىلىپ وتىرعان «وزەن» فيلمىنىڭ رەجيسسەرى. بۇل فيلم ەرەكشە تۇسىرىلگەن. ەمير بايعازين - وسى ەسىمدى ەستەن شىعارماڭىزدار»، - دەدى فەستيۆالدىڭ ديرەكتورى ەسي ياتابە فيلمنىڭ تانىستىرىلىمىندا.
«وزەن» فيلمىنىڭ الەمدىك تۇساۋكەسەرى ۆەنەتسيا كينوفەستيۆالى شەڭبەرىندە وتكەن بولاتىن. بۇل فەستيۆالدىڭ «كوكجيەكتەر» باعدارلاماسىندا ەمير بايعازين ۇزدىك رەجيسسەر اتاندى. ال فيلمنىڭ سولتۇستىك امەريكاداعى تۇساۋكەسەرى قىركۇيەك ايىندا حالىقارالىق تورونتو كينوفەستيۆالى اياسىندا ءوتتى. كينوتۋىندى فەستيۆالدىڭ «تۇعىرناما» («پلاتفورما») كونكۋرستىق باعدارلاماسىندا كورسەتىلىپ، قازىلار القاسىنىڭ قۇرمەتتى اتالىمىنا جانە Screen Daily تاۋەلسىز كينوسىنشىلاردىڭ رەيتينگىسى تىزىمىندە الدىڭعى قاتاردان كورىندى. ودان بولەك، «وزەن» فيلمى ءۇشىن ەمير بايعازين گولليۆۋدتىڭ شەتەل باسپا ءسوزى قاۋىمداستىعىنىڭ گرانتىنا يە بولدى.
«وزەن» فيلمى وركەنيەتتەن الىس جەردە تۇراتىن، قالادان كەلگەن قوناقتان كەيىن ومىرلەرى كۇرت وزگەرە باستاعان بەس اعايىندى تۋرالى باياندايدى. اسلان تۋرالى تريلوگيانىڭ الدىڭعى ەكى ءبولىمى 2013- جانە 2016-جىلدارى بەرلين كينوفەستيۆالىنىڭ نەگىزگى باعدارلاماسىنا قاتىسقان بولاتىن. «اسلاننىڭ ساباقتارى» فيلمى «كۇمىس ايۋ» جانە Morgenpost نەمىس گازەتىنىڭ جۇلدەسىمەن ماراپاتالعان
