نۇرسۇلتان نازاربايەۆ تاجىكستان پرەزيدەنتىمەن كەزدەستى
«قازاقستان مەن تاجىكستان اراسىندا سەنىمدى قارىم-قاتىناس ورناعان. ءبىز ءاردايىم تاجىكستانعا كومەك تە، قولداۋ دا كورسەتىپ وتىرامىز. بۇگىندە ءبىز وسى ىنتىماقتاستىقتى تەرەڭدەتىپ، ءوزارا ساۋدانى دامىتۋعا مۇددەلىمىز. ت م د اياسىنداعى ينتەگراتسيانى كۇشەيتۋىمىز كەرەك»، - دەدى ن. نازاربايەۆ جۇزدەسۋ بارىسىندا.
ءوز كەزەگىندە تاجىكستان پرەزيدەنتى ەمومالي راحمون ەكى ەلدىڭ اراسىنداعى بايلانىستاردىڭ ستراتەگيالىق سيپاتتا دامىپ جاتقانىن جەتكىزدى.
«قازاقستان ءبىزدىڭ نەگىزگى ستراتەگيالىق ءارى ەكونوميكالىق ارىپتەسىمىز بولىپ سانالادى. بۇگىندە ءبىزدىڭ ساۋدا-ەكونوميكالىق بايلانىستارىمىز نىعايىپ كەلەدى»، - دەپ اتاپ كورسەتتى ە. راحمون.
وسى ورايدا تاجىكستان باسشىسى قازاقستان پرەزيدەنتىنىڭ حالىقارالىق دارەجەدەگى بەدەلىن ەرەكشە اتاپ ءوتىپ، ساياسي جانە ەكونوميكالىق قولداۋ ءۇشىن ءوز العىسىن ءبىلدىردى.
بيىل قازاقستان مەن تاجىكستان اراسىنداعى ديپلوماتيالىق قارىم-قاتىناسقا 25 جىل تولىپ وتىر. وتكەن جىلى ەكى ەلدىڭ ساۋدا-ساتتىعى 776,3 ميلليون ا ق ش دوللارىنا جەتتى. بۇل الدىڭعى جىلمەن سالىستىرعاندا 31,5 پروتسەنتكە ارتىق. قازاقستاننىڭ تاجىكستانعا جاساعان ەكسپورتى 458,7 ميلليون دوللاردى قۇراسا، تاجىكستاننان كەلگەن يمپورت 317,6 ميلليون دوللارعا جەتتى. قازاقستاننان تاسىمالداناتىن تاۋارلاردىڭ ىشىندە ءبيداي، ۇن، كۇنباعىس مايى، قۇرىلىس ماتەريالدارى، مۇناي جانە مۇناي ونىمدەرى بار. ال تاجىكستاننان، كوبىنەسە، كوكەنىس، جيدەك، قورعاسىن، سينك پەن مىس كونتسەنتراتتارى جەتكىزىلەدى. وسى سالاداعى جۇمىستى ەكونوميكالىق ىنتىماقتاستىق جونىندەگى ۇكىمەتارالىق كوميسسيا ۇيلەستىرىپ وتىرادى.
بۇگىندە تاجىكستان نارىعىندا «قاز كوممەرتس بانك تاجىكستان» ج ا ق، «JTI Kazakhstan» تەمەكى كومپانياسى، TOO «Teksan Kazakhstan Invest» (جارىق جانە ەلەكترو تەحنيكالىق ونىمدەردى شىعاراتىن زاۋىت)، «Alina» كومپانياسى، «پەنوپلەكس قازاقستان» زاۋىتى، «زەردە كەراميكا» كومپانياسى، اليۋميني پروفيلدەرىن شىعاراتىن «Galaksi» كومپانيالار توبى، «سەسنا» حولدينگى، بىرلەسكەن استىق كومپانياسى سياقتى كاسىپورىندار تابىستى جۇمىس ىستەپ كەلەدى. بۇدان بولەك، قازاقستاندىق ينۆەستورلار «وبي زۋلول» ج ا ق جۇمىسىنا قارجى سالىپ وتىر. اتالعان كاسىپورىن سۋ جانە سۋسىنداردى شىعارادى. اكسيانىڭ 65 پروتسەنتى «بەيبارس ي ك» ج ش س- نا تيەسىلى. ال پروپيلەن قاپتارىن شىعاراتىن «سۋگد پاك» ج ش ق- سىنا 100 پروتسەنت قازاقستاندىق كاپيتال قۇيىلدى.
«لوكوموتيۆ كۇراستىرۋ زاۋىتى» ا ق مەن «روحي وحاني تودجيكيستون» مەملەكەتتىك ۋنيتارلى كاسىپورىن («تاجىكستاننىڭ تەمىر جولى» كومپانياسى) اراسىنداعى ىنتىماقتاستىق تا ويداعىداي دامىپ جاتىر.
بۇعان دەيىن تاراپتار ТЭ33А «Evolution» ۇلگىسىندەگى تەپلوۆوزداردى تاجىكستانعا جەتكىزۋگە ۋاعدالاسقان بولاتىن. اتالعان تەپلوۆوزدار قازاقستاندا قۇراستىرىلادى. وسىدان التى جىل بۇرىن 4 تەپلوۆوز جەتكىزىلدى. ال 2016-جىلى تاعى 2 لوكوموتيۆتى قۇراستىرۋعا تاپسىرىس بەرىلدى. سونىڭ بىرەۋى تاجىكستانعا جەتكىزىلدى.
وتكەن جىلى «KazakhExport» كومپانياسىنىڭ ارالاسۋىمەن «سارىارقا اۆتوپروم» ج ش س- مەن «ازيا گرۋپپ تاجىكستان» حولدينگى اراسىندا 24 ميلليون دوللاردىڭ كەلىسىمى راسىمدەلدى. وعان سايكەس، قازاقستان دۋشانبەنىڭ تاكسوپاركىنە 2 مىڭ اۆتوموبيل جەتكىزىپ بەرەدى. سونىڭ ىشىندە 1 مىڭى - «Peugeot 2012» جانە تاعى مىڭ داناسى - «JAC S3» .
شىلدە ايىندا «JAC S3» - ءتىڭ العاشقى پارتياسى - 55 كولىك جەتكىزىلدى. قالعانى الداعى ەكى جىلدىڭ ىشىندە جەتكىزىلەتىن بولادى.
ايتا كەتەيىك، قر پرەزيدەنتى نۇرسۇلتان نازاربايەۆ جۇمىس ساپارىمەن تاجىكستاننىڭ استاناسى - دۋشانبە قالاسىنا كەلدى. بۇگىن 28- قىركۇيەكتە ەلباسى ت م د مەملەكەت باسشىلارى كەڭەسىنىڭ كەزەكتى سامميتىنە قاتىسادى.
