اتىراۋ اكىمى كاسىپكەرلەردى قالانىڭ دامۋىنا ۇلەس قوسۋعا شاقىردى

اتىراۋ. قازاقپارات - اتىراۋ اكىمى اليمۇحاممەد قۇتتۇمۇرات ۇلى بيزنەس ورتالىعىنىڭ وكىلدەرىنە قالادا جۇزەگە اسىرىلىپ جاتقان جوبالار تۋرالى ايتىپ بەردى، دەپ حابارلايدى قازاقپارات ءتىلشىسى اكىمدىكتىڭ باسپا ءسوز قىزمەتىنە سىلتەمە جاساپ.

اتىراۋدا قالا اكىمىنىڭ كاسىپكەرلەرمەن كەزدەسۋى ءوتتى. ءىس-شارا «سۇراق-جاۋاپ» فورماتىندا ءوتتى، وعان وبلىس ورتالىعىنىڭ 200 گە جۋىق كاسىپكەرى قاتىستى.

اليمۇحاممەد قۇتتۇمۇرات ۇلىنا قويىلعان ساۋالداردىڭ باسىم بولىگى كاسىپكەرلىك نىساندارىن سالۋعا جەر تەلىمدەرىن ءبولۋ، ينفراقۇرىلىم جۇرگىزۋ، مونوپوليستەرگە قاتىستى ماسەلەلەردى شەشۋ جايلى بولدى.

قاتىسۋشىلاردىڭ سۇراقتارىنا جان-جاقتى جاۋاپ بەرگەن قالا اكىمى كاسىپكەرلەرگە اتىراۋدىڭ دامۋى مەن وركەندەۋىنە ۇلەس قوسۋدى ءوتىندى.

«بۇگىنگى تاڭدا قالا 150 ميلليارد تەڭگەگە جۋىق جوبالاردى جۇزەگە اسىرۋدا. بارلىق جوبالار قالا ءۇشىن وتە ماڭىزدى. جەرگىلىكتى بيۋجەتتەن ولاردى جۇزەگە اسىرۋ ءۇشىن قاراجات جەتىسپەيتىنىن تۇسىنەمىز، سوندىقتان كاسىپكەرلەردى قالانىڭ دامۋىنا ۇلەس قوسۋعا جانە قالانى جاقسارتۋعا كومەكتەسۋگە شاقىرامىز.

مىسالى، وتكەن جىلى كاسىپكەرلەر كوپتەگەن سپورت الاڭدارىن سالعان. اقتوبەنىڭ كاسىپكەرلەرى 1 ميلليارد تەڭگەدەن استام سوماعا وبەكتىلەر سالعان. قۇلسارى قالاسىندا جەرگىلىكتى كاسىپكەرلەردىڭ ءبىرى 800 ميلليون تەڭگەگە بالاباقشا سالىپ، ونى قالاعا سىيعا تارتتى. بيىلعى جىلى بيزنەس وكىلدەرى ءبىزدىڭ اتىراۋدى جاقسارتۋعا كومەكتەسكەنى ءجون بولار ەدى»، - دەگەن ءوتىنىش ءبىلدىردى ول.

قالا اكىمىنىڭ ايتۋىنشا، كاسىپكەرلەر قازىرگى تاڭدا ەلىمىزدە كوپتەگەن جۇزەگە اسىپ جاتقان باعدارلامالارعا دەمەۋشى رەتىندە بەلسەندى قاتىسا الادى. «تۋعان جەرگە تاعزىم»، «جومارت جۇرەك». ەلباسىنىڭ «بولاشاققا باعدار: رۋحاني جاڭعىرۋ» باعدارلاماسىن جۇزەگە اسىرۋ اياسىندا قالانىڭ دامۋىنا ەلەۋلى ۇلەس قوسۋعا مۇمكىندىك بار.

اليمۇحاممەد قۇتتۇمۇرات ۇلىنىڭ ايتۋىنشا، 2019-جىلى وبلىس ورتالىعىندا 100 تۇرعىن ءۇيدى جابدىقتاۋ جوسپارلانىپ وتىر. قازىرگى ۋاقىتتا جاڭا جوبانىڭ تۇجىرىمداماسى ازىرلەنۋدە. ونى جۇزەگە اسىرۋدا كاسىپكەرلەر بەلسەندىلىك تانىتا الادى.