مەملەكەت باسشىسى دۇنيەجۇزىلىك ساۋدا ۇيىمىنىڭ باس ديرەكتورىمەن كەزدەستى
دەپ حابارلايدى قازاقپارات اقوردانىڭ رەسمي سايتىنا سىلتەمە جاساپ.
- سىزبەن استانادا قايتا جۇزدەسكەنىمە قۋانىشتىمىن. قازاقستان دۇنيەجۇزىلىك ساۋدا ۇيىمىنا مۇشە بولار كەزدە ەلىمىزگە ۇلكەن قولداۋ بىلدىرگەنىڭىزدى بىلەمىز. بۇگىندە ءبىزدىڭ ەل - ۇيىمنىڭ بەلسەندى مۇشەسى. 2020 -جىلى استانادا كونفەرەنسيا وتكىزۋ جونىندە شەشىم قابىلداندى. ءبىز وسى شارانى ءتيىستى دەڭگەيدە وتكىزۋ ءۇشىن كۇش جۇمىلدىرامىز، - دەدى قازاقستان پرەزيدەنتى.
نۇرسۇلتان نازاربايەۆ دۇنيەجۇزىلىك ساۋدا ۇيىمىنىڭ ەلدەر اراسىنداعى ساۋدا- ەكونوميكالىق قارىم- قاتىناستى نىعايتۋدى جانە كەڭەيتۋدى كوزدەيتىن باستى قاعيداتتارىن قازاقستاننىڭ تولىق قولدايتىنىن اتاپ ءوتتى.
روبەرتۋ ازيەۆەدۋ نۇرسۇلتان نازاربايەۆقا قوناقجايلىق تانىتقانى جانە قازاقستان مەن دۇنيەجۇزىلىك ساۋدا ۇيىمىنىڭ الداعى ىنتىماقتاستىعىنا ارنالعان ماسەلەلەردى تالقىلاۋعا مۇمكىندىك بەرگەنى ءۇشىن العىس ءبىلدىردى.
- جەنيەۆاداعى سوڭعى كەزدەسۋىمىزدەن كەيىن قازاقستان مەن دۇنيەجۇزىلىك ساۋدا ۇيىمى اراسىنداعى ىنتىماقتاستىقتىڭ تەرەڭدەگەنىن نىق سەنىممەن ايتا الامىز. ءسىزدىڭ ەلىڭىز كوپجاقتى ساۋدا جۇيەسىن دامىتۋ قاعيداتتارىن ءاردايىم بەرىك ۇستانىپ كەلەدى. ءبىز قازاقستاننىڭ 2020 -جىلى مينيسترلەر كونفەرەنسياسىن وتكىزۋگە كەلىسىم بەرگەنىنە قۋانىشتىمىز. بۇل بۇگىنگى الەمدە بولىپ جاتقان وقيعالارعا وراي ەرەكشە ماڭىزعا يە بولىپ وتىر، - دەدى دۇنيەجۇزىلىك ساۋدا ۇيىمىنىڭ باس ديرەكتورى.
سونداي- اق، ر. ازيەۆەدۋ جەتەكشى دەرجاۆالار اراسىنداعى ساۋدا- ەكونوميكالىق شيەلەنىستىڭ باسقا ەلدەرگە تيگىزەتىن سالدارىنا توقتالدى.
