شەتەلگە جۇمىسقا اتتانعان قازاقستاندىقتاردىڭ قۇقىعىن قورعايتىن زاڭ قابىلداندى

 استانا. قازاقپارات - شەت مەملەكەتتەردە ورنالاسقان ءوندىرىس ورىندارىندا قازاقستان ازاماتتارىنىڭ جازاتايىم وقيعالارعا ۇشىراۋىن تەكسەرۋ ءتارتىبى بەكىتىلدى، دەپ حابارلايدى قازاقپارات ءتىلشىسى.

اتاپ ايتقاندا، پارلامەنت سەناتىنىڭ جالپى وتىرىسىندا «ەۋرازيالىق ەكونوميكالىق قوعامداستىققا مۇشە ءبىر مەملەكەتتىڭ ازاماتتارى ەۋرازيالىق ەكونوميكالىق قوعامداستىققا مۇشە ەكىنشى مەملەكەتتىڭ اۋماعىندا ەڭبەك قىزمەتىن جۇزەگە اسىرۋ كەزىندە ۇشىراعان وندىرىستەگى جازاتايىم وقيعالاردى تەرگەپ- تەكسەرۋ ءتارتىبى تۋرالى كەلىسىمدى راتيفيكاتسيالاۋ تۋرالى» زاڭى قابىلداندى.

كەلىسىم جازاتايىم وقيعا سالدارىنان زارداپ شەككەن ەۋرازيالىق ەكونوميكالىق قوعامداستىققا مۇشە مەملەكەتتەر ازاماتتارىنىڭ ەڭبەك قۇقىقتارىن قورعاۋعا باعىتتالعان.

«كەلىسىم ءوز بەتىنشە جۇمىسقا ورنالاسقاندار، سونداي- اق كاسىپورىندار جۇمىسقا العان ازاماتتاردىڭ جازاتايىم وقيعالارعا ۇشىراۋىن تەكسەرۋ ءتارتىبىن بەكىتۋگە ارنالعان. جالپى العاندا، قۇجاتپەن ەۋرازيالىق ەكونوميكالىق قوعامداستىققا مۇشە ءبىر مەملەكەتتىڭ ازاماتتارىمەن باسقا مەملەكەتتىڭ اۋماعىندا ەڭبەك قىزمەتىن جۇزەگە اسىرعاندا بولعان وندىرىستەگى جازاتايىم وقيعالار تۋرالى اقپاراتتىڭ اشىقتىعى مەن قولجەتىمدىلىگى مەسەلەلەرى رەتتەلەدى» ، - دەدى ەڭبەك جانە حالىقتى الەۋمەتتىك قورعاۋ ءمينيسترى ءمادينا ءابىلقاسىموۆا.

 سونىمەن قاتار، كەلىسىمدە قاتىسۋشى ەلدەر ءۇشىن وندىرىستەگى جازاتايىم وقيعا تۋرالى اكتىنىڭ ءبىرىڭعاي فورماسى بەكىتىلەدى (№-1) . وقيعانى تەكسەرۋ اياقتالعاننان كەيىن، جۇمىس بەرۋشى زارداپ شەككەن قىزمەتكەرگە جازاتايىم وقيعا تۋرالى اكتىنى بەرۋگە مىندەتتى. ال اكتىنىڭ ءبىر داناسى جۇمىسقا ورنالاستىرۋشى مەملەكەتتىڭ ەڭبەك ينسپەكتسياسىنا جولدانادى.

«توپتىق، اۋىر نەمەسە ادام ولىمىنە اكەپ سوققان جازاتايىم وقيعالاردى تەكسەرۋ اياقتالعاننان كەيىن، اكتىنى تەكسەرۋ ماتەريالدارىمەن بىرگە زارداپ شەگۋشى ازاماتتىڭ تۇراتىن مەملەكەتىنىڭ ۋاكىلەتتى ورگانىنا جولدانادى. مۇنىمەن قوسا، جازاتايىم وقيعانى تەكسەرۋگە بايلانىستى بەرىلگەن قۇجاتتار نەمەسە ەكىنشى قاتىسۋشى ەلدىڭ بىرەۋىنىڭ اۋماعىندا جاسالعان قۇجاتتاردىڭ كوشىرمەلەرىن قوعامداستىقتىڭ باسقا ەلدەرى لەگاليزاتسيالاۋسىز قابىلدايدى. وسىعان بايلانىستى جۇمىسكەرگە قۇجاتتاردى زاڭداستىرۋ قاجەت بولمايدى» ، - دەپ ناقتىلادى مينيستر.

 

وسىلايشا، زاداپ شەككەن ازاماتتاردىڭ دەنساۋلىعىنا كەلگەن زاقىمدى وتەۋ جانە وندىرىستەگى جازاتايىم وقيعامەن بايلانىستى وتەماقى تولەمدەرىن الۋ پروتسەسىن ءبىرشاما جەڭىلدەتەدى.

 

سونىمەن قاتار، جۇمىسشىنىڭ دەنساۋلىعىنا كەلگەن زياندى وتەۋ جۇمىسقا ورنالاستىرعان مەملەكەتتىڭ زاڭناماسىنا سايكەس جۇرگىزىلەدى.