بەلبەۋلەردى ءالى قايتارامىز - جانىبەك ءالىمحان ۇلى «كانەلومەن» ايقاستى اسىعا كۇتۋدە

استانا. قازاقپارات - قازاقستاندىق كاسىپقوي بوكسشى جانىبەك ءالىمحان ۇلى ساۋل «كانەلو» الۆارەسپەن جەكپە- جەكتى اسىعا كۇتەتىنىن جاريا ەتتى، دەپ حابارلايدى قازاقپارات ءتىلشىسى.

«بۇيىرتسا بەلبەۋلەردى قايتارىپ الامىز! 2019 -جىلى مەنىڭ پروموۋتەرىم كانەلونىڭ پروموۋتەرىمەن كەلىسەدى دەپ سەنەمىن. اسىعا كۇتەمىن! مەكسيكالىقتارعا قازاق بوكس ستيلىن كورسەتەمىز!»، - دەپ جازدى جانىبەك ءوزىنىڭ ينستاگرام پاراقشاسىندا.

كاسىپقوي بوكستاعى جاس پەرىنىڭ بۇلايشا سەنىمدى سويلەۋىنىڭ سەبەبى دە بار. ويتكەنى، جانىبەك ءالىمحان ۇلى الەمگە ايگىلى پروموۋتەر بوب ارۋممەن كەلىسىمگە كەلگەن بولاتىن. ول كەلىسىم جايلى كاسىپقوي بوكستاعى العاشقى قازاقستاندىق سپورتشىلاردىڭ ءبىرى، IBA جانە IBF تۇجىرىمدارى بويىنشا بۇرىنعى الەم چەمپيونى، WBO تۇجىرىمى بويىنشا بۇرىنعى قۇرلىقارالىق الەم چەمپيونى مارات مازىمبايەۆ «ارۋم تەك بولاشاق چەمپيوندارمەن كەلىسىمشارتقا وتىراتىنىن» ءمالىم ەتكەن ەدى.

ەسكە سالا كەتسەك، بوكسشى جانىبەك ءالىمحان ۇلى (2-0-0,1 ك و) امەريكاداعى العاشقى جەكپە- جەگىن ا ق ش- تىڭ كاليفورنيا شتاتى وكلەند قالاسىندا وتكىزەدى. جانىبەكتىڭ قارسىلاسى - كولۋمبيالىق كارلوس گالۆان.

ايتا كەتسەك، بۇگىن امەريكا قۇراما شتاتتارىنىڭ لاس ۆەگاس قالاسىنداعى T-Mobile Arena-دا قازاقستاندىق بوكسشى گەننادي گولوۆكين (38-0-1, 34 ك و) مەن مەكسيكالىق ساۋل الۆارەس رەماتچ وتكىزىپ، تورەشىلەردىڭ شەشىمىمەن جەڭىس مەكسيكالىققا بۇيىرعان ەدى.

اۆتور: ايان بەكەن ۇلى