ومسكىدە قازاق مادەني ورتالىعى اشىلادى

استانا. قازاقپارات - قازاقستان رەسپۋبليكاسىنىڭ رەسەيدىڭ ومسك قالاسىنداعى كونسۋلى قونىسبەك جۇسىپبەكوۆ ءوڭىر باسشىسى الەكساندر بۋركوۆپەن كەزدەستى، دەپ حابارلايدى قازاقپارات ق ر- دىڭ ر ف- داعى ەلشىلىگىنە سىلتەمە جاساپ.

اتاپ وتىلگەندەي، تاراپتار قازاقستان مەن ومكس وبلىسىنىڭ وڭىرلەرى اراسىندا مادەني جانە ەكونوميكالىق بايلانىستاردى دامىتۋ جانە ىقپالداستىقتى نىعايتۋ ماسەلەلەرىن تالقىلادى.

ق ر كونسۋلى الەكساندر بۋركوۆتى سايلاۋداعى سەنىمدى جەڭىسىمەن قۇتتىقتاپ، قازاقستاندىق جانە رەسەيلىك وڭىرلەردىڭ شەكارالىق بايلانىسى ودان ءارى دامي بەرەتىنىنە سەنىم ءبىلدىردى.

 «ومسك وبلىسىنىڭ اۋماعىندا 85 مىڭ قازاق تۇرادى. ءبىز ولارمەن ۇدايى بايلانىستامىز. كونسۋلدىقتا ازاماتتاردى قابىلداۋ ءۇشىن بارلىق جاعداي جاسالعان. ءبىلىم بەرۋ جانە مادەني ءىس- شارالاردى ۇيىمداستىرۋدا قولعابىس ەتەمىز»، - دەدى قونىسبەك جۇسىپبەكوۆ.

ديپلومات سونداي- اق قازاق دياسپوراسى اتىنان ومسكىدە قازاق مادەني ورتالىعىن اشۋ ۇسىنىسىن جاسادى. ق. جۇسىپبەكوۆتىڭ ايتۋىنشا، ول جەردە قازاقستاننىڭ شىعارماشىلىق ۇجىمدارى كونسەرتتەر قويىپ، كورمەلەر مەن كىتاپحانالاردىڭ جۇمىس ىستەۋىنە مۇمكىندىك بولار ەدى.

ءوز كەزەگىندە الەكساندر بۋركوۆ ۇسىنىسقا قولداۋ ءبىلدىرىپ، ومسك مەرىنە ورتالىق ءۇشىن عيماراتتى تاڭداۋ تاپسىرماسى بەرىلەتىنىن جەتكىزدى.

كەزدەسۋ بارىسىندا سونىمەن قاتار ومسك وبلىسى مەن قازاقستان رەسپۋبليكاسى اراسىندا بيزنەس- بايلانىستاردى كەڭەيتۋگە قىزىعۋشىلىق ءبىلدىرىلدى. بۇدان بولەك، ومسكىدە قازاقستان وڭىرلەرىنىڭ كاسىپورىندارى مەن بيزنەس- قاۋىمداستىقتارى ءۇشىن فورۋم وتكىزۋ مۇمكىندىگى تالقىلاندى.

اۋدارما: ميرا تولەندى قىزى