ەلباسى تۇرىك كاسىپكەرلەرىن «استانا» قارجى ورتالىعىنىڭ جۇمىسىمەن تانىستىردى

انكارا. قازاقپارات - بۇگىن تۇركيانىڭ بيزنەس كاپيتاندارىمەن كەزدەسۋى بارىسىندا ەلباسى نۇرسۇلتان نازاربايەۆ تۇرىك كومپانيالارىن «استانا» حالىقارالىق قارجى ورتالىعىنىڭ جۇمىسىنا قاتىسۋعا شاقىردى، دەپ حابارلايدى قازاقپارات ءتىلشىسى.

قازاقستان پرەزيدەنتىمەن كەزدەسۋگە تۇركيا ەكونوميكاسىنىڭ 15 پايىزىن قۇرايتىن 25 كومپانيانىڭ باسشىلارى قاتىستى. اتالعان كومپانيالار اۋىل شارۋاشىلىعى، تاماق ونەركاسىبى، گەولوگيا جانە تاۋ-كەن ءوندىرۋ ونەركاسىبى، حيميا ونەركاسىبى، ماشينا جاساۋ، جەڭىل ونەركاسىپ، دەنساۋلىق ساقتاۋ جانە فارماتسيەۆتيكا سالالارىندا جۇمىس ىستەيدى.

«ەكسپو-2017» بازاسىندا «استانا» حالىقارالىق قارجى ورتالىعى ءوز جۇمىسىن باستاعانىن بىلەسىزدەر. قارجى ورتالىعى نيۋ-يورك، سينگاپۋر، لوندون، دۋباي قارجى ورتالىقتارىنىڭ وزىق مودەلدەرى نەگىزىندە قىزمەت ەتىپ وتىر. ونىڭ قۇقىقتىق مارتەبەسى كونستيتۋتسيالىق زاڭمەن بەكىتىلگەن. ءتىپتى، ءتىلى اعىلشىن ءتىلى. بۇل قىزمەت اعىلشىن قۇقىعىنا نەگىزدەلگەن وڭىردەگى جالعىز عانا ورتالىق»، - دەپ اتاپ ءوتتى ەلباسى.

مەملەكەت باسشىسىنىڭ اتاپ وتۋىنشە، حالىقارالىق قارجى ورتالىعىنىڭ قاتىسۋشىلارىنا 50 جىلعا دەيىن جەڭىلدەتىلگەن سالىق، ۆاليۋتا، ۆيزا، ەڭبەك رەجىمدەرى بەرىلگەن. تاۋەلسىز سوت، حالىقارالىق اربيتراج ورتالىعى ادىلدىك پەن تاراپتاردىڭ قۇقىقتارىنىڭ قورعالۋىنا كەپىل بولادى.

«حالىقارالىق قارجى ورتالىعىنىڭ جوعارى تەحنولوگيالىق بيرجاسىن قۇرۋعا شاڭحاي قور بيرجاسى جانە امەريكالىق Nasdaq بيرجاسى تارتىلعان. حالىقارالىق قارجى ورتالىعى جاسىل، يسلامدىق جانە يننوۆاتسيالىق قارجى قۇرالدارىن دامىتاتىن بولادى. تۇرىك كومپانيالارىن وسى ورتالىق جۇمىسىنا قاتىسۋعا شاقىرامىن»، - دەدى نۇرسۇلتان نازاربايەۆ.

ايتا كەتەيىك، قازاقستان پرەزيدەنتىمەن كەزدەسۋگە تۇركيا ەكونوميكاسىنىڭ 15 پايىزىن قۇرايتىن 25 كومپانيانىڭ باسشىلارى قاتىستى. اتالعان كومپانيالار اۋىل شارۋاشىلىعى، تاماق ونەركاسىبى، گەولوگيا جانە تاۋ- كەن ءوندىرۋ ونەركاسىبى، حيميا ونەركاسىبى، ماشينا جاساۋ، جەڭىل ونەركاسىپ، دەنساۋلىق ساقتاۋ جانە فارماتسيەۆتيكا سالالارىندا جۇمىس ىستەيدى.