قازاقستان پرەزيدەنتى تۇرىك كومپانيالارىن تۇركىستاندى دامىتۋعا شاقىردى
«الەۋەتى زور سالالاردىڭ ءبىرى - تۋريزم. بۇل رەتتە ەكىجاقتى ىنتىماقتاستىقتىڭ پەرسپەكتيۆالى باعىتتارى رەتىندە اڭ اۋلاۋ، بالىق اۋلاۋ، مادەنيەت، ءبىلىم بەرۋ، مەديتسينالىق جانە باسقا دا تۋريزم تۇرلەرىن قاراستىرۋعا بولادى. تۇرىك كومپانيالارىنىڭ مول تاجىريبەسىن ەسكەرە وتىرىپ، ولاردى تۋريزم سالاسىن دامىتۋعا ەداۋىر ۇلەس قوسادى دەپ سەنەمىن. ونىڭ ۇستىنە وزدەرىڭىز بىلەسىزدەر، قازىر وزبەكستان مەن قازاقستان اراسىنداعى، بارلىعىمىزدىڭ ارامىزداعى جاعداي باسقاشا، دۇرىس بولىپ كەلە جاتىر. قىرعىزستاندا تۇرىك كەڭەسىن وتكىزدىك، قارىم-قاتىناستى جەتىلدىرەمىز دەپ ايتتىق. وسىعان بايلانىستى ءبىز كوپ جۇمىس ىستەۋىمىز كەرەك»، - دەدى نۇرسۇلتان نازاربايەۆ.
مەملەكەت باسشىسى ەلىمىز تۇركىستان قالاسىن وبلىس ورتالىعى دەپ جاريالاپ، اتالعان ورتالىقتى جەتىلدىرۋ ماقساتىندا جۇمىس باستاپ كەتكەنىن ايتتى.
«جاقىندا مەن بارلىق ماسەلەسىن قارادىم. وبلىستىڭ ورتالىعى سول جەرگە كوشىپ باردى، ەندى قۇرىلىستارىن جاساۋ كەرەك. تۇركىستان بارلىعىمىزدىڭ ورتاق رۋحاني ورتالىعىمىز. ءبىر جىلدا ميلليون تۋريس كەلدى. وسىعان سىزدەردىڭ دە كومەكتەرىڭىز تيەدى دەپ ويلايمىز»، - دەدى ەلباسى.
نۇرسۇلتان نازاربايەۆ قازاقستان ەكونوميكانى جەدەل جاڭعىرتۋعا، تەحنولوگيالار مەن يننوۆاتسيالاردى ەنگىزۋگە باعىت الىپ وتىرعاندىعىن دا ايتتى.
«وسىعان بايلانىستى بارلىق سالالاردى قامتيتىن «سيفرلىق قازاقستان» ارنايى مەملەكەتتىك باعدارلاماسى جۇزەگە اسىرىلۋدا. يننوۆاتسيالىق كلاستەرلەر جۇمىس ىستەۋدە. جاقىندا استانادا ІТ- ستارتاپتاردىڭ حالىقارالىق تەحنوپاركى اشىلدى. ول دۇنيەجۇزىنىڭ ІТ- كاسىپكەرلەرىن جانە ينۆەستورلارىن تارتىپ، تەحنولوگيالىق كومپانيالاردى قالىپتاستىرۋعا ىقپال ەتەدى. وسىنىڭ بارلىعىن ءتيىمدى ارىپتەستىككە مۇمكىندىك بەرەتىن الاڭ رەتىندە قاراستىرامىز»، - دەدى مەملەكەت باسشىسى.
