كوز تيۋ دەگەنىمىز نە؟
ادامنىڭ كوز تيۋگە دە، دۋاعا دا سەنبەگەنى دۇرىس. ءبىراق، وكىنىشكە وراي، ءبىر نارسەگە سەنبەۋ ءجۇز پايىزدىق قورعانىس اكەلمەيدى. كوز تيۋدەن، دۋادان دىنگە سەنەتىندەر دە، سەنبەيتىندەر دە، يدەاليستەر دە، ماتەرياليستەر دە، دەموكراتتار دا، كوممۋنيستەر دە ساقتاندىرىلماعان.
ەگەر ولاي بولماسا، وندا بارلىق بەلگىلەرى كوز تيۋ مەن دۋاعا ۇقساس سوزىلمالى قاجۋ سيندرومى پايدا بولماس ەدى. كەيبىر ادامدارمەن ارالاسۋ قۋانىش اكەلىپ، جاڭادان كۇش سىيلاسا، ەندى بىرەۋلەردەن قاتتى شارشاپ، ءوزىمىزدى جايسىز سەزىنەتىنىمىزدى ءبارى بىلەدى. ەگەر سول اداممەن بايلانىسىمىزدى ۇزسەك، وندا شارشاعاندىق باسىلسا، بۇل قاراپايىم ۆامپيرلىك. ال ەگەر ولاي بولماسا شە؟
بيوورىسى ءالسىز جانە مىنەزى ىنجىق ادامدارعا ءبيوورىسى كۇشتى جانە مىنەزى قاتتى كەز كەلگەن ادام كوز تيگىزە الادى. كوز تيۋ - بۇل ءبىر ادامنىڭ ەكىنشى ادامعا تەرىس بيوەنەرگەتيكالىق اسەرى. ول كوز تيگەن ادامنىڭ قورشاعان ورتامەن ەنەرگيا الماسۋىن بۇزادى. كوز وتكەن ادامنىڭ بيوورىسىندە ەنەرگەتيكالىق «تەسىكتەر» پايدا بولىپ، سولار ارقىلى ادام بويىنداعى ەنەرگيا اعىپ كەتەدى.
ءسىزدىڭ اعزاڭىز ەنەرگيا سىڭىرەتىن ءبىر نەمەسە بىرنەشە چاكرالار كەرىسىنشە جۇمىس ىستەي باستاعانىن ەلەستەتىڭىزشى. بۇل تەسىك بوشكە سياقتى، ىشىندەگى سۋ فونتان بولىپ اتقىلايدى. قالعان تەسىلمەگەن چاكرالار جۇمسالعان ەنەرگيانىڭ ورنىن تولتىرا المايدى. ونىڭ ۇستىنە ءار چاكرانىڭ ءوز مىندەتى بولادى. تاڭەرتەڭ ويانىپ، كەشكە جاتۋعا ءسىزدىڭ كۇشىڭىز جەتپەيدى. السىزدىك.
كوز تيۋ دەگەنىمىز - تەك ءسىزدىڭ تانىستارىڭىزدىڭ ءبىرىنىڭ سانالى تۇردە جاساعان جامان نيەتى ەمەس. ءسىزدىڭ كورشىڭىز «قىزىڭىز قانلاي ادەمى!» دەگەندە، ول كورشىڭىزدىڭ ءوزى دە ءسوزىنىڭ استارىنا ءمان بەرمەيدى، ال ءسوز استارىندا ونىڭ ءوز بالالارىنا كوڭىلى تولماۋى، ءىشتارلىق. باسقا بىرەۋدىڭ وزىنەن گورى باقىتتى ەكەنىن قالاماۋ جاتىر. ەگەر ونىڭ ەنەرگەتيكاسى كۇشتى بولسا، ونىڭ قىزىڭىزعا ايتقان جاقسى ءسوزى ەمەس، سانادان تىس بىلدىرىلگەن جاعىمسىز ويى ءتيۋى مۇمكىن. قىزىڭىز كەنەتتەن السىرەپ، ءجيى سۋىقتاپ قالا بەرەتىن بولادى. «كوز ءتيدى...». كوپتەگەن انالار بالالارىنىڭ سۋرەتتەرىن جۇمىس ورنىندا كوپشىلىكتىڭ كوز الدىندا ۇستايدى. بۇل دۇرىس ەمەس، ويتكەنى سۋرەت ارقىلى دا كوز ءتيۋى مۇمكىن.
ءسىزدى كورە سالا ماقتاي جونەلەتىن ادامداردان اۋلاق ءجۇرىڭىز، ويتكەنى ولاردىڭ سىلدىر ماقتاۋلارىنىڭ ارجاعىندا كوبىنەسە جايسىز ويلار جاسىرىنىپ جاتادى. ەگەر ءسىزدىڭ بيوەنەرگەتيكالىق قابىعى بەرىك بولماسا، وندا ونى تەسىپ ءوتۋ قيىن ەمەس.
ەگەر ءىشتارلىق پەن جاماندىق تىلەۋ سانالى تۇردە ءارى شىنايى بولسا، اشىق تۇردە ايتىلسا، ونىڭ جۇزەگە اسۋىنا مۇمكىندىك كوبىرەك. بۇنداي جاعدايدا ءتىپتى بيوەنەرگەتيكاسى ونشا دامىماعان ادامنىڭ ءوزى ايتارلىقتاي زيان كەلتىرە الادى. اسىرەسە، جەتى چاكرالاردىڭ ءبارى بۇلىگەنى اسا ءقاۋىپتى.
تەرىس بيوەنەرگەتيكالىق اسەرلەردى انىقتاۋدىڭ بىرنەشە تاسىلدەرى بار. كوز تيۋ مەن دۋانىڭ بەلگىلەرى ۇقساس. بارىنەن بۇرىن بۇل ايقىن كورىنەتىن پسيحيكالىق جانە فيزيكالىق استەنيا، شارشاۋ، قاجۋ، ءوزىن- ءوزى ۇستاي الماۋ، شىدامسىزدىق، توزىمسىزدىك، ۇيقىنىڭ بۇزىلۋى، ۇزاق دەنە ەڭبەگى مەن وي ەڭبەگىنە قابىلەتسىزدىك، قاتتى دىبىستاردى، جارىقتى، وتكىر ءيىستى جاقتىرماۋ.
پسيحيكالىق بەلگىلەرى، ادەتتە، قامىعۋدان، اشۋلانشاقتىقتان، ەرىك- كۇشىنىڭ جارتىلاي نەمەسە تولىق جوعالۋىنان كورىنەدى. تابەت قاشىپ، جۇيكە جۇيەسىنىڭ جۇمىسى بۇزىلادى. ءتۇرلى دارىگەرلەرگە بارىپ، ەم تاپپاعان كوز تيگەن نەمەسە دۋالانعان ادامداردىڭ پسيحياتريالىق اۋرۋحانالاردان ءبىر- اق شىعاتىنى ءجيى كەزدەسىپ جاتادى. پسيحياترلار بۇنداي ناۋقاستارعا شيزوفرەنيا اۋرۋى دەگەن دياگنوز قويادى. ءبىراق بۇنداي «شيزوفرەنيانى»، سول سياقتى باسقا دا پسيحيكالىق اۋرۋلاردى دارىگەرلەر دە، ناۋقاستاردىڭ وزدەرى دە ەمدەي المايدى.
كوز تيگەندى انىقتاۋ ءۇشىن ەمشىلەر ءتۇرلى تاسىلدەردى قولدانادى.
«رەنتگەن» انىقتاۋ ءتاسىلى كوز وتكەن چاكرالارداعى داقتاردى بىردەن كورسەتەدى. اۋرۋدى وزىڭىزگە قىرىن قاراتىپ قويىپ، ءبىر- بىرىنە پاراللەل قاراتىلعان الاقانداردى (ءبىرى كەۋدە جاقتا، ەكىنشىسى ارقادا) جوعارىدان تومەن قاراي جۇرگىزىپ، قاي جاقتان قاي چاكرا بۇزىلعاندىعىن انىقتاۋعا بولادى. ەمشىنىڭ قولى بۇزىلعان چاكرانىڭ تۇسىنا كەلگەندە تەبىلگەن قول كوز تيگەننىڭ ورنىن انىقتايدى.
كوز تيگەندى بيولوكاتسيا ادىستەرىمەن انىقتاۋدىڭ كەز كەلگەن اۋرۋدى انىقتاۋ تاسىلدەرىنەن ايىرماشىلىعى جوق. كوزدىڭ بيولوكاتسياسى رامكانىڭ، قولدىڭ جانە ماياتنيكتىڭ كومەگىمەن «سۇراق- جاۋاپ» ءادىسىن قولدانىپ جۇرگىزىلەدى. سۇراق- جاۋاپتاردىڭ مىسالدارى تومەندەگىدەي:
- مەنىڭ الدىمداعى ادامعا كوز ءتيدى مە؟
- ءيا.
- كوز تيۋ ادەيى جاسالعان با؟
- ءيا.
- ەر ادامنىڭ كوزى ءتيدى مە؟
- جوق.
- ايەل مە؟
- ءيا.
- ول ايەل ەلۋدە مە؟
- ءيا.
- ول اشىق سارى ما؟
- جوق.
- قارا تورى ما؟
- ءيا.
وسىلايشا كوز ءتيۋدىڭ قىر- سىرىن انىقتايتىن سۇراقتاردى قويۋعا بولادى.
ءتۇرلى ادىستەرمەن كوز تيگەندى انىقتاۋ بارىسىندا كوز ءتيۋدىڭ ءتۇرلى جاعدايلارى انىقتالىپ جاتادى. كوز ءتيۋدىڭ نەگىزگى سەبەپتەرى جانە قوزعاۋشى كۇشى ادامدار اراسىنداعى ءىشتارلىق، جاعىمسىز قارىم- قاتىناس، جەك كورۋشىلىك جانە باسقا تەرىس ەموتسيالار بولىپ تابىلادى. كوز تيۋ ادەيى جاسالعان جانە ويلاستىرىلماعان بولادى. ادەيى جاسالماعان كوز ءتيۋدىڭ باستى سەبەبى - مەنمەندىكتىڭ ەڭ ءبىر كۇشتى كورىنىسى - ءىشتارلىق. ءىشى تار ادامدار، ادەتتە، ۆامپيرلىكتەن زارداپ شەگەدى.
ءىشتارلىق دەگەنىمىز - باسقا ادامنىڭ جاقسى تىرشىلىگىنەن، تابىسىنان تۋىنداعان ساتسىزدىكتىڭ، رەنىشتىڭ سالدارى. ءىشتارلىق كۇشتى بولعان كەزدە، ءىشى تار ادامنىڭ ءبيووىرىسىنىڭ ءدىرىلى ول ءىشتارلىق كورسەتكەن ادامنىڭ ەنەرگەتيكالىق ورتالىقتارىنداعى (چاكرالارىنىڭ) كەۋدەنىڭ ءبىر جاعىنان بۇزادى. ناتيجەسىندە جۇپ شۇڭقىرلاردىڭ ءبىرى ءوزىنىڭ اينالىسىن جوعالتادى دا، كەۋدەنىڭ ەكىنشى جاعىنداعى ءوز جىلدامدىعى مەن ءدىرىلىن جوعالتپاعان شۇڭقىردىڭ اسەرىنەن وعان قاراما-قارسى ەمەس، ادام بيوورىسىنىڭ ىشىنە قاراي اينالا باستايدى. وسىلايشا چاكرا بوس جۇمىس ىستەيدى. بۇزىلعان چاكرانىڭ سانىنا بايلانىستى ادام اعزاسىنداعى ءتۇرلى ورگاندار مەن ورگاندار جۇيەسىنىڭ جۇمىستارى بۇزىلىپ، سودان كەيىن ورگانيكالىق وزگەرىستەر بەل الا باستايدى.
ەگەر كوز تيۋ ناتيجەسىندە ەنەرگەتيكالىق بۇزىلىس ءبىرىنشى چاكرادا ورىن السا، وندا ونىڭ باستاپقى بەلگىلەرى قامىعۋ جانە ۇرەي بولادى. ودان كەيىن ءيىس سەزۋ بۇزىلىپ، ءزار شىعارۋدىڭ تومەنگى بولىكتەرى مەن سىرتقى جىنىس ورگاندارىنىڭ جۇمىسىندا اقاۋ پايدا بولادى. پسيحولوگيالىق تۇراقسىزدىق پەن ءوز- وزىنە سەنىمسىزدىك تۋادى.
ەگەر كوز تيۋ ناتيجەسىندە ەكىنشى چاكرا بۇزىلسا، العاشقى بەلگىلەرى ىشكى جايسىزدىق پەن جىنىستىق نيەۆروزدار بولادى. سودان كەيىن ءزار شىعارۋ جۇيەسى (الدىمەن، ونىڭ ىشكى ورگاندارى) ، دەنى ساۋ ۇرپاق اكەلۋ قابىلەتى، ىشەك جۇمىسى بۇزىلادى.
كوز تيگەننەن بۇزىلعان ءۇشىنشى چاكرا جۇيكەلەردىڭ شوعىرلانعان جەرىندە جايسىزدىق، ۇرەي سەزىمىن تۋدىرىپ، اسقازان، باۋىر، ءوت قابى، ۆەگەتاتيۆتىك جۇيكە جۇيەسى جۇمىستارىن بۇزادى.
كوز ءتورتىنشى چاكرانى بۇزعان كەزدە كۇيزەلىس پايدا بولىپ، جۇرەك- قان تامىرلارى جۇيەسى اۋرۋعا ۇشىرايدى.
ەگەر كوز تيگەن ورىن بەسىنشى چاكرا بولسا، وندا مويىننىڭ الدىڭعى جاعىندا جايسىزدىق بايقالادى، ەموتسيونالدىق تۇراقسىزدىق ارتىپ، تىنىس الۋ ورگاندارى مەن جوعارعى ءبولىمنىڭ اس قورىتۋ ورگاندارىنىڭ، قالقانشا بەزىنىڭ اۋرۋلارى باستالادى، شىعارماشىلىق قابىلەتى مەن سۇلۋلىقتى سەزىنۋى تومەندەيدى.
التىنشى چاكراعا كوز تيۋ ورتالىق جۇيكە جۇيەسىنىڭ اۋرۋلارىنا، پسيحيكالىق اۋرۋلارعا (ميدىڭ تومەنگى بولىگىنىڭ زالالدانۋىنا)، سول كوزىڭ، قۇلاقتىڭ، مۇرىننىڭ اۋرۋلارىنا الىپ كەلەدى، ايلاۋ دەڭگەيى، زەيىندىلىك، ەرىك-كۇش تومەندەيدى.
جەتىنشى چاكراعا كوز تيگەندە بارىنەن بۇرىن ميدىڭ جوعارعى بولىگى مەن وڭ كوز زارداپ شەگەدى، قابىلداۋ قابىلەتى، رۋحانيلىق پەن تۇيسىك تومەندەيدى.
ەگەر كوز ءتيۋدىڭ نەگىزى ءىشتارلىق بولسا، ول ءبىر ادامنىڭ ەكىنشىسىنە دەگەن جەك كورۋشىلىگىنەن تۋىندايدى. جەك كورۋشىلىك - بىرەۋگە جاماندىق ويلاۋ، قاستىق، ىزا، جيىركەنىش.
جەك كورۋدىڭ بيوەنەرگەتيكالىق ءدىرىلى ءىشتارلىققا قاراعاندا الدەقايدا كۇشتى. ءىشتارلىق ەتۋشى ءوزىنىڭ قىزعانىشىن جاسىرا الادى، ال جەك كورگەن ادام كەرىسىنشە ءوزىن ۇستاي الماي، شيرىعىپ تۇرادى. ءىشتارلىق ناقتى ءبىر نىساندارعا باعىتتالادى: بىرەۋدىڭ ادەمىلىگىن، كۇشىن، دەنساۋلىعىن، زيالىلىعىن، دارىنىن جانە ت. ب. ەرەكشە قاسيەتتەرىن قىزعانۋ. سوندىقتان ءىشتارلىقتان بولعان كوز تيۋدە اعزانىڭ قانداي دا ءبىر ورگاندارى مەن جۇيەلەرىنىڭ جۇمىسىن باسقاراتىن چاكرالارعا زيان تيگىزەدى. ادەتتە، ادەيى جاسالماعان كوز تيۋدە ەكى- ءۇش چاكرادان ارتىق بۇلىنبەيدى.
جەك كورۋ ادەتتە ناقتى نەگىزدە نەمەسە سانادان تىس پايدا بولادى. قالاي بولعان كۇندە دە قاستىق، ىزا جانە جيىركەنۋ سەزىمدەرى ناقتى ءبىر ادامعا باعىتتالادى، سول ادام وعان جاۋ بولىپ كورىنەدى.
ادەيى جاسالعان كوز تيۋدە كۇشتى تەرىس (قارا) ەنەرگەتيكا ادامداردىڭ جەكەلەگەن چاكرالارىن عانا ەمەس، ولاردىڭ كوپشىلىگىن (تورتەۋدەن كەم ەمەس) نەمەسە بارلىعىن زاقىمدايدى، بۇل دەنساۋلىق ءۇشىن دە، كوز تيگەن ادامنىڭ ءومىرى ءۇشىن دە اسا ءقاۋىپتى.
«سۋعا كەتكەن تال قارمايدى» دەيدى. ال كوز تيگەن ادامنىڭ بۇنداي مۇمكىندىگى جوق. بۇل قاۋىپتى، وتە ءقاۋىپتى. كوز تيگەن ادام السىرەيدى. ال ءوزىن فيزيكالىق نەمەسە پسيحيكالىق جاعىنان كەمشىن سانايتىن ادامدار بۇنداي جاعدايدا قانداي دا ءبىر كۇشكە يە بولسا، وندا «كۇش باردا اقىلدىڭ كەرەگى جوق» قاعيداسىنا سۇيەنىپ، ءتۇرلى تەرىس ارەكەتتەرگە بارادى. دارىگەرلەرگە سەنسەك، سوزىلمالى قاجۋ سيندرومى - ينفەكسيا، ال ەمشىلەر بۇنى ەنەرگەتيكالىق ينفەكسيا دەپ قارايدى. ەگەر بۇل شىنىمەن دە ينفەكسيا بولاتىن بولسا، وندا ونىڭ كۇشى قانداي بولماق؟!
ادەيى جاسالعان كوز تيۋ، دۋانىڭ بەلگىلەرى ادەيى جاسالماعان كوز تيۋدەگى سياقتى، تەك ول اناعۇرلىم كۇشى جانە اسەر ەتۋ اۋماعى كەڭ بولادى. جانە وكىنىشتىسى، ادەيى تيگەن كوز ادەتتە وتە تەز بولادى.
دەرەككوزى: "ج ج" توپتاماسىنان
