قازاقستان، تۇرىكمەنستان مەن وزبەكستان شەكارالارىنىڭ ءتۇيىسۋ نۇكتەسى ايقىندالدى

استانا. قازاقپارات - بۇگىن پارلامەنت ءماجىلىسىنىڭ جالپى وتىرىسىندا «قازاقستان رەسپۋبليكاسى، تۇرىكمەنستان جانە وزبەكستان رەسپۋبليكاسى اراسىنداعى ءۇش مەملەكەتتىڭ مەملەكەتتىك شەكارالارىنىڭ ءتۇيىسۋ نۇكتەسىنىڭ اۋدانى تۋرالى شارتتى راتيفيكاتسيالاۋ تۋرالى» زاڭ جوباسى ماقۇلداندى.

 شارتتىڭ باستى ماقساتى - ءۇش مەملەكەتتىڭ شەكارالارىنىڭ ءتۇيىسۋ نۇكتەسىنىڭ ورنالاسقان جەرىن ايقىنداۋ بولىپ تابىلادى، دەپ حابارلايدى قازاقپارات.

شارتقا قازاقستان پرەزيدەنتى نۇرسۇلتان نازاربايەۆتىڭ ۇسىنىسىمەن ءۇش مەملەكەتتىڭ سىرتقى ساياسات ۆەدومستۆولارى باسشىلارىنىڭ دەڭگەيىندە 2017 -جىلدىڭ 10 - قاراشاسىندا سامارقاند قالاسىندا قول قويىلعان.

«ءۇش مەملەكەتتىڭ شەكاراسىنىڭ ءتۇيىسۋ نۇكتەسى ءۇستىرت اۋماعىندا ورنالاسقان. شەكارالاردىڭ ءتۇيىسۋ نۇكتەسىنىڭ ورنالاسقان جەرى جانە شەكارا سىزىعىنىڭ ءوتۋى شارتتىڭ اجىراماس بولىگى بولىپ تابىلادى. شارت مەرزىمسىز ءارى دەنونگساتسيالاۋعا جاتپايدى. قۇجاتتىڭ كۇشىنە ەنۋى ءۇش مەملەكەتتىڭ شەكارالارىنىڭ دەليميتاتسيالاۋ پروتسەسىنىڭ اياقتالۋىنا، اۋماقتىق داۋلاردىڭ تۋىنداۋىنىڭ الدىن الۋعا، ەلىمىزدىڭ ۇلتتىق قاۋىپسىزدىگىن نىعايتۋعا ىقپال ەتەدى» ، - دەيدى ق ر سىرتقى ىستەر ءمينيسترىنىڭ ءبىرىنشى ورىنباسارى مۇحتار تىلەۋبەردى.

ونىڭ سوزىنە قاراعاندا، بۇل شارت قازاقستاننىڭ مەملەكەتتىك شەكاراسىن دەليميتاتسيالاۋدى تولىعىمەن اياقتايتىن سوڭعى قۇجات بولىپ وتىر. ياعني، بۇل شارت قابىلدانعاننان سوڭ قازاقستاننىڭ مەملەكەتتىك شەكاراسى تولىعىمەن دەليميتاتسياسىن اياقتايدى دەگەن ءسوز.

ايتا كەتەرلىگى، قازاقستاننىڭ مەملەكەتتىك شەكاراسىن دەليميتاتسيالاۋ ماسەلەسىنە ەلباسى نۇرسۇلتان نازاربايەۆ تاۋەلسىزدىكتىڭ العاشقى كۇنىنەن باستاپ ەرەكشە نازار اۋدارىپ كەلەدى. بۇل رەتتە پرەزيدەنت «قازاقستاننىڭ اۋماقتىق تۇتاستىعى مەن تاۋەلسىزدىگىن ساقتاۋدان باسقا ارتىق ماڭىزدى مىندەت جوق» دەگەن بولاتىن. تالقىلاۋ بارىسىندا ءماجىلىس دەپۋتاتتارى وسىعان دا نازار اۋداردى. ماسەلەن، دەپۋتات قانات مۋسين ەلباسىنىڭ ەرەن كۇش سالۋى مەن حالىقارالىق ابىروي بەدەلىنىڭ ارقاسىندا قازاقستاننىڭ مەملەكەتتىك شەكاراسىن بەلگىلەپ، ونى زاڭدىق تۇرعىدان تانىتۋ باعىتىندا ۇلكەن جۇمىس جاسالعانىن العا تارتادى.

«قازىر قۇرلىقتاعى مەملەكەتتىك شەكارانىڭ بۇكىل پەريمەترلەرى بويىنداعى بارلىق شەكارالىق شەكتەر حالىقارالىق قۇقىقتىق نورمالار نەگىزىندە انىق رەتتەلىپ، زاڭدىق تۇرعىدا راسىمدەلدى. بۇگىنگى شارت شەكتەسىپ جاتقان ءۇش مەملەكەتتىڭ ءوزارا قۇرمەتىن، ەگەمەندى تەڭدىگىن جانە اۋماقتىق تۇتاستىعىن نىعايتۋ ءۇشىن مىقتى نەگىز جاسايدى» ، - دەيدى قانات مۋسين.

 ايتا كەتەيىك، شارتتىڭ راتيفيكاتسيالانعانى تۋرالى گراموتالار الماسقان كۇننەن باستاپ اتالعان قۇجات كۇشىنە ەنەدى.