تەلەگرام قوسىمشاسى ينتەرفەيسىنىڭ قازاقشاسى شىقتى
رەسەيلىك ج و و تۇلەگى 24 جاستاعى تيمۋر بەحەر ءوزىنىڭ سەرىكتەرىمەن قازاق ءتىلدى قاۋىمنىڭ تەلەگرامدى كەدەرگىسىز قولدانۋى ءۇشىن ينتەرفەيستى قازاقشالاۋدى قولعا العان.
بۇعان دەيىن موبيلدى قوسىمشا ينتەرفەيسىنىڭ 13 ءتىلدى نۇسقاسى بار بولاتىن.
«قازاقستاندىقتار ءۇشىن وتە قولايلى موبيلدى قوسىمشانىڭ قازاق ءتىلدى ينتەرفەيسىنىڭ بولماۋى مەن ءۇشىن تۇسىنىكسىز جايت. ەلىمىزدە قازاق ءتىلىن دامىتۋعا بايلانىستى كوپتەگەن جۇمىس اتقارىلىپ جاتىر، سوندىقتان ءبىز تەلەگرامدى قازاقشالاۋدى ءجون دەپ تاپتىق. ءوزىم قازاق ءتىلىن جەتىك مەڭگەرمەگەندىكتەن اۋدارماشى جالدادىم. جۇمىس وسىمەن ءبىتتى دەپ ايتا المايمىن، موبيلدى قوسىمشا ۋاقىت وتكەن سايىن جاڭارىپ وتىرادى. تيىسىنشە قولدانىسقا جاڭا سوزدەر ەنەدى»، - دەدى تيمۋر بەحەر.
جوبا اۆتورىنىڭ ايتۋىنشا، قازاقشا تەلەگرامدا قاتەلىكتەر بولۋى مۇمكىن. سوندىقتان قولدانۋشىلار تاراپىنان ەسكەرتۋلەر مەن ۇسىنىستار بولعان جاعدايدا سكرين-كوشىرمەنى @qz_gram دايرەكتىنە جولداي الادى.
تەلەگرام قولدانۋشىلارى ءوز مەسسەندجەرىن قازاقشا ينتەرفەيسكە اۋىستىرۋ ءۇشىن فايلدى @QazTransBot بوتىنان جۇكتەپ الىپ، نۇسقاۋلىق بويىنشا ورناتۋى ءتيىس. قازاق ءتىلدى نۇسقا iOS جانە Android پلاتفورمالارىندا قولجەتىمدى.
Telegram-region مالىمەتىنشە، تەلەگرام مەسسەندجەرى قازاقستاندا ەڭ كوپ جۇكتەلگەن موبيلدى قوسىمشالاردىڭ ءبىرى. ءار كۇن سايىن الەمدە اتالعان مەسسەندجەر قولدانۋشىلارىنىڭ سانى جارتى ميلليون ادامعا ارتىپ وتىرادى.
