تۇركياداعى قازاق اۋىلى جامبىل وبلىسى ۇجىمىنىڭ ونەرىن تاماشالاۋعا جينالدى
بۇل تۋرالى قازاقستاننىڭ تۇركياداعى ەلشىلىگىنەن ءمالىم ەتتى، دەپ حابارلايدى قازاقپارات.
«اسەم اۋەن» فولكلورلىق ءانسامبلى تۇركياداعى «انادولۋ» ءداستۇرلى فەستيۆالىنە قاتىسىپ جاتقانىن بۇعان دەيىن حابارلاعان بولاتىنبىز.
شىعارماشىلىق دەلەگاتسيانى كۇتىپ العان بور مۋنيتسيپاليتەتى مادەنيەت باسقارماسىنىڭ باسشىسى مەحمەت باش تاريحي ورىنداردى ارالاتىپ، كونە تيانا قالاشىعى اسپان استى مۋزەيىمەن تانىستىردى. كەشكىسىن 5 مىڭ ورىندىق امفيتەاتردا وتكەن كونتسەرتكە جاقىن ماڭداعى التاي قازاق اۋىلىنىڭ تۇرعىندارى ارنايى كەلدى. سونداي-اق شاراعا قازاقستاننىڭ تۇركياداعى ەلشىسى ابزال ساپاربەك ۇلى، نيگدە قالاسىنىڭ مەرى يىلماز شيمشەك، بور مۋنيتسيپاليتەتى مەرى سىتكى ەرات جانە باسقا دا لاۋازىمدى تۇلعالار مەن ب ا ق وكىلدەرى قاتىستى.
بيىل 15-مارتە ۇيىمداستىرىلىپ وتىرعان «انادولۋ» فەستيۆالىنە الىس-جاقىن تۇركىتىلدەس مەملەكەتتەردەن جانە تۇركيا اۋماعىنداعى بارلىق قالالار مەن پروۆينتسيالاردان شىعارماشىلىق توپتار شاقىرىلدى. ولار ون كۇن بويى انادولۋ جەرىن دۋمانعا بولەپ، ۇلتتىق فولكلورىن پاش ەتەتىن بولادى.
