قىتايلىق كومپانيالار قازاقستاندى بىرلەسىپ «سيفرلاندىرۋعا» شاقىرىلدى
بۇل تۋرالى بۇگىن «ءبىر بەلدەۋ - ءبىر جول» باستاماسىنىڭ 5 جىلدىعىنا ارنالعان قازاقستان-قىتاي بيزنەس فورۋمىندا ق ر ينۆەستيتسيالار جانە دامۋ ءمينيسترى جەڭىس قاسىمبەك ايتتى، دەپ حابارلايدى قازاقپارات ءتىلشىسى.
«بۇگىندە ءبىز ازىق- تۇلىك ونىمدەرىن وندىرۋگە ايرىقشا نازار اۋدارىپ، اۋىل شارۋاشىلىعى ونىمدەرىن وندىرۋشىلەر مەن وڭدەۋشىلەرگە مەملەكەتتىك قولداۋ قاراستىرىپ جاتىرمىز. وسىعان وراي قازاقستاندىق اۋىل شارۋاشىلىعى تاۋارلارىن ءوندىرۋشى كومپانيالار مەن قىتايلىق كومپانيالاردىڭ ازىق-تۇلىك ونىمدەرىن وندىرۋدە ىنتىماقتاستىقتى ارتتىرۋدا زور الەۋەتكە يە»، - دەدى جەڭىس قاسىمبەك.
مينيستر 2017-جىلى ەكونوميكا ءوسىمىنىڭ جاڭا مودەلىن قۇرۋ اياسىندا «سيفرلىق قازاقستان» مەملەكەتتىك باعدارلاما قابىلدانعانىن، ءتورتىنشى ونەركاسىپتىك ريەۆوليۋتسيانىڭ - 3D- پرينتەر، ونلاين- ساۋدا، ۇتقىر بانكينگ، سيفرلىق سەرۆيس، اۆتوماتتاندىرۋ، جاساندى ينتەللەكت جانە «ۇلكەن مالىمەتتەر» الماسۋ سىندى ەلەمەنتتەرىن ەنگىزۋدى ماقسات ەتەتىندىگىمىزدى اتاپ ءوتتى.
«قازىردىڭ وزىندە ەلىمىزدە نازاربايەۆ ۋنيۆەرسيتەتى جانە يننوۆاتسيالىق تەحنولوگيالار پاركى سياقتى يننوۆاتسيالىق كلاستەرلەر جۇمىس ىستەپ جاتىر. جاڭا حالىقارالىق ІТ- ستارتاپتار تەحنوپاركى اشىلماق. سوندىقتان ءبىز قىتايلىق ارىپتەستەرىمىزدى «سيفرلىق قازاقستان» باعدارلاماسىن جۇزەگە اسىرۋعا بەلسەندى قاتىسۋعا شاقىرامىز»، - دەدى جەڭىس قاسىمبەك.
