قازاقستان-وزبەكستان تاۋار اينالىمى قارقىندى دامۋدا - قارجى ءمينيسترى
«بىرىنشىدەن، الداعى ۋاقىتتا سالىقتىڭ بارلىق تۇرلەرى بويىنشا اقپارات الماسۋدى قالىپتاستىرىپ، سالىق قىزمەتتەرى اراسىنداعى ىنتىماقتاستىقتى ودان ءارى نىعايتۋ كوزدەلگەن. ەكىنشىدەن، ەكى ەلدىڭ ىشكى زاڭناماسىندا قاراستىرىلعان سالىق تولەۋدەن جالتارۋعا قارسى شارالاردى قولدانۋ جانە زاڭدى تۇلعالاردىڭ قوسارلانعان رەزيدەنتتىك پروبلەمالارىن شەشۋ ەسكەرىلگەن. ۇشىنشىدەن، كەيبىر قىزمەت تۇرلەرىن ىسكە اسىرعان كەزدە ولاردىڭ تابىستارىنا ءبىرىنشى كۇننەن باستاپ سالىق سالۋ قاراستىرىلعان»، - دەدى قارجى ءمينيسترى باقىت سۇلتانوۆ.
ونىڭ سوزىنە قاراعاندا، ەكى ەل اراسىندا تاۋار اينالىمى سوڭعى جىلدارى جاقسى قارقىنمەن دامىپ كەلە جاتىر. اتاپ ايتساق، تەك قانا وتكەن جىلدىڭ قورىتىندىسى بويىنشا تاۋار اينالىمى 2 ميلليارد ا ق ش دوللارىن قۇرادى. 2016-جىلمەن سالىستىرعاندا 31,2 پايىزعا ءوستى. ال بيىلعى جارتىجىلدىقتى الاتىن بولساق، تاۋار اينالىمى 1,2 ميلليارد ا ق ش دوللارىنا جەتىپ، بىلتىرعى سايكەس مەرزىمىمەن سالىستىرعاندا 35 پايىزعا ارتتى.
قازاقستان ەكسپورتىنىڭ نەگىزگى كورسەتكىشتەرى بيداي مەن ۇندى، رۋدالاردى، مىرىش كونسەنتراتىن قامتيدى. ال يمپورت قۇرلىمىندا تابيعي گاز، كوكونىستەر مەن جەمىستەر باسىمدىققا يە.
