استانادا وتباسىلىق دۋاتلون وتەدى
اتا-انالار مەن بالالاردان تۇراتىن كوماندالار باسەكەگە تۇسەتىن سپورتتىق جارىستى استانا قالاسىنىڭ مادەنيەت جانە سپورت باسقارماسى ۇيىمداستىرادى جانە بۇل شارا قازاقستاندا «وتباسى كۇنىن» مەرەكەلەۋگە ورايلاستىرىلعان.
ەكى سپورت تۇرىنەن جارىستار - ءۇش قاشىقتىققا جۇگىرۋ جانە ۆەلوجارىس ترياتلون پاركتە وتەدى. وتباسىلىق دۋاتلون ەستافەتا تۇرىندە بولادى. قاشىقتىقتىڭ جالپى ۇزىندىعى - 4,5 كيلومەتر.
جۇگىرۋ (اكە) - 2,1 كيلومەتر؛
ۆەلوجارىس (انا) - 2,1 كيلومەتر؛
جۇگىرۋ (بالا) - 300 مەتر.
جارىس جولىنا الدىمەن اكەلەر شىعادى. ولار 2,1 كيلومەتر جۇگىرەدى. ترانزيتتىك ايماقتا ەرلەر ەستافەتانى 2,1 كيلومەتر ۆەلوسيپەدپەن ءجۇرىپ وتەتىن انالارعا تاپسىرادى. جارىستى بالالار 300 مەتر جۇگىرۋمەن اياقتايدى. وتباسىلىق دۋاتلونعا 8-9، 10-11 جانە 12-13 جاس ساناتىنداعى بالالار قاتىسادى. اتا-انالاردىڭ جاسى ەسكەرىلمەيدى. ءار توپ بويىنشا جەڭىمپازدار قاشىقتىقتى باعىندىرۋعا جۇمسالعان ەڭ از ۋاقىت بويىنشا انىقتالادى. چەمپيوندارعا ديپلومدار مەن 1، II جانە III ورىندار ءۇشىن باعالى سىيلىقتار تابىستالادى. بارلىق قاتىسۋشىلارعا مەدالدار بەرىلەدى، سونداي-اق، تىركەۋ نومەرلەرى بويىنشا ۆەلوسيپەد ۇتىسى وتكىزىلەدى.
جارىسقا قاتىسۋ ءۇشىن ءوز ۆەلوسيپەدىڭىز بەن شلەم بولۋى كەرەك. شلەم بولماسا، كوماندا جارىسقا جىبەرىلمەيدى! سونىمەن قاتار، تىركەلۋ ءۇشىن جەكە كۋالىگىڭىز بەن بالانىڭ تۋۋ تۋرالى كۋالىگى بولۋى كەرەك.
قاتىسۋشىلاردى تىركەۋ ساعات 09:00-10:30 ارالعىندا جۇرگىزىلەدى. جارىس ساعات 11:00 دە باستالادى.
