قالا پروزاسىنا ارنالعان «قازاق پەن قالا» رەسپۋبليكالىق بايقاۋىن جاريالادى

استانا. قازاقپارات - رەسپۋبليكالىق «جاس الاش» گازەتى مەن «التىن قالام» قورى قازاقستان جازۋشىلار وداعىمەن بىرلەسىپ قالا پروزاسىنا ارنالعان «قازاق پەن قالا» رەسپۋبليكالىق بايقاۋىن جاريالادى، دەپ حابارلايدى قازاقپارات. بايقاۋعا الماتى اكىمدىگىنىڭ ىشكى ساياسات باسقارماسى قارجىلىق قولداۋ كورسەتىپ وتىر.

 «قازاق پروزاسىندا ءبىرلى- جارىم شىعارمالار بولماسا، قالانىڭ كۇندەلىكتى تىنىس- تىرشىلىگى مەن قالا ادامدارىنىڭ ويلاۋ جۇيەسى، دۇنيەتانىمى مەن مادەنيەتى، قازاقتىڭ قالاعا بەيىمدەلۋى ماسەلەلەرى - ءالى كۇنگە تولىق قامتىلماي كەلە جاتقان تاقىرىپ. بايقاۋدىڭ نەگىزگى ماقساتى - سوڭعى جىلدارى ءجيى كوتەرىلىپ جۇرگەن وسى ماسەلەگە - قازاق ادەبيەتىنىڭ قالا پروزاسى جانرىن دامىتۋعا ۇلەس قوسۋ. سونىمەن قاتار، جازۋشىلارعا شىعارماشىلىق قولداۋ كورسەتىپ، قازاق پروزاسىنىڭ تاقىرىپتىق اۋقىمىن كەڭەيتۋدى، قازاق جازۋشىلارىن قالا تاقىرىبىن يگەرۋگە ىنتالاندىرۋدى كوزدەيدى» دەلىنگەن جازۋشىلار وداعى تاراتقان حابارلامادا.

بايقاۋعا قاتىسۋشىلار قالانىڭ بۇگىنگى تىنىس- تىرشىلىگى مەن ونداعى تۇرعىنداردىڭ قيلى تاعدىرلارىن سۋرەتتەگەن پروزالىق شىعارمالارىن جولداي الادى. تۋىندىنىڭ كولەمىنە (اڭگىمە، پوۆەست، رومان) جانە قاتىسۋشىنىڭ جاسىنا شەكتەۋ قويىلمايدى. ۇسىنىلعان شىعارما بۇرىن ەشقايدا جاريالانباعان بولۋى ءتيىس.

شىعارمالار 5 - قىركۇيەكتەن باستاپ 30 - قاراشاعا دەيىن قابىلدانادى. بايقاۋ جەڭىمپازدارىن ەلگە بەلگىلى ادەبيەتشىلەر مەن اقىن- جازۋشىلاردان قۇرىلعان قازىلار القاسى انىقتايدى.

 «قازاق پەن قالا» رەسپۋبليكالىق بايقاۋىنىڭ 1-ورىن يەگەرىنە - 1 ميلليون، 2-ورىنعا - 500 مىڭ تەڭگە، 3-ورىنعا 300 مىڭ تەڭگە جۇلدە تىگىلگەن. سونىمەن قاتار، 200 مىڭ تەڭگە كولەمىندە ارنايى سىيلىقتار جانە 100 مىڭ تەڭگە ىنتالاندىرۋ سىيلىقتارى قاراستىرىلعان. بايقاۋ شارتتارىمەن مىنا جەردەن تولىق تانىسا الاسىزدار.

ايتا كەتۋ كەرەك، قالا پروزاسىنا ارنالعان بايقاۋ قازاقستاندا تۇڭعىش رەت وتكەلى وتىر.