ەلباسى قازاقستان حالقىن كونستيتۋتسيا كۇنىمەن قۇتتىقتادى
«قىمباتتى وتانداستار! بارشاڭىزدى قازاقستان رەسپۋبليكاسىنىڭ كونستيتۋتسياسى كۇنىمەن قۇتتىقتايمىن! ەلىمىزدىڭ اتا زاڭى ۋاقىت سىنىنان سۇرىنبەي ءوتىپ، تاريحي دامۋىمىزدىڭ جالپى ۇلتتىق باعدارىن ايقىنداۋدا باستى مانگە يە بولىپ وتىرعانىن دالەلدەدى.
كونستيتۋتسيا مەملەكەتتىلىگىمىزدىڭ بەرىك ىرگەتاسىن قالاي وتىرىپ، ىشكى ساياسي تۇراقتىلىقتى قامتاماسىز ەتۋگە جانە قازاقستان قوعامىن بىرىكتىرۋگە زور ۇلەس قوستى.
اتا زاڭىمىزدا جاريالانعان زاڭ ۇستەمدىگى، قۇقىقتار مەن بوستاندىقتاردىڭ مۇلتىكسىز ساقتالۋ قاعيداتتارى، الەۋمەتتىك كەپىلدىكتەر مەن جالپى ادامزاتقا ورتاق جوعارى قۇندىلىقتار ءاربىر ازاماتتىڭ جانىنا جاقىن ءارى تۇسىنىكتى»، - دەلىنگەن ەلباسىنىڭ قۇتتىقتاۋىندا.
سونداي- اق مەملەكەت باسشىسى قازىرگى كەزەڭدەگى قوعامدىق جانە مەملەكەتتىك قۇرىلىستىڭ كونستيتۋتسيالىق نورمالارى - بۇكىل قازاقستان حالقى ءۇشىن سەنىمدى بولاشاقتى قامتاماسىز ەتەتىن دايەكتى دامۋ مەن جاڭعىرۋ ۇدەرىستەرىنىڭ نەگىزى ەكەنىن اتاپ ءوتتى.
«وسى مەرەكەگە وراي بارشا قازاقستاندىقتارعا بەيبىت ءومىر، يگى باستامالار مەن باق- بەرەكە تىلەيمىن!»، - دەدى ن. نازاربايەۆ.
