نۇرسۇلتان نازاربايەۆ: قازاقستان - اتوم قارۋىنا قارسى كۇرەستە بۇكىل ەلدەردىڭ كوشباسشىسى
«1991 -جىلدىڭ 29 - تامىزىندا دۇنيە جۇزىندەگى الاپات يادرولىق سىناق پوليگونى مەنىڭ جارلىعىممەنەن جابىلعان بولاتىن. 1949 -جىلدان باستاپ سوۆەت وداعى كەزىندە 465 اتوم قارۋىن جارىپ، حالقىمىزعا زارداپ اكەلگەن ۇلكەن زۇلماتتى توقتاتتىق. سودان بەرى، مىنەكەي، ءبىزدىڭ ىستەگەن شارۋامىزدى دۇنيە ءجۇزى باعالاپ، بىرىككەن ۇلتتار ۇيىمىنىڭ الدىندا دۇنيەجۇزى حالىقتارىنىڭ اتوم قارۋىنا قارسى ءىس- شاراسى كۇنى دەپ قابىلداندى. سوندىقتان، ءبىز ءۇشىن بۇل - مەرەكە. بۇل قازاقستانعا، قازاققا بەرگەن دۇنيە ءجۇزى قاۋىمداستىعىنىڭ ۇلكەن باعاسى دەپ ساناۋ كەرەك»، - دەدى نۇرسۇلتان نازاربايەۆ.
پرەزيدەنت ەكىنشىدەن، كونستيتۋتسيامىزدىڭ كۇنى وسى شارامەن تۇسپا- تۇس كەلىپ وتىرعانىن ەسكە سالدى.
«سوندىقتان، ەلىمىزدىڭ اتوم قارۋىنا قارسى بۇكىل ەلدەردىڭ كوشباسشىسى اتاعى بار. ونى ءبىز ورىنداپ كەلە جاتىرمىز. استانامىز كوپ حالىقارالىق ۇيىمداردىڭ كەزدەسەتىن، ماسەلەلەرىن شەشەتىن جەرىنە اينالدى. ەندى، مىنەكەي، بۇگىن مىناداي ۇلكەن مونۋمەنت اشايىن دەپ وتىرمىز. اقتوبەلىكتەردىڭ استانانىڭ 20 جىلدىعىنا جاساعان سىيلىعى بۇل. مونۋمەنتتىڭ سيمۆولى - «اتوم قارۋىنا قارسى كۇرەسۋ قاجەت» . ءبىز وسىلاي دەپ ادامزاتقا جار سالامىز. كەلەر ۇرپاققا وتكەننىڭ تاعىلىمىن ۇمىتپاڭدار دەپ وسىنداي ۇلگى قالدىرامىز»، - دەدى مەملەكەت باسشىسى.
ەسكە سالا كەتسەك، اقتوبە وبلىسى استانانىڭ 20 جىلدىعىنا «بەيبىتشىلىك قابىرعاسى» مونۋمەنتىن سىيعا تارتتى. مونۋمەنتتىڭ اشىلۋ سالتاناتىنا مەملەكەت باسشىسى نۇرسۇلتان نازاربايەۆ قاتىستى.
اۆتور: ايان بەكەن ۇلى
