ەلباسىنىڭ قاتىسۋىمەن استانادا «بەيبىتشىلىك قابىرعاسى» مونۋمەنتى اشىلدى
شاراعا ديپلوماتيالىق ميسسيالاردىڭ جەتەكشىلەرى، كورنەكتى مەملەكەت جانە قوعام قايراتكەرلەرى، پارلامەنت دەپۋتاتتارى، زيالى قاۋىم وكىلدەرى، اقتوبە وبلىسىنىڭ دەلەگاتسياسى، سونىمە بىرگە استانادا ءوتىپ جاتقان حالىقارالىق كەلىسىمشارت ۇيىمىنىڭ قاتىسۋشىلارى قاتىستى.
اقتوبەلىكتەردىڭ بىرەگەي تارتۋى تاۋەلسىزدىك الاڭىنىڭ كورنەكتى تۇسىنا، «قازاق ەلى» مونۋمەنتىنە جاقىن جەردە سالىنعان.
جوبا نەگىزىنە پرەزيدەنتتىڭ «الەم. ХХІ عاسىر» انتيادرولىق مانيفەستىنىڭ يدەياسى ەنگىزىلگەن، سوندىقتان نىسان ءدال 29 - تامىز - حالىقارالىق يادرولىق سىناقتارعا قارسى ارەكەت كۇنىندە اشىلىپ وتىر. وسىدان تۋرا 27 جىل بۇرىن پرەزيدەنت جارلىعىمەن سەمەي يادرولىق سىناق الاڭى جابىلعان بولاتىن. بۇل - الەمدەگى ەڭ ءىرى يادرولىق قارۋى بار ەلدىڭ ءبىرىنىڭ ودان باس تارتۋ پروتسەسىنىڭ باستالۋى ەدى.
ساۋلەتشىلەر اتاپ وتكەندەي، قابىرعا ءبىرتۇتاس بىرىكتىرىپ، قورعاپ تۇراتىن جاپىراق تارىزدەس شاتىردى بەينەلەيدى. ياعني، ءداستۇرلى تۇرىك قۇرىلتايىنىڭ ونەگەسىمەن ۇلتتاردى ۇيىستىرىپ، ولاردى ءبىر شاڭىراقتىڭ استىنا جينايدى.
مەتالل مەن تابيعي تاستان تۇرعىزىلعان كەشەن ءۇش بولىكتەن تۇرادى. ءبىرىنشى بولىگى - بولشەكتەۋ مەن وقشاۋلاۋدى، ەكىنشى بولىگى - ءۇمىت، ەركىندىك پەن تاۋەلسىزدىكتى، ءۇشىنشىسى بەيبىتشىلىك پەن ۇلتارالىق كەلىسىمدى ساقتاۋ جولىن بەينەلەيدى. مونۋمەنتتىڭ جالپى ۇزىندىعى - 111 مەتر، ەنى - 18,4 مەتر، بيىكتىگى 17,5 مەتر.
«بەيبىتشىلىك قابىرعاسىنىڭ» تۇرقى ءتوزىمدى ءارى بەرىك تەمىردەن جاسالعان. مونۋمەنتتى تۇرعىزۋعا جالپى اۋماعى 6 مىڭ تەكشە مەتر بولاتىن 1200 توننا گرانيت پايدالانىلادى. مەموريالدا الەمنىڭ 51 تىلىندە «بەيبىتشىلىك» دەگەن ءسوز جازىلعان.
اۆتورلار جوبانىڭ كورنەكتى مازمۇنعا عانا ەمەس، ونىڭ فۋنكتسيونالدىعىنا دا ءجىتى ءمان بەرگەن. اسپالى شاتىردىڭ اشىق پانەلدەرى 2,5 ميلليون جارىق نۇكتەسى بار 616 تەكشە مەتردى الىپ جاتقان LED جۇيەگە يە. ول كەز كەلگەن ۇلكەن كولەمدەگى ساندىق دۇنيەنى تاراتۋعا مۇمكىندىك بەرەدى. ەكرانعا شىعارۋ ەۋروپالىق ءونىم وندىرۋشىلەردىڭ ەڭ سوڭعى ۇلگىدەگى ۆيدەو، اۋديو جانە كوممۋتاتسيالىق جابدىقتار ورناتىلعان سەرۆەرلىك بولمەلەردە جۇزەگە اسىرىلادى. سول سەبەپتى بۇل تاڭعاجايىپ ارت- نىسان - ساياسي، مادەني- بۇقارالىق، اقپاراتتىق شارالاردى، لازەرلىك جانە باسقا شوۋلاردى وتكىزەتىن تاماشا ورىنعا اينالماق.
قۇنى 1,8 ميلليارد تەڭگە تۇراتىن «بەيبىتشىلىك قابىرعاسى» اقتوبە وبلىسى اۋماعىندا جۇمىس ىستەيتىن كومپانيالار مەن كاسىپكەرلەردىڭ قارجىسىنا سالىنعانىن ايتا كەتكەن ءجون. ولاردىڭ قاتارىنا «ERG» ، «قازمۇنايگاز» ، «BIGroup» ، «اقتوبەساۋلەت» ج ش س، «استانا- دوستروي» ج ش س، «بابەكقۇرىلىس» ج ش س جانە تاعى باسقالارى بار.
