قازاقستاندا ەكستروكورپورالدى ۇرىقتاندىرۋ ارقىلى قانشا بالا دۇنيەگە كەلدى

استانا. قازاقپارات - مىندەتتى مەديتسينالىق ساقتاندىرۋدى ەنگىزۋ ەكستروكورپورالدى ۇرىقتاندىرۋدى قاجەت ەتەتىن ءاربىر ايەلگە مۇمكىنشىلىك بەرەدى.

 بۇل جايىندا قازاقپارات تىلشىسىنە سۇحبات بەرگەن ەلىمىزدەگى ەڭ ءبىرىنشى ەكستروكورپورالدى ۇرىقتاندىرۋ زەرتحاناسىنىڭ نەگىزىن قالاعان بيولوگيا عىلىمدارىنىڭ دوكتورى سالتانات بايقوشقاروۆا ايتتى.

«2020 -جىلدان باستاپ مىندەتتى الەۋمەتتىك مەديتسينالىق ساقتاندىرۋ ەنگىزىلەدى. بۇل ءاربىر ايەلگە جىلىنا تىم بولماعاندا ءبىر رەت ەكستروكورپورالدى ۇرىقتاندىرۋدى تەگىن جاساتۋعا مۇمكىندىك بەرەتىن بولادى»، - دەدى ول.

ونىڭ دەرەگىنشە، 2010 -جىلدان بەرى قازاقستاندا مەملەكەتتىڭ قاراجاتى ەسەبىنەن ەكستروكورپورالدى ۇرىقتاندىرۋ ارقىلى 1500 بالا دۇنيەگە كەلگەن.

«ەگەر مەملەكەتتىك كۆوتا جايىندا ايتار بولسا، وندا 2010 -جىلدان بەرى 1500 بالا دۇنيەگە كەلدى. مەنىڭشە، بۇل وتە ۇلكەن ناتيجە. سەبەبى ەرلى- زايىتىلاردىڭ بارلىعىنىڭ بىردەي رەپرودۋكتيۆتى دەنساۋلىعى كىناراتسىز بولماعان كەزدە دە وڭ ناتيجەلەر بار. نەبارى 700-800 مىڭ تەڭگەگە مۇنداي ناتيجەگە قول جەتكىزۋ كەرەمەت دەپ ەسەپتەيمىن. ويتكەنى، وزگە ەلدەرگە قاراعاندا ءبىزدىڭ مەملەكەتىمىزدە ەكستروكورپورالدى ۇرىقتاندىرۋ ارزان. ەكى، كەيدە ءۇش، ءتىپتى 10 ەسە ارزان بولىپ كەلەدى. ءبىراق، بىزدە ءدارى- دارمەك وتە قىمبات. سەبەبى ولاردىڭ بارلىعىن شەتەلدەن ساتىپ الامىز»، - دەدى سالتانات بايقوشقاروۆا.

ونىڭ سوزىنە قاراعاندا، بۇرىندارى ەكستروكورپورالدى ۇرىقتاندىرۋ زەرتحاناسىنا 40-تان اسقان ايەلدەر جۇگىنىپ كەلسە، قازىرگى ۋاقىتتا جۇگىنەتىن ايەلدەردىڭ ورتاشا جاسى 35- ءتى قۇرايدى.

«بۇل ادامدار ءبىرشاما ساۋاتتى بولا ءتۇستى جانە ەكستروكورپورالدى ۇرىقتاندىرۋدىڭ نە ەكەنىن بىلەدى دەگەن ءسوز»، - دەدى ول.

قازاقستاندا 2010 -جىلمەن سالىستىرعاندا ەكستروكورپورالدى ۇرىقتاندىرۋعا بولىنەتىن كۆوتا كولەمى 9 ەسە ارتتى. «بەدەۋلىكتى ەمدەۋ سالاسىنا مەملەكەتتىك قولداۋ تۇراقتى تۇردە كورسەتىلەدى. بەدەۋلىكتى ەمدەۋ ءۇشىن دياگنوستيكالاۋ، كونسەرۆاتيۆتى ءارى جەدەل ەمدەۋ - مۇنىڭ بارلىعى كۆتو ارقىلى تەگىن جاسالادى. ءبىراق، ەكستروكورپورالدى ۇرىقتاندىرۋ وتە جوعارى رەپوردۋكتيۆتى تەحنولوگيا سانالادى. ونىڭ شىعىنى جوعارى بولعاندىقتان 2010 -جىلدان بەرى كۆوتا ءبولىنىپ كەلەدى. الايدا، مەملەكەت قاراجاتىمەن بارلىق قاجەتتىلىكتى جابۋ مۇمكىن ەمەس. سوندا دا مەملەكەت 2010 -جىلى 100 كۆوتا بولگەن بولاتىن. ال بۇگىندە كۆوتا سانى 9 ەسە ارتىپ، اعىمداعى جىلى 900 گە جەتتى»، - دەدى سالتانات بايقوشقاروۆا.

ونىڭ سوزىنە قاراعاندا، ءاربىر كۆوتاعا شامامەن 700 مىڭ تەڭگە بولىنەدى. دەگەنمەن، بۇگىنگى كۇنى بۇل قاراجات جەتكىلىكسىز بولىپ وتىر.

«اتالعان سومانىڭ جارتىسى ءدارى- دارمەككە كەتەدى. بۇل قاراجات تەحنولوگياعا جەتپەيدى. ويتكەنى، 8 جىلدىڭ ىشىندە الەمدە تەحنولوگيا وزگەرىپ كەتكەن. نەگىزىنەن كرەوكونسەرۆاتسيا، سەگمەنتاتسيا سيكلى جۇرگىزىلەدى. ياعني، ءبىر سيكلدە الىنعان جۇمىرتقا جاسۋشاسىن ءبولۋ، ءبىر- ەكى نەمەسە 1 ايدان كەيىن ۇرىقتاردى اۋىستىرۋ قاجەت. ال وعان قوسىمشا قاراجات كەرەك. سوندىقتان قازىر بولىنەتىن قاراجاتتى قايتا قاراستىرعان ءجون»، - دەدى ول.

اۆتور: مارلان جيەمباي