بۇگىن ەلىمىزدىڭ باسىم بولىگىندە كۇن بۇزىلادى

استانا. قازاقپارات - ەلىمىزدىڭ سولتۇستىگى، ورتالىعى مەن شىعىسىنا تسيكلون جانە سونىمەن بايلانىستى اتموسفەرالىق تۇتاس بۇلتتار اسەر ەتىپ، سالدارىنان جاۋىن-شاشىن بولادى.

كۇن كۇركىرەپ، كۇشتى جەل سوعادى، سولتۇستىكتە بۇرشاق جاۋۋى مۇمكىن. قازاقستاننىڭ باتىسىندا، وڭتۇستىگى مەن وڭتۇستىك-شىعىسىندا كۇن اشىق بولادى، دەپ حابارلايدى قازاقپارات قازگيدرومەتكە سىلتەمە جاساپ.

اقمولا جانە قاراعاندى وبلىستارىنىڭ كەي جەرلەرىندە جەل كۇشەيىپ، ەكپىنى 15-20 م/س بولادى. كۇندىز بۇرشاق جاۋۋى ىقتيمال.

قوستاناي وبلىسىندا تۇندە جانە كۇندىز قاتتى جەل تۇرادى. جەلدىڭ قارقىنى سەكۋندىنا 15-20 مەترگە دەيىن جەتەدى.

سولتۇستىك قازاقستان وبلىسىنىڭ اۋماعىندا تۇندە جانە تاڭەرتەڭ تۇمان ءتۇسىپ، كۇندىز جەل 15-20 م/س دەيىن كۇشەيەدى. بۇرشاق كۇتىلەدى.

اقتوبە، پاۆلودار وبلىستارىندا جانە كۇندىز جامبىل وبلىسىنىڭ كەي ايماقتارىندا ەكپىنى 15-20 م/س بولاتىن قاتتى جەل تۇرادى.

قىزىلوردا وبلىسىنىڭ كەي جەرلەرىندە دە كۇندىز جەل كۇشەيىپ، 15-20 م/س قۇرايدى. شاڭدى داۋىل تۇرادى.

قىزىلوردا، جامبىل، تۇركىستان، سونداي-اق اقتوبە، اتىراۋ، ماڭعىستاۋ، باتىس قازاقستان جانە قاراعاندى وبلىستارىنىڭ كەي ايماقتارىندا توتەنشە ءورت قاۋپى ساقتالادى.