قازاقستان پرەزيدەنتى «ەمبى مۇنايگاز» اكسيونەرلىك قوعامىنا باردى
وندا ەلباسىعا سيفرلىق زياتكەرلىك كەن ورنىنىڭ جۇيەسى كورسەتىلدى. بۇل ناقتى ۋاقىت رەجىمىندە ونەركاسىپ نىساندارىنان تۇسەتىن اۋقىمدى مالىمەتتەردى وڭدەۋگە، شۇعىل شەشىم قابىلداۋ ماقساتىمەن ولارعا ءارى قاراي تالداۋ جاساۋعا، سونداي- اق كەن ورىندارىنداعى ءوندىرۋ ۇدەرىسىن جاقسارتۋعا مۇمكىندىك بەرەدى.
نۇرسۇلتان نازاربايەۆ كەن ورىندارىنا سيفرلاندىرۋ ەلەمەنتتەرىن ەنگىزۋدىڭ ارقاسىندا ەڭبەك ونىمدىلىگى ارتىپ، قۇرىلعىلاردى جوندەۋ مەرزىمىنىڭ جانە ءبىرىن- ءبىرى قايتالايتىن قۇرىلىمداردىڭ قىسقارعانىن ايتىپ، تۇپكى ناتيجە باستاپقى شىعىننان ەكى ەسە جانە ودان دا كوبىرەك بولاتىنىن اتاپ ءوتتى.
- مۇناي ءوندىرۋدىڭ قازىرگى ادىستەرىمەن عانا شەكتەلمەي، زاماناۋي تاسىلدەردى دە قولدانۋ قاجەت. ەڭ الدىمەن، قىزمەتكەرلەردى وزىق تەحنولوگيالارمەن جۇمىس ىستەي بىلۋگە ۇيرەتۋ كەرەك، - دەدى قازاقستان پرەزيدەنتى.
«سامۇرىق- قازىنا» اكسيونەرلىك قوعامى باسقارماسىنىڭ ءتوراعاسى احمەتجان ەسىموۆ مەملەكەت باسشىسىنا «ۇلتتىق يندۋستريالىق مۇناي حيمياسى تەحنوپاركى» ارنايى ەكونوميكالىق ايماعى قىزمەتىنىڭ نەگىزگى ناتيجەلەرى تۋرالى باياندادى.
سونىمەن قاتار، قازاقستان پرەزيدەنتىنە اتىراۋ قالاسى ينجەنەرلىك جەلىسىنىڭ ەلەكتروندى سىزبالارىنا، اۋىل شارۋاشىلىعىنا ارنالعان جەرلەرگە، كەڭ تارالعان پايدالى قازبالار ورىندارىنا جانە وڭىردەگى جەرلەردى پايدالانۋ شارتتارىنا، سونداي- اق مەملەكەتتىك قىزمەتكە ەلەكتروندى فورماتتا تاپسىرىس بەرۋگە نەمەسە مەملەكەتتىك ورگانعا ءوتىنىش جولداۋعا ونلاين- مونيتورينگ جاساۋ ءۇشىن مۇمكىندىك تۋعىزاتىن اتىراۋ وبلىسىنىڭ گەواقپاراتتىق پورتالىنىڭ جۇمىسى تانىستىرىلدى.
اتىراۋ وبلىسىنىڭ اكىمى اتالعان ەلەكتروندى رەسۋرستىڭ ەنگىزىلۋى ءوڭىردىڭ ينۆەستيتسيالىق تارتىمدىلىعىن ارتتىرۋعا، بيزنەس- پروتسەستى اۆتوماتتاندىرۋعا، مەملەكەتتىك قىزمەت كورسەتۋ ساپاسىن جاقسارتۋعا، سونداي- اق سىبايلاس جەمقورلىق قاتەرىن جانە جەردى پايدالانۋ شارتتارىنىڭ بۇزىلۋىن ازايتۋعا مۇمكىندىك بەرەتىنىن ايتتى.
