اسەت يسەكەشەۆ مۇعالىمدەرگە قانشا پاتەر بەرىلەتىنىن ايتتى
استانا قالاسىنىڭ اكىمى اسەت يسەكەشەۆتىڭ ايتۋىنشا، الداعى بەس جىلدا ونداعان جاڭا مەكتەپ اشىلادى. سونىڭ بارىنە 5000-نان استام مۇعالىم قاجەت بولادى. «وسىعان بايلانىستى قالا اكىمدىگى مىقتى مامانداردى تارتىپ، ولارعا جاعداي جاساۋ جاعىن ويلاستىرىپ كەلەدى. سوڭعى ون جىلدىڭ ىشىندە مەملەكەتتىك باعدارلاما اياسىندا استانالىق مۇعالىمدەرگە 2500-دەن استام پاتەر بەرىلدى. دەگەنمەن، قالا ءوسىپ كەلەدى. ەندى، بىزگە بارلىق سالالار بويىنشا مىقتى مامانداردىڭ كورپۋسىن قالىپتاستىرۋ قاجەت.
ولاردىڭ ىشىندە مۇعالىمدەر، پوليتسەيلەر، دارىگەرلەر، ءورت سوندىرۋشىلەر جانە تاعى باسقا ماماندار بار. قازىر مەملەكەت باسشىسىنىڭ باستاماسىمەن «7-20-25» باعدارلاماسىنىڭ قولعا الىنعانىن ءبارىمىز جاقسى بىلەمىز. كاسىبي ماماندار كورپۋسىن قولداۋ ماقساتىندا ءبىز وسى ساناتتاعى قىزمەتكەرلەردى باسپانامەن قامتۋ تەتىكتەرىن ازىرلەيمىز. ءسويتىپ، تۇرعىن ءۇي قۇرىلىس جيناق بانكىمەن بىرگە بيۋدجەتتىك سالانىڭ 10 مىڭ قىزمەتكەرىن پاتەرمەن قامتاماسىز ەتەمىز. سونىڭ ىشىندە 3 مىڭداي پاتەر مۇعالىمدەرگە تاراتىلادى»، - دەدى ءا. يسەكەشەۆ ءبىلىم باسقارماسىنىڭ ۇيىمداستىرۋىمەن وتكەن تامىز كونفەرەنسياسىندا.
ايتا كەتەيىك، بۇگىندە رەسپۋبليكا بويىنشا ءبىر مەكتەپكە شامامەن 800-1500 وقۋشى كەلەدى. ال ەلوردادا اتالعان كورسەتكىش 1500-گە جەتىپ وتىر. الداعى بەس جىلدا استاناعا تاعى 120 مىڭنان استام وقۋشى كەلەدى دەگەن بولجام بار.
«2011 -جىلى ەلوردا مەكتەپتەرىندە 75 مىڭ وقۋشى وقىسا، بىلتىر اتالعان كورسەتكىش 140 مىڭعا جەتتى. بيىل 155 مىڭ وقۋشى بولادى دەپ وتىرمىز. وسىعان بايلانىستى الداعى بەس جىلدا مەملەكەتتىك بيۋدجەتتىڭ ەسەبىنەن 24 مەكتەپ سالىنادى»، - دەيدى ءا. يسەكەشەۆ.
اۆتور: ارمان اسقاروۆ
