ەلباسىنىڭ مۇنايشىلارعا ءازىلى: اتىراۋعا ايتشىلاپ كەلدىم
«تابىستى بولىڭدار، مۇنايشىلار ءۇشىن ماڭىزدى، جاقسى ءوندىرىس ورنى، جاقسى جۇمىس ەكەن» ، - دەدى زاۋىتتىڭ تىنىس- تىرشىلىگىمەن جان- جاقتى تانىسقاننان كەيىن جۇمىسشىلارمەن تىلدەسكەن ەلباسى.
وسى رەتتە كاسىپورىن جۇمىسشىلارىنىڭ ءبىرى ەلىمىزدىڭ تىنىشتىعى، حالقىمىزدىڭ اماندىعى پرەزيدەنتتىڭ جۇرگىزىپ وتىرعان ساياساتىنىڭ ارقاسى ەكەندىگىن باسا ايتتى.
«سىزگە كوپ- كوپ راحمەت. قۇربان ايت قۇتتى بولسىن، ايتتان ايتقا جەتە بەرەيىك» ، - دەدى ول.
«قۇربان ايتقا سەندەرگە ايتشىلاپ كەلدىم عوي» ، - دەپ ازىلدەدى ەلباسى.
كاسىپورىندا دانەكەرلەۋشى بولىپ جۇمىس ىستەيتىن قاراعاندىلىق ەكاتەرينا دا ەلباسىنا جىلى لەبىزىن ءبىلدىردى.
«مەن ءسىزدىڭ قاراعاندىلىق جەرلەسىڭىزبىن. ءتىپتى مەن سىزبەن ءبىر ۋنيۆەرسيتەتتە ءبىلىم الىپپىن. تەك ءسىزدىڭ زامانىڭىزدا قاراعاندى پوليتەحنيكالىق ينستيتۋتى بولسا، قازىر قاراعاندى تەحنيكالىق ۋنيۆەرسيتەتى دەپ اتالادى. سول جەردە ءبىلىم الدىم، ماگيستراتۋرادا وقىپ، ۇستازدىق تا ەتتىم. سودان كەيىن وندىرىسكە اۋىسىپ، اتىراۋدا ءبىر جىل بولدى جۇمىس ىستەپ جاتىرمىن» ، - دەيدى ول.
ءوز كەزەگىندە مەملەكەت باسشىسى دانەركەرلەۋشى ماماندىعىنىڭ وتە ماڭىزدى ەكەندىگىن اتاپ ءوتتى. سونىمەن قاتار ەلباسى بارلىق ءوندىرىس وشاقتارىندا تسيفرلاندىرۋ جۇرگىزىلىپ، جۇمىس ورىندارىنىڭ وڭتايلاندىرىلىپ جاتقانىن ايتتى.
«جاڭا ءىس دۇرىس تا. ءبىراق، ول كوپتەگەن ماماندىقتاردىڭ قىسقارۋىمەن قاتار جۇرەدى. قازىر ادامعا ومىرىندە بىرنەشە ماماندىق اۋىستىرۋىنا تۋرا كەلەدى. ونسىز بولمايدى. كاسىپورىندارىڭىز جاڭا ەكەن، وسى جەردە جۇمىس ىستەۋ وزدەرىڭىزگە دە ۇنايتىن شىعار» ، - دەدى نۇرسۇلتان نازاربايەۆ.
اۆتور: مارلان جيەمباي
