نۇرسۇلتان نازاربايەۆ اتىراۋعا كەلدى
ەلباسى وڭىرگە ساپارى اياسىندا ماكارون، نان ونىمدەرىن، ەت كونسەرۆىلەرىن، اۋىز سۋ، ارنايى كيىم-كەشەك شىعاراتىن «كارات» ج ش س جۇمىسىمەن تانىسىپ، جىلىنا 2800 مىڭ توننا مۇناي مەن 170 ميلليون تەكشە مەتر ىلەسپە گاز وندىرەتىن «ەمبى مۇناي گاز» ا ق- نىڭ جاڭا اكىمشىلىك عيماراتىن ارالاپ كورەدى دەپ كۇتىلۋدە.
مۇنان بولەك قازاقستان پرەزيدەنتى «جىگەر مۇناي سەرۆيس» ج ش س- ءنىڭ روبوت دانەكەرلەۋشىنى پايدالانىپ مەتال قۇرىلىمدارىن وندىرەتىن ۇيىمىندا بولماق.
ساپار اياسىندا نۇرسۇلتان نازاربايەۆ ح. دوسمۇحامەدوۆ اتىنداعى اتىراۋ مەملەكەتتىك ۋنيۆەرسيتەتىنىڭ جاڭا ستۋدەنتتەر ءۇيىن كورەدى. 450 ورىنعا ەسەپتەلگەن 7 قاباتتى جاتاقحانا قۇرىلىسىنا 1 ميلليارد تەڭگەدەن استام قارجى جۇمسالعان. عيماراتتا جاستاردىڭ جايلى ءومىر ءسۇرىپ، ساپالى ءبىلىم الۋىنا بارلىق جاعداي جاسالعان.
مەملەكەت باسشىسى وڭىردەگى الەۋمەتتىك ماڭىزى بار نىسانداردى ارالاعاننان كەيىن اتىراۋ وبلىسىنىڭ الەۋمەتتىك-ەكونوميكالىق دامۋ ماسەلەلەرى جونىندە كەڭەس وتكىزەدى دەپ كۇتىلۋدە.
