ازيا ويىندارى: قازاقستاندىق سپورتشىلاردىڭ العاشقى لەگى دجاكارتاعا جەتتى

استانا. قازاقپارات - ازيا ويىندارىنا اتتانعان قازاقستان قۇراماسىنىڭ سپورتشىلارى دجاكارتا مەن پالەمبانگتاعى اتلەتيكالىق اۋىلدارعا كەلدى، دەپ حابارلايدى قازاقپارات ق ر ۇ و ك- ءنىڭ باسپا ءسوز قىزمەتىنە سىلتەمە جاساپ.

ەستەرىڭىزگە سالا كەتەيىك، قازاقستان قۇراماسى سپورتشىلارىنىڭ باسىم بولىگى 12- تامىز كۇنى الماتىدان دجاكارتاعا اتتانعان بولاتىن. سپورتشىلاردى جۋرناليستەر مەن جانكۇيەرلەر جانە باسشىلىق قۇرام ءسات-ساپار تىلەپ، АІВА اكادەمياسىنان سالتاناتتى تۇردە شىعارىپ سالعان بولاتىن.

جازعى ازيا ويىندارى 18- تامىز كۇنى باستالادى. اتالعان ويىندارعا قازاقستان ۇلتتىق قۇراماسى اتىنان 440 سپورتشى قاتىسادى، ونىڭ ىشىندەگى 404 سپورتشى 25 وليمپيادالىق سپورت تۇرىنەن باق سىنايدى.

دجاكارتاداعى (يندونەزيا) ازيا ويىندارىندا جالپى ەسەبى 462 مەدالدار جيىنتىعى ساراپقا سالىنادى، ونىڭ ىشىندە 363 جۇلدە وليمپيادالىق سپورت تۇرلەرىنەن ءوز يەسىن تاپپاق. تاعى ءبىر ايتا كەتەرلىگى، بيىل ازيا ويىندارىنىڭ باعدارلاماسىنان نىسانا كوزدەۋ جانە ستەند اتۋدان كوماندالىق جارىس پەن بوكستان ەرلەر اراسىندا اۋىر سالماق دارەجەلەرى (81 كەلى، 91 كەلى، 91+ كەلى) الىنىپ تاستالدى.

قۇرلىق دوداسى دجاكارتا جانە پالەمبانگ قالالارىندا وتەدى. اتلەتيكالىق اۋىلدار ەكى قالادا دا ورنالاسقان.

دجاكارتادا سپورتتىڭ مىنا تۇرلەرىنەن جارىس وتەدى: جەڭىل اتلەتيكا، بوكس، دزيۋدو، كۇرەس تۇرلەرى، ۆەلوسپورت (ترەك، شوسسە، ماۋتينبايك)، سۋ دوبى، قازىرگى بەسسايىس، تاەكۆوندو، سەمسەرلەسۋ، كاراتە، رەگبي، سۋدا ءجۇزۋ، گاندبول، سينحروندى ءجۇزۋ، ساداق اتۋ، كوركەم گيمناستيكا، جەلكەندى سپورت، كوگالداعى حوككەي، ەسكەك ەسۋ (سلالوم)، سپورتتىق گيمناستيكا، ۆولەيبول، گولف، باسكەتبول، باسكەتبول 3x3، باتۋتتا سەكىرۋ.

پالەمبانگتا سپورتتىڭ مىنا تۇرلەرىنەن جەڭىمپازدار انىقتالادى: اكادەميالىق ەسۋ، بايداركا مەن كانوەدە ەسۋ، نىسانا كوزدەۋ، ستەند اتۋ، ترياتلون، جاعاجاي ۆولەيبولى، سپورتتىق قۇزعا ورمەلەۋ، تەننيس.

اۆتور: كۇنسۇلتان وتارباي