كورەيا ەلشىسى كارىس ۇلتىنىڭ ءداستۇرلى ۇيلەنۋ تويىنا قازاق شاپانىمەن كەلدى
وعان سەبەپ استاناداعى وڭتۇستىك كورەيا ەلشىلىگى قىزمەتكەرىنىڭ تۇرمىس قۇرۋى. ونىڭ ءداستۇرلى ۇيلەنۋ ءراسىمى تۋرالى ۇسىنىسىن كۇيەۋى قۋانا قولداعان.
مۇنداي اسەرلى ءراسىمدى ۇيىمداستىرۋعا وڭتۇستىك كورەيانىڭ تەگۋ قالاسىندا ورنالاسقان «دوسان» ءداستۇرلى كورەي ەتيكەتى ورتالىعى كومەكتەسكەن.
كورەي حالقىندا نەكە - جاڭا ءومىردىڭ باستاۋى بولىپ سانالادى جانە وعان اسقان جاۋاپكەرشىلىكپەن قارايدى.
ۇزاق ءارى ءماندى عۇمىر ءسۇرسىن دەگەن نيەتپەن توي داستارحانىنا تاۋىق پەن اتەش قويادى. تالشىن مەن قۇرما - مۇراگەردىڭ اقىلدى يا تاربيەلى بولىپ وسۋىنە ءۇمىتتى بىلدىرەدى. سونداي- اق، ۇستەلدە ۇزاق جۇبايلىق عۇمىردى بىلدىرەتىن كوپجىلدىق وسىمدىك تۇرۋى ءتيىس. تازالىق پەن ادالدىقتىڭ بەلگىسى رەتىندە بامبۋك قويىلادى. كۇرىش - اماندىق پەن ىرىس- نەسىبەنى بىلدىرەدى. باتا رەتىندە بالاۋىز شام جاعىلادى.
بارلىق قوناقتار تويعا كورەيدىڭ ۇلتتىق كيىمى - حانبوكتى كيىپ كەلدى. تەك قازاقستانداعى وڭتۇستىك كورەيا ەلشىسى كيم دە سيك پەن ونىڭ ايەلى قازاقتىڭ ۇلتتىق كيىمىمەن كەلدى.
«ماعان قازاق مادەنيەتى ۇنايدى. قازاق پەن كورەي مادەنيەتى قاتتى ۇقسايدى. مەنىڭ بۇگىنگى كيىمىم - قازاق مادەنيەتىنە دەگەن العىس پەن قۇرمەتىمدى بىلدىرەدى»، - دەدى ەلشى جۋرناليستەرگە بەرگەن سۇحباتىندا.
«جاقىندا ءماجىلىس دەپۋتاتى رومان كيم ماعان قامشى سىيلادى. ۇنەمى كوش الدىندا ءجۇرۋىمدى، قازاق- كورەي دوستىعىن نىعايتا بەرۋىمدى تىلەدى. قامشى كوشباسشىلىق قاسيەتتى بىلدىرەدى ەكەن. مەن ءۇشىن بۇل سىيلىق وتە قۇندى. ودان بولەك، ۇيىمدە ايشا ءبيبى كەسەنەسىنىڭ ۇلگىسى بار. كەلگەن قوناقتارىمنىڭ بارلىعىنا قازاقتىڭ رومەو مەن دجۋلەتتاسى تۋرالى اسەرلى دە قايعىلى وقيعاسىن ايتىپ بەرەمىن»، - دەدى ەلشى.
