ۇلتتىق بانك تەڭگەنىڭ السىرەۋ سەبەبىن ايتتى

استانا. قازاقپارات - ق ر ۇلتتىق بانكى تەڭگەنىڭ السىرەۋىنە قانداي جاعدايلاردىڭ تۇرتكى بولعانىن جاريا ەتتى، دەپ حابارلايدى قازاقپارات ءتىلشىسى.

«2018 -جىلعى 9 -تامىزدا تەڭگە باعامى وتكەن كۇنمەن سالىستىرعاندا ءبىر ا ق ش دوللارى ءۇشىن 354,06 تەڭگە دەڭگەيىنە دەيىن نەمەسە 1,6 پايىزعا السىرەدى. بۇل رەسەيگە قاتىستى سانكتسيالاردى قاتاڭداتۋ تاۋەكەلدەرىنىڭ كۇشەيۋى جانە مۇناي باعاسىنىڭ تومەندەۋى اياسىندا ءرۋبلدىڭ قۇنسىزدانۋىنىڭ سالدارىنان بولدى»، - دەلىنگەن ۇلتتىق بانك تاراتقان اقپاراتتا.

رەسەي رۋبلى ا ق ش دوللارىنا قاتىستى ءبىر كۇندە 4,2 پايىزعا (63,6-دان 66,3-كە دەيىن) جانە ەۋروعا قاتىستى %4,1 عا (73,8-دەن 76,8-گە دەيىن) السىرەدى.

ا ق ش سەناتورلارىنىڭ رەسەيگە قارسى سانكسيالارى جايىنداعى جاڭا زاڭ جوباسى تۋرالى اقپارات رۋبلدىڭ السىرەۋىنە سەبەپ بولدى. ول زاڭ جوباسى رەسەي فەدەراتسياسىنىڭ مەملەكەتتىك بورىشىن قارجىلاندىرۋعا جانە رەسەيدىڭ ءبىرقاتار جەتەكشى بانكتەرىنىڭ مۇلكىمەن مامىلەلەرگە شەكتەۋ سالۋدى كوزدەيدى. زاڭ جوباسى قابىلدانعان جاعدايدا 2018 -جىلعى 22 -تامىزدا كۇشىنە ەنۋى مۇمكىن.

رەسەي رۋبلىمەن بولىپ جاتقان اعىمداعى احۋال، نەگىزىنەن، ساياسي فاكتورلارمەن تۇسىندىرىلەدى جانە نارىققا قاتىسۋشىلاردىڭ كۇتۋلەرىنە نەگىزدەلەدى. امەريكانىڭ مۇناي ونىمدەرىنە قىتايدىڭ باج سالىقتارىن ەنگىزۋ مۇمكىندىگى تۋرالى اقپارات اياسىندا Brent ماركالى مۇناي باعاسى ءبىر باررەل ءۇشىن 72 دوللارعا دەيىن تومەندەدى.

«قازىرگى ۋاقىتتا باعامنىڭ بەلگىلەنۋى ۇلتتىق بانكتىڭ قاتىسۋىنسىز ءجۇرىپ جاتىر. ۇلتتىق بانك ۆاليۋتا نارىعىنداعى احۋالعا ۇنەمى مونيتورينگ جۇرگىزىپ وتىر جانە قاجەت بولعان جاعدايدا تەڭگە باعامىنىڭ ايتارلىقتاي جانە تۇراقسىزدىق تۋدىراتىن قىسقا مەرزىمدى اۋىتقۋلارىن رەتتەۋگە باعىتتالعان وكتەمدىكتەردى جۇزەگە اسىرۋعا دايىن»، - دەپ اتاپ وتەدى ۇلتتىق بانكتىڭ باسپا ءسوز قىزمەتى.