دەنساۋلىق مينيسترلىگى قاجىلارعا تۇيەلەر كوپ جينالاتىن جەرگە جاقىنداماۋعا كەڭەس بەردى

استانا. قازاقپارات - ق ر د س م قوعامدىق دەنساۋلىق ساقتاۋ كوميتەتى قاجىلىققا باراتىندار ءۇشىن جادىنامانى جاريالادى، دەپ حابارلايدى قازاقپارات كوميتەتتىڭ باسپا ءسوز قىزمەتىنە سىلتەمە جاساپ.

قاجىلىققا جىل سايىن الەمنىڭ 160 ەلىنەن 2 ميلليوننان استام ادام قاتىسادى.

ساۋد ارابياسى كوروناۆيرۋستىق ينفەكسيا، مەنينگوكوكك ينفەكسياسى بويىنشا قولايسىز ەل بولىپ تابىلادى.

دۇنيەجۇزىلىك دەنساۋلىق ساقتاۋ ۇيىمىنىڭ دەرەكتەرى بويىنشا 2012 -جىلدان باستاپ قازىرگى كەزگە دەيىن الەمدە تاياۋ شىعىس رەسپيراتورلىق سيندرومىنىڭ كوروناۆيرۋسىمەن اۋىرۋدىڭ زەرتحانالىق تۇردە راستالعان 2103 جاعدايى تىركەلگەن، ونىڭ ىشىندە 730 ى ولىممەن اياقتالعان، ونىڭ %80 دان استامى ساۋد ارابياسىندا.

كوروناۆيرۋستىق ينفەكسيا - بۇل ايقىن ۋلانۋمەن جانە رەسپيراتورلىق جولداردىڭ جوعارى بولىكتەرىنىڭ زاقىمدانۋىمەن سيپاتتالاتىن (كوپ مولشەردە سەروزدى ءبولىندىسى بار رينيت، السىزدىك، السىرەۋ، تاماعىنىڭ جىبىرلاۋى، قۇرعاق جوتەل) رەسپيراتورلىق اۋرۋ. اۋرۋدىڭ اعىمى اۋىر بولعان كەزدە مۇمكىن بولاتىن ءولىم جاعدايىمەن جوعارى پنيەۆمونيا داميدى.

مەنينگوكوكك ينفەكسياسى - مەنينگوكوككتان پايدا بولاتىن، باس مي قابىعىنىڭ قابىنۋمەن وتەتىن ءجىتى ينفەكسيالىق اۋرۋ. اۋرۋ اۋا- تامشى جولىمەن (جوتەلگەندە، تۇشكىرگەندە، سويلەسكەندە) بەرىلەدى. اۋرۋ كوزى تەك قانا ناۋقاس ادام نەمەسە ينفەكسيا تاسىمالداۋشىسى بولىپ تابىلادى، ينفەكسيا كوزى رەتىندە مەنينگوكوككتى نازوفارينگيتپەن اۋىراتىن ناۋقاستار قاۋىپتى، سەبەبى ولار جوتەلگەندە، تۇشكىرگەندە قوزدىرعىشى سىرتقى ورتاعا بەلسەندى تارالادى.

قاجىلىق كەزىندە 2000 -جىلدارى مەنينگوكوكك ينفەكسياسىنىڭ ورشۋىنە بايلانىستى ساۋد ارابياسى كورولدىگىنىڭ دەنساۋلىق ساقتاۋ مينيسترىلىگىنىڭ قاجىلاردى قاجىلىققا دايىنداۋ ماسەلەسىنە قوياتىن ماڭىزدى تالاپتارىنىڭ ءبىرى دارىگەر قورىتىندىسىمەن مەديتسينالىق تەكسەرۋدى جۇرگىزۋ جانە مىندەتتى تۇردە مەنينگوكوكك ينفەكتسياسىنا قارسى ۆاكسيناتسيالاۋ بولىپ تابىلادى.

پروفيلاكتيكالىق ەگۋلەر تۋرالى مالىمەتتەر ۆيزانى رەسىمدەۋ كەزىندە جانە ساۋد ارابياسىنا كىرەردە ۇسىنىلاتىن ءتيىستى سەرتيفيكاتتاردا كورسەتىلۋى ءتيىس.

«قاجىلىق كەزىندە ادامدار كوپ جينالاتىن جەرلەردە بولعان كەزدە جەكە پروفيلاكتيكا شارالارىن ەسكەرۋ قاجەت:

- قولدى سابىنمەن ءجيى جۋۋ، دەزينفەكسيالايتىن سۋلىقتاردى پايدالانۋ؛

- جوتەلگەن جانە تۇشكىرگەن كەزدە سۋلىقتى پايدالانۋ؛

- اۋىرعان ادامدارمەن قارىم-قاتىناستا بولماۋ جانە ولاردىڭ جەكە زاتتارىن پايدالانباۋ؛

- ادامدار كوپ جينالاتىن جەرلەردە مۇمكىندىگىنشە ءبىر رەت قولدانىلاتىن بەتپەردەلەردى پايدالانۋ؛

- تۇيەلەر كوپ جينالاتىن جەرلەرگە جاقىنداماۋ جانە ولارمەن تىكەلەي جاناسپاۋ؛

- قايناتىلماعان جانە پاستەرلەنبەگەن تۇيە ءسۇتىن پايدالانباۋ، سونداي-اق ۇيىمداستىرىلماعان ساۋدا ورىندارىنان تاماق ونىمدەرىن ساتىپ الماۋ؛

- ءوزىن ءجايسىز سەزىنۋدىڭ كەز كەلگەن بەلگىلەرى پايدا بولعان كەزدە دارىگەرگە جۇگىنۋ؛

- ساپاردان قايتىپ كەلگەن كەزدە جانە اۋرۋدىڭ كەز كەلگەن بەلگىلەرى (قالتىراۋ، دەنە قىزۋىنىڭ كوتەرىلۋى، السىرەۋ، تاماعىنىڭ اۋرۋى جانە باسقالار) پايدا بولعان جاعدايدا جاقىندا قاجىلىققا بارعاندىعى تۋرالى دارىگەردى حاباردار ەتە وتىرىپ، دەرەۋ مەديتسينالىق ۇيىمعا جۇگىنۋ قاجەت»، - دەلىنگەن باسپا ءسوز حابارلاماسىندا.

ەسكە سالا كەتەيىك، ەرتەڭ قازاقستاندىق مۇسىلماندار قاجىلىق ساپارعا اتتانادى.