قازاقستاندىق بالەت جۇلدىزى يتالياندىقتاردىڭ سۇيىسپەنشىلىگىنە بولەندى

 استانا. قازاقپارات - كوپتەگەن بەدەلدى حالىقارالىق بايقاۋلاردىڭ گران- پري يەگەرى، «استانا وپەرا» تەاترىنىڭ جەتەكشى ءسوليسى باقتيار ادامجان العاش رەت ⅩⅩ عاسىرداعى كورنەكتى حورەوگراف رولان پەتيدىڭ قويىلىمىنداعى «بوزبالا مەن اجال» بالەتىندەگى بوزبالا باستى ءرولىن سومدادى.

 بۇل تۋرالى قازاقپارات تەاتردىڭ باسپا ءسوز قىزمەتىنە سىلتەمە جاساپ حابارلايدى.

قويىلىم اتى اڭىزعا اينالعان ءبيشى ءارى حورەوگراف رۋدولف نۋرەيەۆكە ارنالعان Tributo a Rudolf Nureyev حالىقارالىق گالا- بالەتى اياسىندا 28 - شىلدە كۇنى ءبىزدىڭ داۋىرىمىزگە دەيىنگى I  عاسىردان بەرى ساقتالىپ كەلە جاتقان كونە ريمدىك امفيتەاتر، سپولەتو (يتاليا) ريم تەاترىنىڭ اشىق ساحناسىندا وتكەن بولاتىن. الەمدىك بالەت جۇلدىزدارىنىڭ ورىنداۋىندا كورەرمەندەرگە ر. نۋرەيەۆتىڭ رەپەرتۋارىنان نومىرلەر ۇسىنىلدى.

رولان پەتيدىڭ «بوزبالا مەن اجال» ءبىر ءبولىمدى اتاقتى بالەتى 1946 -جىلى يوگانن سەباستيان باحتىڭ پاسساكاليا مۋزىكاسىنا قويىلدى، وعان ارقاۋ بولعان جان كوكتونىڭ ولەڭمەن جازىلعان ليبرەتتوسى. گالا- بالەتكە ارناپ قويىلىمدى جۇزەگە اسىرعان ر. پەتيدىڭ اسسيستەنتى - بالەتمەيستەر لۋيدجي بونينو، ول ءوزى دە ءبىر كەزدەرى بوزبالانىڭ پارتياسىن ورىنداعان بولاتىن. باقتيار ادامجاننىڭ ساحناداعى سەرىگى بولعان ايگىلى ميلاندىق لا سكالا تەاترىنىڭ پريما- بالەريناسى نيكولەتتا مانني.

 بۇدان بولەك، باقتيار ادامجان وسى كەشتە ۆەنگريا مەملەكەتتىك وپەراسىنىڭ پريماسى تاتيانا مەلنيكپەن ل. مينكۋستىڭ «دون كيحوت» بالەتىنەن پا- دە- دەنى ورىندادى. يتالياندىق كورەرمەن قاۋىم ب. ادامجاننىڭ ءاربىر ساحناعا كوتەرىلۋىن تولاسسىز قوشەمەتپەن قارسى الىپ، قازاقستاندىق بالەت جۇلدىزىن زور سۇيىنىشپەن قابىلدادى.