استانادا كارتينامەن بەزەندىرىلگەن ءۇي پايدا بولدى

استانا. قازاقپارات - استانا ۇيلەرىنىڭ ءبىرىنىڭ سىرتقى قابىرعاسى قاستەيەۆ اتىنداعى مۋزەيدەن جينالعان قازاقستاندىق كلاسسيكتەردىڭ تۋىندىلارىمەن تولىقتى. بۇل جونىندە سارىارقا اۋدانىنىڭ اكىمى ارمان تۇرلىبەك ءمالىم ەتتى، دەپ حابارلايدى قازاقپارات ءتىلشىسى.

«Urban Art Astana دالا ونەرى فەستيۆالى وسىمەن ءتامام. 15- ماۋسىمدا باستاۋ العان شارا قالامىزعا قازاقستاندىق جانە شەتەلدىك سۋرەتشىلەردىڭ 8 تۋىندىسىن سىيعا تارتتى. استانالىقتار گراففيتيدىڭ باسىم كوپشىلىگىن ءوز كوزدەرىمەن كورىپ، ۇيرەنىپ قالعان بولسا، بۇگىن مامبەتوۆ كوشەسى، 5-ۇيدە تولىقتاي ءبىر تۋىندىعا كۋا بولادى. قالا ارباتى كۇننەن كۇنگە ۇزارىپ كەلەدى»، - دەپ جازدى ارمان تۇرلىبەك Facebook پاراقشاسىندا.

ءا. قاستەيەۆ اتىنداعى ونەر مۋزەيىنەن جينالعان قازاقستاندىق ونەر كلاسسيكتەرىنىڭ تۋىندىلارىمەن بەزەندىرىلگەن ءۇي اشىق اسپان استىنداعى گالەرەيا ىسپەتتەس.

«بۇل جەردە تۇرسىن ءابۋوۆ، ءابىلحان قاستەيەۆ، گۇلفايرۋس ىسمايىلوۆا، شايماردان ساريەۆ، عاني بايانوۆ، ماريا ليزوگۋب جانە ايشا عالىمبايەۆا سىندى تانىمال اۆتورلاردىڭ جۇمىستارىن تاماشالاي الاسىزدار. ونىڭ اتاۋى كوپ ۇزاماي «تانىمال كارتينالى ءۇي» دەپ اتالىپ كەتەتىنىنە سەنىمدىمىن. بۇرىن بۇل اۋدان تەك كەڭسە عيماراتتارى ورنالاسقان تىنىش جەر بولسا، ەندى قالا تۇرعىندارى مەن قوناقتارى ءجيى سەرۋەندەيتىن قىزىقتى ورىنعا اينالارى ءسوزسىز»، - دەدى اكىم.