شەتەلدىك كاسىپكەرلەردى قازاقستاندا قانداي ماسەلەلەر مازالايدى

استانا. قازاقپارات - ق ر ۇلتتىق ەكونوميكا مينيسترلىگى بارلىق ديپلوماتتاردى جيناپ، قازاقستاننىڭ ەكونوميكاسىن دامىتۋ سالاسىنداعى جوسپارلاردى تانىستىردى.

وسى ورايدا ەلشىلەر كوكەيدە جۇرگەن سۇراقتارىن قويدى، دەپ حابارلايدى قازاقپارات ءتىلشىسى.

نيدەرلاندى ەلشىسى ديرك يان كوپتىڭ ايتۋىنشا، تازا ەكونوميكالىق كورسەتكىشتەرمەن بيزنەس ورتانى جاقسارتۋ مۇمكىن ەمەس. زاڭ ۇستەمدىگى بولماسا، ينۆەستورلار كەلۋگە اسىقپايدى. «ءبىز قازاقستاننىڭ ءىرى ينۆەستورى ءارى ارىپتەسى رەتىندە وسى ەلدىڭ دامۋىنا مۇددەلىمىز. ەكونوميكالىق ىنتىماقتاستىق جانە دامۋ ۇيىمىنا مۇشە بولۋعا دەگەن قۇلشىنىسىڭىز دا قۋانتادى. سەبەبى وعان دامىعان 30 مەملەكەت كىرەدى. ءبىراق اتالعان ۇيىمنىڭ رەيتينگىندە ەكونوميكالىق ينديكاتورلار مەن زاڭ ۇستەمدىگى اراسىندا تىعىز بايلانىس بار. ونىڭ ىشىندە سىبايلاس جەمقورلىقپەن كۇرەس، ادام قۇقىقتارى جانە تاعى باسقا ماسەلەلەر ەسكەرىلەدى. سوندىقتان تازا ەكونوميكالىق يندەكسكە باسىمدىق بەرمەي، باسقا دا كورسەتكىشتەردى جەتىلدىرۋ كەرەك. سوندا عانا بيزنەس كليمات جاقسارادى»، - دەدى د. يان كوپ.

ق ر ۇلتتىق ەكونوميكا ۆيتسە-ءمينيسترى ءمادينا جۇنىسبەكوۆانىڭ ايتۋىنشا، بۇگىندە ەل ۇكىمەت ازاماتتاردىڭ قۇقىقتارىن قورعاۋ، جالپى زاڭ ۇستەمدىگى ماسەلەسىنە باسا نازار اۋدارىپ كەلەدى. «ارينە، تازا ەكونوميكالىق كورسەتكىشتەرمەن كەتە بەرۋگە بولمايدى. ءبىز ونى جاقسى تۇسىنەمىز. ماسەلەن، ءسىز سىبايلاس جەمقورلىق تۋرالى ايتتىڭىز. قازاقستان سىبايلاس جەمقورلىقپەن كۇرەس بويىنشا ستامبۋل جوسپارىنا قوسىلعان بولاتىن. وسى سالادا ناتيجەلى جۇمىس اتقارىلىپ كەلەدى. ادام قۇقىقتارىن قورعاۋ شارالارى دا قولعا الىندى. پرەزيدەنتتىڭ بەس ينستيتۋتسيونالدى رەفورماسى بار. اتالعان ماقساتتار زاڭ ۇستەمىدىگىن كۇشەيتۋدى كوزدەيدى»، - دەپ اتاپ كورسەتتى م. جۇنىسبەكوۆا.

ال ليۆان ەلشىسى ۆازكەن كاۆلاكيان ينفلياتسيانىڭ دەڭگەيىن تومەندەتۋگە قاتىستى سۇراق قويدى. «وتكەن جىلى ەكونوميكالىق ءوسىم 4 پروتسەنتتى قۇرادى دەدىڭىز. ولاي بولسا، نەگە ينفلياتسيانىڭ دەڭگەيى 7,1 پروتسەنت بولدى؟ ونى تومەندەتۋ ءۇشىن نە ىستەپ جاتىرسىزدار؟»، - دەپ سۇرادى ۆ. كاۆلاكيان.

ۆيتسە-مينيستر ءمادينا جۇنىسبەكوۆانىڭ سوزىنە قاراعاندا، ينفلياتسيانىڭ دەڭگەيى 7,8 پروتسەنت بولعان. اتالعان كورسەتكىشتى تومەندەتۋگە قاتىستى جوسپارلار بار. «بيىل ءبىز 2025-جىلعا دەيىنگى ستراتەگيالىق جوسپاردى قابىلدادىق. بۇدان بولەك، باسقا دا جوسپارلار ماقۇلدانادى. 2025-جىلعا دەيىن ينفلياتسيانىڭ دەڭگەيى 3-4 پروتسەنتتىڭ اينالاسىندا بولادى دەگەن جوسپارىمىز بار»، - دەيدى م. جۇنىسبەكوۆا.